قازىرگى كەزدە ارنايى كولىسسوزدەر جۇرگىزىلىپ جاتىر.
ءبىرقاتار جوعارى وقۋ ورنى مەن كوللەدجدەردى مەگاپوليستەن قونايەۆ قالاسىنا كوشىرۋ ماسەلەسى قاراستىرىلىپ جاتىر. بۇل تۋرالى الماتى وبلىسى اكىمىنىڭ ورىنباسارى ارسلان داندىبايەۆ ءوڭىردىڭ بيزنەس قاۋىمداستىعىمەن كەزدەسۋى بارىسىندا ايتتى، دەپ حابارلايدى Almaty-akshamy.kz.
«ءبىزدىڭ ويىمىز – ۋنيۆەرسيتەتتەردى كوشىرۋ، ول ءۇشىن ءبىلىم بەرۋدى ۇيىمداستىرۋ ماقساتىندا جاقسى كامپۋستار سالۋ»، - دەدى ارسلان داندىبايەۆ.
ونىڭ ايتۋىنشا، ستۋدەنتتەردىڭ وندىرىستىك تاجىريبەدەن وتۋىنە جاعداي جاسالادى. وسىلايشا، ستۋدەنتتەر جارتى كۇن وقيدى، جارتى كۇن وندىرىستە جۇمىس ىستەي الادى.
«بولاشاقتا ءبىز ورتا ءبىلىم بەرۋدى دامىتۋعا باسا نازار اۋدارامىز. بىزدە ينجەنەرلەر، سانتەحنيكتەر مەن شەبەرلەردى تابۋ قيىن»، - دەدى ول.
وبلىس باسشىلىعى مەگاپوليستەگى ءومىر مەن باسپانانىڭ ايماققا قاراعاندا الدەقايدا قىمبات ەكەنىن ەسكەرە وتىرىپ، جوعارى وقۋ ورىندارى مەن كوللەدجدەردىڭ وڭىرگە كوشىرىلۋى دە وڭ الەۋمەتتىك ناتيجە بەرەتىنىنە سەنىمدى.