وڭىرلىك كوممۋنيكاسيالار قىزمەتىندە الماتى قالاسى بويىنشا قازاقستان رەسپۋبليكاسى ساۋدا جانە ينتەگراسيا مينيسترلىگى تەحنيكالىق رەتتەۋ جانە مەترولوگيا كوميتەتى دەپارتامەنتىنىڭ 2025 جىلعى جۇمىسى قورىتىندىلاندى، - دەپ حابارلايدى Aqshamnews.kz.
دەپارتامەنت باسشىسى داۋرەن سارسەنبايەۆ تەحنيكالىق رەتتەۋ، باعالى مەتالدار اينالىمى مەن مەترولوگيا سالاسىنداعى مەملەكەتتىك باقىلاۋدىڭ ناتيجەسى تۋرالى بايانداپ، بۇل جۇمىستىڭ تۇتىنۋشىلاردىڭ قاۋىپسىزدىگى مەن قۇقىقتارىنا قالاي اسەر ەتەتىنى جونىندە بايانداپ بەردى.
جىل بويى دەپارتامەنت تەحنيكالىق رەگلامەنتتەر تالاپتارىنىڭ ساقتالۋىنا قاتىستى ءارتۇرلى سالادا مەملەكەتتىك باقىلاۋ مەن قاداعالاۋ جۇرگىزدى. تەكسەرۋ جۇمىسى قۇرىلىس ماتەريالدارىن، حالىق تۇتىناتىن تاۋارلاردى، ونەركاسىپتىك ونىمدەردى، اۆتوكولىك قۇرالدارىن، مۇناي ونىمدەرىن، موتور مايلارى مەن ءموبيلدى قۇرىلعىلاردى عانا ەمەس، باسقا دا كوپتەگەن باعىتتى قامتىدى. دەپارتامەنتتىڭ جاۋاپكەرشىلىك ايماعىنا تەمىرجول سالاسى، اۆتوموبيل جولدارى، تومەن كەرنەۋلى ەلەكتروتەحنيكالىق جابدىقتار، پيروتەحنيكالىق بۇيىمدار، اۋىل شارۋاشىلىعى تەحنيكاسى، تىڭايتقىشتار، اتتراكسيوندار، بالالار ويىن الاڭدارى، ليفتىلەر، ماشينالار مەن جابدىقتار، جارىلىس ءقاۋىپتى ورتادا قولدانىلاتىن جابدىقتار، ءارتۇرلى جانارماي تۇرلەرى، ارناۋلى سۇيىقتىقتار مەن مايلار كىرەدى.
تەكسەرۋ بارىسىندا ءونىمنىڭ قاۋىپسىزدىگىن راستايتىن سايكەستىكتى باعالاۋ قۇجاتتارى – سەرتيفيكاتتار مەن دەكلاراسيالاردىڭ بولۋىنا نازار اۋدارادى. سونىمەن قاتار قازاقستان رەسپۋبليكاسىنىڭ «ءونىمدى تاڭبالاۋعا قويىلاتىن تالاپتار» تەحنيكالىق رەگلامەنتىنە سايكەس تاۋار تاڭبالاۋى مەن پايدالانۋ قۇجاتتاماسىنىڭ دۇرىستىعى دا تەكسەرىلەدى. تاڭبالاۋدا ءوندىرۋشى تۋرالى مالىمەتتەر، شىققان ەلى، قىزمەت ەتۋ نەمەسە جارامدىلىق مەرزىمى كورسەتىلىپ، ول مەملەكەتتىك جانە ورىس تىلىندە جازىلۋى ءتيىس.
«ءبىزدىڭ مىندەتىمىز – قۇجاتتاردى جاي تەكسەرە سالماي، نارىقتا ساتىلىپ جاتقان ءونىمنىڭ ادامدار ءۇشىن شىنىمەن ءقاۋىپسىز ەكەنىنە كوز جەتكىزۋ. ساتىپ الۋشى تاۋاردى كىم وندىرگەنىن، قايدان كەلگەنىن، ءقاۋىپسىز بە، جوق پا، سونى ءبىلۋى ءتيىس. بۇل ءار تۇتىنۋشىنىڭ قۇقىعى»، – دەپ اتاپ ءوتتى داۋرەن سارسەنبايەۆ.
دەپارتامەنت جۇمىسىنىڭ جەكە ءبىر باعىتى باعالى مەتالدار مەن اسىل تاستاردان جاسالعان زەرگەرلىك بۇيىمداردىڭ اينالىمىن باقىلاۋعا ارنالعان. 2025 جىلى مۇنداي بۇيىمداردى ساتۋشىلارعا قاتىستى نىساندارعا بارماي-اق پروفيلاكتيكالىق باقىلاۋ مەن قاداعالاۋ جۇرگىزىلىپ، سونىڭ ناتيجەسىندە كاسىپكەرلەرگە انىقتالعان زاڭ بۇزۋشىلىقتى جويۋ جونىندە ۇسىنىم-حابارلامالار بەرىلدى. سونىمەن قاتار دەپارتامەنت باسشىسى تۇسىندىرگەندەي، ەگەر تۇتىنۋشى سىناما تاڭباسى جوق التىن بۇيىم ساتىپ الىپ، شاعىم تۇسىرسە، دەپارتامەنت جوسپاردان تىس تەكسەرۋ باستايدى. سىناما تاڭباسى جوق بۇيىمدى ساتقانى راستالعان جاعدايدا، قۇقىق بۇزۋشى اكىمشىلىك جاۋاپقا تارتىلادى.
«سىناما تاڭباسى جوق زەرگەرلىك بۇيىمداردى ساتۋ – اۋىر قۇقىق بۇزۋشىلىق. تەكسەرگەندە بيزنەس ساناتىنا بايلانىستى 50-دەن 150 ايلىق ەسەپتىك كورسەتكىشكە دەيىن ايىپپۇل سالىنادى. ساتۋشى زاڭسىزدىقتى جويىپ، بۇيىمعا ساراپتاما جۇرگىزۋگە مىندەتتى»، – دەپ ءتۇسىندىردى داۋرەن سارسەنبايەۆ.
ساراپتاما جۇرگىزىلگەننەن كەيىن بۇيىم رەسمي تۇردە سىنامانى راستايتىن بارىس باسى بەينەسىندەگى سىناما تاڭباسىن الۋى ءتيىس، سودان كەيىن عانا قايتادان ساتىلىمعا جىبەرىلەدى. سۇراقتىڭ كوبى بولىگى مەترولوگيا مەن ولشەۋ دالدىگىن باقىلاۋعا بايلانىستى بولدى. دەپارتامەنتتە بارلىق ولشەۋ قۇرالدارى، سونىڭ ىشىندە ەلەكتر ەنەرگياسى، سۋ جانە گاز ەسەپتەگىشتەرى اينالىمعا شىعار كەزدە، قولدانار الدىندا ولشەۋ قۇرالدارىنىڭ مەملەكەتتىك تىزىلىمىنە ەنگىزىلۋى ءتيىس ەكەنى ەسكە سالىندى.
بۇل ءتىزىلىمدى «قازاقستان ستاندارتتاۋ جانە مەترولوگيا ينستيتۋتى» رمك جۇرگىزەدى. تەكسەرۋ مەرزىمدىلىگى قۇرالدىڭ تۇرىنە بايلانىستى. سۋىق جانە ىستىق سۋ ەسەپتەگىشىن سوڭعى تەكسەرگەن كۇننەن باستاپ 5 جىلدى ءبىر تەكسەرەدى. ەلەكتر ەنەرگياسىن ەسەپكە الاتىن بارلىق قۇرالداردىكى - 8 جىل. تۇرمىستىق گاز ەسەپتەگىشىنىڭ دە تەكسەرۋارالىق ينتەرۆالى 5 جىل بولىپ بەلگىلەنگەن.
«ەسەپتەگىشتەردىڭ دالدىگى تولەم تۇبىرتەكتەرىندەگى سومالارعا تىكەلەي اسەر ەتەدى. ەگەر ەسەپكە الۋ قۇرالى ۋاقىتىندا تەكسەرۋدەن وتپەسە، تۇتىنۋشى ءوزى بايقاماي ارتىق تولەۋى مۇمكىن. سوندىقتان ءبىز تەكسەرۋ مەرزىمىن قاداعالاپ، وسى تالاپتىڭ ساقتالۋىن تالاپ ەتەمىز»، – دەپ اتاپ ءوتتى دەپارتامەنت باسشىسى.
جۋرناليستەردىڭ قىزىعۋشىلىعىن تۋدىرعان تاعى ءبىر تاقىرىپ – ساۋدا ورتالىقتارى مەن بازارلاردا قولدانىلاتىن تارازىلاردى تەكسەرۋ ماسەلەسى بولدى. دەپارتامەنت وكىلدەرى مۇنداي تارازىلار قازاقستان رەسپۋبليكاسىنىڭ ولشەم بىرلىگىن قامتاماسىز ەتۋدىڭ مەملەكەتتىك جۇيەسىنە ەنگىزىلىپ، مىندەتتى تۇردە تەكسەرۋدەن ءوتۋى ءتيىس ەكەنىن ايتتى. ساۋدادا قولداناتىن تارازىنىڭ قولدانىستاعى تەكسەرۋ تاڭباسى مەن تەكسەرۋ سەرتيفيكاتى بولۋى قاجەت. بۇل ساتىپ الۋشىنىڭ تولەگەن مولشەردەگى تاۋاردى الۋىنا كەپىلدىك بەرەدى.
قورىتىندىلاي كەلە، دەپارتامەنت وكىلدەرى تەحنيكالىق رەتتەۋ مەن مەترولوگيا سالاسىنداعى مەملەكەتتىك باقىلاۋ ازاماتتاردىڭ مۇددەلەرىن قورعاۋعا باعىتتالعانىن اتاپ ءوتتى. تاۋارلاردىڭ قاۋىپسىزدىگى، ولشەۋلەردىڭ دالدىگى مەن بەلگىلەنگەن تالاپتاردىڭ ساقتالۋى ادامداردىڭ دەنساۋلىعىنا، شىعىندارىنا جانە نارىققا دەگەن سەنىمىنە تىكەلەي اسەر ەتەدى.