مەملەكەتتىك قۋىرشاق تەاترىنىڭ ارتىستەرى 3-4 شىلدەدە كانادا كورەرمەندەرىنە «رومەو جانە دجۋلەتتا» قويىلىمىن ۇسىنادى. 88ء-شى تەاتر ماۋسىمىن اياقتاعان تەاتر ۇجىمى وتتاۆادا وتەتىن The First international Ottawa Puppet فەستيۆالىنە قاتىسىپ جاتىر.
«ءبىز قۋىرشاق تەاترىنىڭ جان-جاقتى دامۋىنا ۇلكەن ءمان بەرەمىز. ءبىزدىڭ ارتىستەر وسى ماۋسىمدا گەرمانيا، تۇركيا جانە رەسەيدەگى بەيىندى مەكەمەلەردە ءبىلىم الىپ قايتتى. ودان بولەك، شىعارماشىلىق ۇجىم ىڭعايلى جاعدايدا جۇمىس ىستەۋى ءۇشىن، اكىمنىڭ تاپسىرماسى بويىنشا، تەاتر عيماراتىن جوندەۋ جانە تەحنيكالىق جابدىقتارىن جاڭعىرتۋ جۇمىستارىن جۇرگىزدىك. تاعى ءبىر جاقسى جاڭالىق — تەاتر ماۋسىمىنىڭ باسىندا ارتىستەردىڭ جالاقىسى 30% ارتتى. جالپى، ءبىز جەمىستى ناتيجەگە جەتكىزەتىن بارلىق باستامالاردى قولداۋعا دايىنبىز»، - دەپ حابارلادى الماتى قالاسى مادەنيەت باسقارماسى.
كانادالىق فەستيۆالگە قاتىسۋ ءۇشىن قۋىرشاق تەاترى ءوزىنىڭ رەپەرتۋارىنان «رومەو مەن دجۋلەتتا» سپەكتاكلىن تاڭدادى، ونىڭ رەجيسسەرى – دينا جۇمابايەۆا. شىعارماشىلىق توپتىڭ شەبەرلىگى مەن بىلىكتىلىگىنىڭ ارقاسىندا ءدال وسى قويىلىم بۇعان دەيىن دە بەدەلدى رەسپۋبليكالىق جانە حالىقارالىق فەستيۆالداردا كوپتەگەن ماراپاتقا يە بولدى. ماسەلەن، بولگاريادا وتكەن «التىن دەلفين» حالىقارالىق تەاتر فەستيۆالىندە «گران-پري»، «ۇزدىك ەر ادام ءرولى» جانە «ۇزدىك دەبيۋت» سىيلىقتارىن جانە «سىن - شىن بولسىن» رەسپۋبليكالىق تەاتر فەستيۆالىندە «گران-پري» جەڭىپ العان ەدى.
ايتا كەتەيىك، قۋىرشاق تەاترى – كانادالىق كورەرمەندەر الدىندا ونەر كورسەتەتىن قازاقستاننىڭ العاشقى تەاترى.