«قازستاندارت» رمك-نىڭ الماتى مەن وبلىس بويىنشا بولىمشەسى وڭىرلىك كوممۋنيكاسيالار قىزمەتىندە بىلتىرعى جۇمىسىن قورىتىندىلادى، - دەپ حابارلايدى Aqshamnews.kz.
بولىمشە ديرەكتورى رۋسلان بەكقوجين ولشەمدەردىڭ دالدىگى ابستراكتىلى عىلىم ەمەس، ساۋدادا، مەديسينادا، ونەركاسىپ پەن ءوڭىردىڭ ءار تۇرعىنىنىڭ كۇندەلىكتى ومىرىندەگى سەنىمنىڭ نەگىزى ەكەنىن اتاپ ءوتتى.
ادام بازاردان ەت ساتىپ الاردا تارازى ءدال ولشەيدى دەپ ويلايدى. ەلەكتر ەنەرگياسىنا تولەم جاساعاندا ەسەپتەگىشتىڭ ادال ەسەپتەگەنىنە سەنەدى. كولىگىنە جانارماي قۇيعاندا ءدال قۇيعانىن قالايدى. ەمحانادا قان قىسىمىن ولشەگەندە، قۇرىلعى قاتەلەسپەۋى كەرەك، ويتكەنى دياگنوز بەن ەمدەۋ جاعى سوعان تاۋەلدى. وسىعان مەترولوگيالىق قامتاماسىز ەتۋ جۇيەسى جاۋاپ بەرەدى.
«كوپشىلىك ءبىزدىڭ جۇمىس تارازى مەن ەسەپتەگىشتەردى تەكسەرۋمەن اسپايدى دەپ ويلايدى. الايدا بارلىعى مەملەكەتتىك ەتالونداردان باستالادى. ولار بۇكىل ولشەۋ جۇيەسىنىڭ ءابسوليۋتتى نەگىزى. ەگەر ەتالون ءدال بولماسا، ودان كەيىنگى بارلىق تىزبەك ءمانىن جوعالتادى»، – دەدى رۋسلان بەكقوجين.
بۇگىندە بولىمشەدە 14 مەملەكەتتىك ەتالون ساقتالىپ، قولداۋ كورسەتىلەدى. ولاردىڭ قاتارىندا سەزيي ستاندارتىنا نەگىزدەلگەن ۋاقىت پەن جيىلىك بىرلىگىنىڭ مەملەكەتتىك ەكىنشى ەتالونى بار. بۇل – الەمدەگى ەڭ ءدال قۇرالدىڭ ءبىرى، ول ۋاقىتتى ميلليونداعان جىلدا ءبىر سەكۋندتان دا از قاتەلىكپەن ولشەيدى. ول بايلانىس جۇيەلەرىنىڭ سينحروندالۋىنا، بانكتەردىڭ جۇمىسىنا، ناۆيگاسيا مەن سيفرلىق سەرۆيستەرگە تىكەلەي اسەر ەتەدى.
«ءسىز ۇيالى تەلەفوندى پايدالانعاندا، بانك كارتاسىمەن تولەم جاساعاندا نەمەسە ناۆيگاتور ارقىلى باعىت قۇرعاندا، وسى تىزبەكتە ءبىزدىڭ ۋاقىت ەتالونىمىز بار. ول ادامنان الىس ورنالاسۋى مۇمكىن، ءبىراق كۇن سايىن ميلليونداعان وپەراسياعا ىقپال ەتەدى»، – دەپ ءتۇسىندىردى بولىمشە ديرەكتورى.
سونداي-اق فيليالدا ءتۇزۋ سىزىقتىلىق پەن جازىقتىقتان اۋىتقۋلاردى ولشەۋگە ارنالعان ۇزىندىق بىرلىگىنىڭ مەملەكەتتىك ەتالونى ساقتالادى. ول بەتتەردىڭ تەگىستىگىن ميكروننىڭ ۇلەس بولىكتەرىنە دەيىنگى دالدىكپەن انىقتاۋعا مۇمكىندىك بەرەدى. مۇنداي دالدىك ماشينا جاساۋ، وپتيكا جانە جوعارى دالدىكتى جابدىقتار وندىرىسىندە قاجەت. بۇدان بولەك، 0،1-دەن 200 ميلليمەترگە دەيىنگى دياپازوندا ۇزىندىق بىرلىگىنىڭ مەملەكەتتىك ەكىنشى ەتالونى قولدانىلادى، ول ستانوكتاردى باپتاۋعا ارنالعان ۇزىندىقتىڭ شەكتى ولشەمدەرىن كاليبرلەۋ ءۇشىن پايدالانىلادى. سونىمەن قاتار تەمپەراتۋرا، قىسىم ەتالوندارى جانە وزگە دە پرەسيزيوندى جابدىقتار بار.
2025 جىلى بولىمشە بارلىق 14 ەتالوننىڭ ۇزدىكسىز جۇمىسىن قامتاماسىز ەتىپ، ولشەمدەردىڭ بەس ءتۇرى بويىنشا بەس لابوراتورياارالىق سالىستىرۋعا قاتىستى. بۇل جابدىقتاردىڭ الەمدىك دەڭگەيگە سايكەستىگىن راستادى.
جىلدىڭ ماڭىزدى ناتيجەسىنىڭ ءبىرى – حالىقارالىق مويىنداۋ بولدى. بولىمشە CIPM MRA لوگوتيپىمەن 52 كاليبرلەۋ سەرتيفيكاتىن بەردى. بۇل كەلىسىم الەمنىڭ 100-دەن استام ەلىندە تانىلادى. ونىڭ ىشىندە ۇزىندىق ەتالونى بويىنشا – 35، ۋاقىت پەن جيىلىك ەتالونى بويىنشا – 10، شاعىن دياپازونداعى ۇزىندىق ەتالونى بويىنشا – 7 سەرتيفيكات بەرىلگەن.
«ەگەر كاسىپورىن مۇنداي سەرتيفيكاتتى قازاقستاندا السا، ول شەتەلدە دە مويىندالادى. گەرمانيادا، جاپونيادا نەمەسە اقش-تا قايتا تەكسەرۋدەن ءوتۋدىڭ قاجەتى جوق. بۇل ۋاقىت پەن قارجىنى ۇنەمدەۋ، ەكسپورتتى ناقتى قولداۋ»، – دەپ اتاپ ءوتتى رۋسلان بەكقوجين.
نارىقتارداعى تارازىلار مەملەكەتتىك ەتالونداردان كاليبرلەنگەن قۇرالدار ارقىلى تەكسەرىلەدى. ەلەكتر ەسەپتەگىشتەر تۇرعىنداردىڭ كوممۋنالدىق قىزمەتتەر ءۇشىن ارتىق تولەم جاساماۋى ءۇشىن باقىلانادى. قازاقستانداعى بارلىق جانارماي تاراتۋ كولونكالارى مىندەتتى تۇردە تەكسەرۋدەن وتەدى، سوندىقتان وپەراتوردان سەرتيفيكاتتى تالاپ ەتۋگە قۇقىلىسىز. قۇجاتتار بولماعاندا نەمەسە مەرزىمى ءوتىپ كەتكەن جاعدايدا اۋماقتىق تەحنيكالىق رەتتەۋ مەن مەترولوگيا كوميتەتىنىڭ دەپارتامەنتىنە شاعىمدانۋعا بولادى.
ولشەمدەردىڭ دالدىگى مەديسينادا ەرەكشە ماڭىزعا يە. قان قىسىمىن، تەمپەراتۋرانى ولشەيتىن جانە تالداۋ جۇرگىزەتىن بارلىق قۇرىلعىلار مەملەكەتتىك مەترولوگيالىق باقىلاۋدان وتەدى. ولاردىڭ دۇرىس جۇمىس ىستەۋى دياگنوز قويۋ مەن ەمدەۋ ءتاسىلىن تاڭداۋعا تىكەلەي اسەر ەتەدى. ەكولوگيا سالاسىندا دا مەترولوگيانىڭ ماڭىزى زور – شىعارىندىلاردى باقىلاۋ قۇرالدارى اۋا ساپاسىنا اسەر ەتەتىن ناقتى ماندەردى كورسەتۋى ءتيىس.
2025 جىلى بولىمشە ماماندارى وڭىردەگى 50-دەن استام كاسىپورىنعا بارىپ، قىزمەتتەر بويىنشا تانىستىرىلىمدار وتكىزىپ، زاڭناما تالاپتارىن ءتۇسىندىردى. 9 سەمينار مەن 9 بىلىكتىلىكتى ارتتىرۋ كۋرسى ۇيىمداستىرىلىپ، 120-دان استام مامان وقىتىلدى. سونداي-اق ءتورت اناليتيكالىق جانە سىناق زەرتحاناسىندا ولشەمدەردىڭ جاي-كۇيى تەكسەرىلدى.
2026 جىلى بولىمشە كاسىپورىندارعا تۇسىندىرمە جۇمىسىن وتكىزۋ، ستاندارتتاۋ ماسەلەسى بويىنشا دوڭگەلەك ۇستەل وتكىزۋ، كەمىندە 80 ماماندى وقىتىپ، جوعارى وقۋ ورىندارىمەن ىنتىماقتاستىقتى كۇشەيتىپ، كەمىندە 30 ستۋدەنتتى تاجىريبەدەن وتكىزۋ سياقتى ءبىراز شارۋانى جوسپارلاپ وتىر.
«مەترولوگيا كوبىنە كوزگە كورىنە بەرمەيدى، ءبىراق ءدال ولشەگەن ءار زاتتىڭ ارتىندا سولاردىڭ جۇمىسى تۇر. مەملەكەتتىك ەتالوندار – سەنىمنىڭ ىرگەتاسى. ونسىز ەكونوميكانىڭ دامۋى دا، قاراپايىم ادامداردىڭ مۇددەسىن قورعاۋ دا مۇمكىن ەمەس»، – دەپ تۇيىندەدى رۋسلان بەكقوجين.