BRT قۇرىلىسى اياسىندا الماتىدا قوعامدىق كولىكتىڭ ساپاسىن ارتتىرۋ بويىنشا ءوزىنىڭ ويىن جولاۋشىلار تاسىمالى كاسىپورىندارى قاۋىمداستىعى ءتوراعاسىنىڭ ورىنباسارى دانا احاتوۆا ايتتى، دەپ حابارلايىد almaty-akshamy.kz
ول ماڭىزدى كولىك قاتىناسىنىڭ كۇرە جولىنا اينالعان رايىمبەك داڭعىلى قالانىڭ شىعىس جانە باتىس باعىتتارىن بايلانىستىراتىنىن اتادى. بۇگىندە بۇل داڭعىلدا 88 مارشرۋت بويىنشا 1300-دەن استام اۆتوبۋس جۇرەدى، كۇن سايىن 730 مىڭعا جۋىق جولاۋشىعا قىزمەت كورسەتەدى، بۇل قالانىڭ جالپى جولاۋشىلار اعىنىنىڭ جارتىسىنا جۋىق.
الماتى اگلومەراسياسىنىڭ ورتالىعى رەتىندە الماتى – قالا ماڭىنداعى ايماقتاردى ەسكەرە وتىرىپ، قونايەۆ قالاسىن، Gate city جانە كوپتەگەن اۋدان ورتالىعىن قامتيدى. د. احاتوۆانىڭ پىكىرىنشە، BRT ءۇشىن ۇسىنىلعان ارنايى جولاق جولاۋشىلار ءۇشىن جىلدام ءارى ىڭعايلى ساپاردى قامتاماسىز ەتىپ، جولعا جۇمسالعان ۋاقىت پەن قوزعالىس ارالىعىن قىسقارتادى. بۇل قالا تۇرعىندارىنىڭ موبيلدىلىگىن جاقسارتىپ، قالا ەكولوگياسىنا وڭ اسەرىن تيگىزەدى.
«قالانىڭ اۆتوبۋس مارشرۋتتارىنىڭ 40%-دان استامى رايىمبەك داڭعىلى ارقىلى جۇرەدى، بۇل اتالعان ينفراقۇرىلىمنىڭ قوعامدىق كولىك ءۇشىن ماڭىزدىلىعىن كورسەتەدى. رايىمبەك داڭعىلىنا BRT ەنگىزۋ قوعامدىق كولىكتىڭ تارتىمدىلىعىن ارتتىرۋدى كوزدەيدى، بۇل ءوز كەزەگىندە حالىقتى قوعامدىق كولىككە وتىرۋعا ىنتالاندىرۋعا ءتيىس»، - دەدى جولاۋشىلار تاسىمالى كاسىپورىندارى قاۋىمداستىعى ءتوراعاسىنىڭ ورىنباسارى.
ەستەرىڭىزگە سالا كەتەيىك، بۇعان دەيىن قالا اكىمىنىڭ 2030 جىلعا دەيىنگى الماتى قالاسىنىڭ كولىك قاڭقاسىنىڭ شەبەر جوسپارىن بەكىتكەنى تۋرالى حابارلانعان بولاتىن. شەبەر جوسپار الماتىنىڭ كولىك ينفراقۇرىلىمىن جەتىلدىرۋدىڭ نەگىزگى باعىتتارىن ايقىندايتىن ستراتەگيالىق قۇجات بولىپ تابىلادى. ول الماتىنىڭ دامۋ باعدارلاماسى مەن 2040 جىلعا دەيىنگى باس جوسپار اياسىندا قالانى دامىتۋدىڭ نەگىزگى پەرسپەكتيۆالارىنا سايكەس ازىرلەندى. كولىك قاڭقاسىنىڭ پيلوتتىق دالىزىمەن رايىمبەك داڭعىلىنىڭ باتىسىندا اباي كوشەسىنەن («بارلىق» بازارىنىڭ ماڭايى) پۋشكين كوشەسىنە دەيىنگى ۇزىندىعى 17 كم ۋچاسكەسى تاڭدالدى. ول 2024 جىلدان جۇزەگە اسىرىلا باستايدى.