ونىڭ پايىمداۋىنشا، جۋرناليست تۇندە قايتىس بولعان.
"ايدوس سادىقوۆ بۇگىن كييەۆ ۋاقىتىمەن 03:00-دە (قازاقستان ۋاقىتى بويىنشا 05:00-دە. – رەداكسيانىڭ ەسكەرتپەسى) بۇل ومىرمەن قوش ايتىستى... ايدوس 13 كۇن جانساقتاۋ بولىمىندە ءومىر ءۇشىن كۇرەستى، ءبىراق عاجايىپ بولعان جوق"، — دەپ جازدى ناتاليا سادىقوۆا Facebook پاراقشاسىندا.
2024 جىلدىڭ 8 ماۋسىمىندا كييەۆتە جۋرناليست ايدوس سادىقوۆتىڭ ومىرىنە قاستاندىق جاسالعانى بەلگىلى بولدى. قازاقستان ازاماتىنىڭ امان قالعانى، ءبىراق جاعدايى اۋىر ەكەنى حابارلاندى.
كييەۆ پروكۋراتۋراسى ءجۋرناليستتى ولتىرۋگە وقتالۋ فاكتىسى بويىنشا تەرگەۋ باستادى. ۆەدومستۆو "الدىن الا مالىمەت بويىنشا، تاپانشا ۇستاعان بەلگىسىز بىرەۋ جابىرلەنۋشى مەن ونىڭ ايەلى وتىرعان كولىككە جۇگىرىپ كەلىپ، ەر ادامعا وق اتىپ، كەيىن قاشىپ كەتكەنىن" حابارلادى. قاستاندىق ولار تۇراتىن ۇيدەن الىس ەمەس جەردە بولعان.
19 ماۋسىمدا قاسىم-جومارت توقايەۆ كييەۆتە جۋرناليست ايدوس سادىقوۆقا جاسالعان قاستاندىققا قاتىستى مالىمدەمە جاسادى. ول قوعامىمىزداعى بارلىق قايشىلىقتار مەن كەلىسپەۋشىلىكتەر تەك قۇقىقتىق شەڭبەردە، قولدانىستاعى زاڭناما نەگىزىندە، نەگىزگى حالىقارالىق ستاندارتتارعا سايكەس شەشىلۋى ءتيىس ەكەنىن اتاپ ءوتتى.
بۇقارالىق اقپارات قۇرالدارىنىڭ حابارلاۋىنشا، 2014 جىلدىڭ ناۋرىز ايىندا اقتوبەلىك جۋرناليستەر ايدوس پەن ناتاليا سادىقوۆالار قازاقستاننان ۋكرايناعا كەتىپ، YouTube جانە Telegram ارنالارىن اشقان. 2023 جىلدىڭ قازان ايىندا ولاردىڭ ىزدەۋگە جاريالانعانى بەلگىلى بولدى. ىزدەستىرۋ ءىسى استانادا تىركەلىپ، باستاماشى ق ر ىشكى ىستەر مينيسترلىگى بولدى. ونىڭ سەبەبىن دەپارتامەنت: "ۋاكىلەتتى ورگان YouTube ارناسىندا شىندىققا سايكەس كەلمەيتىن، ۇلتتىق ارازدىقتى ناسيحاتتايتىن بەينەماتەريالداردى انىقتادى" دەپ ءتۇسىندىردى.