وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا قالالىق قوعامدىق كەڭىستىكتەردى دامىتۋ باسقارماسىنىڭ باسشىسى باتىرحان سۇلەيمەنوۆ قولعا الىنعان وسى شارۋالار جايلى باياندادى.
ونىڭ ايتۋىنشا، مەملەكەت باسشىسى مەن قالا اكىمىنىڭ تاپسىرماسى بويىنشا ا. بايتۇرسىن ۇلى مەن ق. ساتبايەۆ كوشەسىنىڭ قيىلىسىندا ورنالاسقان گەولوگتار اللەياسى كۇردەلى جوندەۋدەن ءوتىپ، تولىق جاڭعىرتىلماق. اللەيانى جاڭارتىپ قانا قويماي، زامان تالابىنا ساي ەتىپ، ادامدارعا قولايلى كەڭىستىك قۇرماق ويدا. اۋماقتىڭ جالپى اۋدانى ەكى گەكتارعا جۋىقتايدى.
«قۇرىلىس-مونتاج جۇمىسىنا كىرىسىپ كەتتىك. ەسكى قۇرىلىمداردى، سونىڭ ىشىندە اۆتوتۇراقتى بۇزىپ جاتىرمىز ءقازىر. ءبىراق ا. بايتۇرسىن ۇلى كوشەسى جاقتاعى 10 كولىك ورنى قالادى. مۇندا وتە قىزىقتى ورىن – ستۋدەنتتەر ايماعى اشىلادى. ستۋدەنتتەر مەن قالا تۇرعىندارى مۇندا ۋاقىت وتكىزىپ، دەمالىپ، شاحمات، ۇستەل تەننيسىن وينايدى»، – دەدى باتىرحان سۇلەيمەنوۆ.
ق. ساتبايەۆ ەسكەرتكىشىن اللەيانىڭ ورتالىق كىرەبەرىس ايماعىنا كوشىرىپ، اعاشتاردى جارىقتاندىراتىن دەكوراتيۆتى جارىق جۇيەسىن ورناتىپ، پليتكالى جامىلعىنى جاڭارتپاق ويدا. جابايى جۇزىممەن كومكەرىلگەن پەرگولالار مەن جاڭا ورىندىقتار دا قويىلادى، سونداي-اق اللەيانىڭ مازمۇنىن اشاتىن مينەرالداردان قۇرالعان ارت-نىسان ورناتۋ دا جوسپاردا بار.
«ءبىز كوگالداندىرۋعا ەرەكشە كوڭىل بولەمىز: مۇندا ۇلكەن اعاشتار، بۇتالار مەن گازون بولادى، بۇرىن شەشىمىن تاپپاعان اۆتوماتتى سۋارۋ جۇيەسى ەنگىزەمىز. جاسىل ايماقتى گيدروسەبۋ ادىسىمەن اباتتاندىرامىز. سونىمەن قاتار «كوليزەي» – امفيتەاتر سالىنادى، وندا ق.ساتبايەۆ اتىنداعى ۋنيۆەرسيتەت ءىس-شارا مەن ۇيىرمەلەر ۇيىمداستىرا الادى»، – دەپ اتاپ ءوتتى ول.
جوبانى ساۋلەتشى جاننا سپۋنەر ازىرلەگەن. سونىڭ اياسىندا «مۇزتاۋ 200» ۇلگىسىندەگى جاڭا قوقىس جاشىكتەرى مەن قازاقستانداعى گەولوگيا تاريحى تۋرالى اقپارات بەرەتىن 12 اقپاراتتىق تاقتا ورناتىلماق. سونداي-اق دەمالىسقا ارنالعان ساڭىراۋقۇلاق ءتارىزدى قالقا مەن اشىق اسپان استىنداعى كىتاپحانا دا اشىلادى.
«بۇل كۇندىز دە، كەشكە دە جايلى، تارتىمدى ورىن بولادى. ءبىز كەڭىستىكتى كەز كەلگەن ۋاقىتتا ءقاۋىپسىز ءارى قىزىقتى ەتۋ ءۇشىن دەكوراتيۆتى جارىقتاندىرۋدى بەلسەندى تۇردە ەنگىزىپ جاتىرمىز»، – دەپ قوستى الماتى قالاسى قوعامدىق كەڭىستىكتەردى دامىتۋ باسقارماسىنىڭ باسشىسى باتىرحان سۇلەيمەنوۆ.
شامامەن ءۇش اپتا بۇرىن باستالعان جوبا جىل سوڭىنا دەيىن اياقتالىپ قالادى. كۇردەلى جوندەۋدەن كەيىن گەولوگتار اللەياسى مادەني، ءبىلىم بەرۋ مەن دەمالىس قىزمەتىن بىرىكتىرەتىن وسى زامانعى ءارى جايلى قوعامدىق كەڭىستىككە اينالادى.