ءا.قاستەيەۆ اتىنداعى ق ر مەملەكەتتىك ونەر مۋزەيىندە قازاقستان رەسپۋبليكاسىنىڭ ەڭبەك سىڭىرگەن قايراتكەر، الەمگە ايگىلى كوللەكسيا جيۋشى، مەسەنات، اقىن، جازۋشى ازات اكىمبەكتىڭ جەكە كوللەكسياسىنان، 75 جىلدىق مەرەيتويىنا ارنالعان «ورتا ازيا ۇيعىر سۋرەتشىلەرىنىڭ تۋىندىلارى (كەسكىندەمە، گرافيكا)» اتتى كورمە اشىلادى.
ازات اكىمبەك – 1972 جىلدان باستاپ بۇگىنگە دەيىن شىعىس تۇركىستان، قاشقار، حوتان، تۋرفان، كۋچار، اقسۋ جانە باسقا دا قالالاردىڭ شەبەرلەرى جاساعان ۇيعىر حالىق-قولدانبالى ونەرىنىڭ بىرەگەي جيناعىن جيناي الدى. ەلىمىزدى قوسقاندا، شەتەلدەردە 74 كورمەسى وتكەن.
قازاقستاندا ۇيعىر بەينەلەۋ ونەرىنىڭ دامۋ تاريحىن بىرەگەي دەپ اتاۋعا بولادى. ۇيعىر حالقى قازاق جەرىندە بىرنەشە ۇرپاق بويى ءومىر ءسۇرىپ كەلە جاتقان ۇلكەن توپتى قۇرايدى. ۇيعىرلاردىڭ كوركەمدىك مادەنيەتىنىڭ ەرەكشەلىگى – ءداستۇرلى ۇيعىر ونەرىن قۇرمەتپەن ساقتاپ، ولاردى زاماناۋي ساندىك-قولدانبالى، مۋزىكالىق جانە بي سالاسىندا دامىتۋ. ۇيعىرلار اراسىندا كاسىبي بەينەلەۋ ونەرىنىڭ باستاۋى زاڭدى تۇردە اۆاكري شامسيگە (ابۋباكىر شامسۋتدينوۆ (1903–1987)، ال قازاقتار اراسىندا ءابىلحان قاستەيەۆكە تيەسىلى.
كورمەگە ۇيعىر سۋرەتشىلەرىنىڭ 70-تەن استام تۋىندىسى قويىلادى. ولاردىڭ بارلىعى دا شىعارماشىلىق الاڭىندا بەلسەندىلىك تانىتىپ جۇرگەن الەمگە ايگىلى شەبەرلەر. كاسىبي ءبىلىم العان، ەلگە تانىلعان بۇل سۋرەتشىلەردىڭ بۋىنى، الماتى مەن الماتى وبلىسىنىڭ تۋمالارى.
كورەرمەن نازارىنا كاسىبي ونەردە – كەسكىندەمە مەن گرافيكا سالاسىندا جۇمىس ىستەگەن جانە بۇگىن دە جۇمىسىن جالعاستىرىپ جۇرگەن سۋرەتشىلەر: وزبەكستاننىڭ حالىق سۋرەتشىسى، وزبەكستان ونەر اكادەمياسىنىڭ اكادەميگى مەدات كاگاروۆتىڭ، كاننا (فرانسيا) حالىقارالىق كورمەسىنىڭ التىن مەدالىنىڭ يەگەرى ابدۋكاريم يسانىڭ، قازاقستان ديزاينەرلەر وداعىنىڭ مۇشەسى، قازبسقا ديزاين فاكۋلتەتىنىڭ پروفەسسورى اركەن زۋلفيكاردىڭ، وزبەكستاننىڭ حالىق سۋرەتشىسى، وزبەكستان ونەر اكادەمياسىنىڭ اكادەميگى، رەسەي ونەر اكادەمياسىنىڭ قۇرمەتتى اكادەميگى لەكيم يبراگيموۆتىڭ، قىرعىزستاننىڭ ەڭبەك سىڭىرگەن مادەنيەت قىزمەتكەرى ءسابيت بابادجانوۆتىڭ، ق ر ەڭبەك سىڭىرگەن ونەر قايراتكەرى، قازاقستان ونەر اكادەمياسىنىڭ اكادەميگى احمەت احاتتىڭ، قحر سۋار ونەر اكادەمياسىنىڭ پرەزيدەنتى كەريم ءناسيرديننىڭ جانە تاعى باسقا دا قىلقالام شەبەرلەرىنىڭ بىرەگەي تۋىندىلارى ۇسىنىلادى.
– زاماناۋي ۇيعىر سۋرەتشىلەرىنىڭ شىعارماشىلىق نەگىزىنە ۇيلەسىمدىلىك، ومىرگە دەگەن مەيىرىمدى كوزقاراس، ونىڭ قۇندىلىعى مەن قۋانىشىن سەزىنە ءبىلۋ، ءوزىنىڭ تاريحى مەن مادەنيەتىن ماقتان تۇتۋ، كۇندەلىكتى ومىردەن قاراپايىم باقىتتى كورۋ قابىلەتى ولارعا گۋمانيستىك سەرپىلىستى جەتكىزەتىن تۋىندىلار جاساۋعا مۇمكىندىك بەرەدى، – دەيدى مۋزەيدىڭ «شەتەل كلاسسيكالىق ونەرى» سەكتورىنىڭ جەتەكشىسى ا.ايدىمبايەۆا.