ءىىم جۇرگىزۋشىلەردى قولايسىز اۋا رايىندا الىس ساپارلارعا شىقپاۋعا شاقىرادى، – دەپ حابارلايدى Polisia.kz.
– اۋا رايىنىڭ بۇزىلۋى، كورۋ مۇمكىندىگىنىڭ ناشارلاۋى، سونداي-اق جولداردا كوكتايعاق كەزىندە ازاماتتاردىڭ ءومىرى مەن دەنساۋلىعىن ساقتاۋ جانە جول-كولىك وقيعالارىنىڭ الدىن الۋ ءۇشىن قوزعالىسقا شەكتەۋ ەنگىزىلەدى.
قىستىڭ باسىنان بەرى مىڭنان استام رەت، ونىڭ ىشىندە قاڭتار ايىندا ءۇش جۇزدەن استام رەت جولدار جابىلدى. بۇقارالىق اقپارات قۇرالدارى ارقىلى جانە ۇيالى تەلەفوندارعا حابارلاما جىبەرۋ ارقىلى حالىققا جولداردىڭ ناقتى ۋچاسكەلەرىندەگى جاعداي تۋرالى اقپارات جەتكىزىلەدى.
قاۋىپسىزدىكتى قامتاماسىز ەتۋ ءۇشىن وسى ۋچاسكەلەرگە پوليسيا ناريادتارى قويىلادى. قاجەت بولعان جاعدايدا ولار اۆتوكولىكتەردى سۇيەمەلدەيدى.
كورۋ مۇمكىندىگى ناشارلاعان جاعدايدا پاترۋلدىك كولىك ماياكتاردى قوسىپ، اۆتوكولىكتەردىڭ الدىنا ءتۇسىپ، باسقالارعا باعدار بەرەدى.
بيىل جولداردى جابۋ بارىسىندا 15 مىڭنان استام كولىك قۇرالدارى سۇيەمەلدەندى، قار ۇيىندىلەرىنەن 433 ادام، ونىڭ ىشىندە 44 بالا جانە 117 اۆتوكولىك ەۆاكۋاسيالاندى.
جولداردى جابۋ كەزىندە پوليسيانىڭ زاڭدى تالاپتارىنا باعىنباعان جۇرگىزۋشىلەرگە ايىپپۇل نەمەسە بەس تاۋلىككە دەيىن قاماۋعا الۋ جازاسى قاراستىرىلادى.
ءبىر جىل ىشىندە باعىنباۋ تاعى قايتالانسا، ون تاۋلىككە دەيىن قامالادى.
جولداردى جابۋ كەزىندەگى تالاپتارعا باعىنباعانى ءۇشىن جىل باسىنان بەرى سەگىز قۇقىق بۇزۋشى جاۋاپكەرشىلىككە تارتىلدى.
جۇرگىزۋشى! قولايسىز اۋا رايى كەزىندە الىس جولدارعا شىقپاڭىز، قالا سىرتىنداعى ساپارلاردان باس تارتىڭىز!
وزىڭىزگە جانە جاقىندارىڭىزعا اباي بولىڭىز! – دەدى ق ر ءىىم اپك ءتوراعاسى قايسار سۇلتانبايەۆ.