الماتى قالاسىنداعى «وڭتۇستىك» ساياباعىنىڭ سولتۇستىك بولىگىندە جاڭادان جاسىل كەڭىستىك قۇرىلا باستادى. جوبا تابيعي ورتا پەن تاريحي ساۋلەتتى ساقتاي وتىرىپ ىسكە اسپاق. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا الماتى قالاسىنىڭ قوعامدىق كەڭىستىكتەردى دامىتۋ باسقارماسىنىڭ باسشىسى باتىرحان سۇلەيمەنوۆ وسىلاي دەدى.
الماتىداعى «وڭتۇستىك» ساياباعىنىڭ جانىندا 4،1 گەكتار اۋماقتا جاڭا جاسىل ايماقتىڭ قۇرىلىسى باستالدى. جوبا تابيعي ورتا مەن بار اعاشتاردى ساقتاي وتىرىپ، جايلى قوعامدىق كەڭىستىك قۇرۋعا باعىتتالعان.
«بۇل اۋماق بۇرىن قاراۋسىز جاتقان. الماتى قالاسىنىڭ اكىمدىگى وسى جەردى قالپىنا كەلتىرۋدى شەشكەن سوڭ، ءبىز بۇل اۋماقتى ساتىپ الىپ، قۇرىلىس-مونتاج جۇمىستارىنا كىرىسىپ كەتتىك»، - دەيدى باسقارمانىڭ باسشىسى.
اباتتاندىرۋ اياسىندا تاريحي قۇندىلىعى بار نىسانداردى ساقتاۋ ماقساتىندا بار قۇرىلىمداردى جوندەپ، قالپىنا كەلتىرىپ، ەسكىرگەن شاعىن ساۋلەتتىك فورمالاردى جاڭا ءارى ىقشام ەلەمەنتتەرگە اۋىستىرماق. جوبا شەڭبەرىندە بيىكتىگى 4–4،5 مەتر بولاتىن 120 ۇلكەن كوشەت ەگىلەدى، ونىڭ ىشىندە 40 كاشتان، 40 جوكە اعاشى مەن 40 كادىمگى قاراعاي بار.
اۋماق 48 ورىندىقپەن، 48 قوقىس جاشىگىمەن، 167 جارىق باعانىمەن جانە 30 كوشە بەينەباقىلاۋ كامەراسىمەن جابدىقتالادى. سونىمەن قاتار جاياۋ جۇرگىنشى جولدارى سالىنىپ، بالالار مەن سپورت الاڭدارى، جاڭا شاعىن ساۋلەتتىك فورمالار ورناتىلادى. جوبانى جۇزەگە اسىرۋ قالانىڭ جاسىل قورىن ساقتاپ قانا قويماي، تۇرعىندارعا جايلى دەمالىپ، سەرۋەندەيتىن ورتا قالىپتاستىرۋعا مۇمكىندىك بەرمەك.
«ساياباق بارىنە قولايلى بولادى. بۇرىن قاراۋسىز قالعان اۋماق بالالار مەن قارتتارعا قاۋىپتىرەك بولاتىن: قالادا ساياباق جەتىسپەيتىندىكتەن، سوندىقتان ونى اباتتاندىرۋعا ءماجبۇر بولدىق»، – دەپ اتاپ ءوتتى باتىرحان سۇلەيمەنوۆ.