الماتى باتىس قازاقستانداعى سۋ تاسقىنىنىڭ سالدارىن جويۋ ءۇشىن ارنايى تەحنيكا جىبەرەدى
قازاقستان رەسپۋبليكاسى پرەمەر-مينيسترىنىڭ تاپسىرماسىنا سايكەس الماتى قالاسىنىڭ اكىمدىگى ورال قالاسىنا قىزمەت كورسەتەتىن پەرسونالى بار ارنايى ماقساتتاعى ماشينالاردى جونەلتۋدى ۇيىمداستىردى.
الماتى قالاسىنان 51 تەحنيكا ورال قالاسىندا ورنالاسقان. 12 ساۋىردە تەمىرجولعا ساموسۆالدار، گرەيدەرلەر، بۋلدوزەرلەر، سونداي-اق تيەگىشتەر كىرەتىن قۇرام جىبەرىلدى.
سۋ تاسقىنى سالدارىن جويۋ بويىنشا تاۋلىك بويى جۇمىس ىستەۋ ءۇشىن ارنايى تەحنيكانىڭ 400-گە جۋىق جۇرگىزۋشىسى جىبەرىلەدى، كومەكشى پەرسونال قۇرامىندا دارىگەرلەر، تج قىزمەتى جانە اكىمدىك قىزمەتكەرلەرى قاتىسادى.
ورالعا كەلگەننەن كەيىن قۇرىلعان جەدەل شتابتى الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆ باسقارادى.
_«47 بىرلىكتەن تۇراتىن ءبىرىنشى پارتيا 12 ساۋىردە جىبەرىلدى، تاڭەرتەڭ ەكىنشى پارتيا جىبەرىلەدى. بۇگىنگى تاڭدا ورال قالاسىندا 51 بىرلىك تەحنيكا ورنالاستىرىلعان»، - دەپ ءتۇسىندىردى تالعات مالىبايەۆ._
سونىمەن قاتار، الماتى كاسىپكەرلەرى، ءىرى قۇرىلىس كومپانيالارى زارداپ شەككەن ايماققا كومەك كورسەتۋ ءۇشىن مەحانيزاتورلارمەن جانە جۇرگىزۋشىلەرمەن ارنايى تەحنيكالارىن ۇسىندى.
تولىق اۆتونومدى جۇمىستى قامتاماسىز ەتۋ ءۇشىن پەرسونال دالالىق اس ۇيمەن، بيودارەتحانالارمەن جانە دالالىق شاتىرلارمەن، ءورت ءسوندىرۋ تەحنيكاسىمەن، اسسەنيزاتورمەن، سۋ تاسيتىن كولىكپەن، جىلجىمالى كوماندالىق پۋنكتپەن، سونداي-اق باسقا دا قاجەتتى قۇرالدارمەن جابدىقتالعان.
ايتا كەتەيىك، جوسپارعا سايكەس الماتى قالاسىنىڭ اكىمدىگى 200-دەن استام ارنايى تەحنيكا جىبەرەدى.
قۇرامنىڭ تەحنيكامەن جانە قىزمەتكەرلەرمەن بارۋى دۇيسەنبى، 15 ساۋىردە كۇتىلەدى.
الماتى تجد-دان اتىراۋ وبلىسىنا جول بويىندا 3 بىرلىك تەحنيكا جىبەرىلدى، ونىڭ ىشىندە: «كاماز» شاسسيىندەگى 2 ءورت-سورعى ستانسياسى، ۇلكەن كولەمدەگى سۋدى سورۋعا ارنالعان جەڭدى ءورت ءسوندىرۋ اۆتوكولىگى، سونداي-اق جەكە قۇرامنىڭ 7 ادامى.