مىندەتتەردى ىسكە اسىرۋدىڭ نەگىزگى تەتىكتەرى پىسىقتالدى.
«قالا قۇرىلىسى» كودەكسىن قابىلداۋ ءۇشىن جول كارتاسى ازىرلەنىپ، بەكىتىلدى. بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ورتالىق كوممۋنيكاسيالار قىزمەتىنىڭ الاڭىندا وتكەن باسپا ءسوز ءماسليحاتىندا مالىمدەدى، دەپ حابارلايدى Almaty-akshamy.kz.
ۆەدومستۆو باسشىسىنىڭ ايتۋىنشا، پرەزيدەنت حالىققا ارناعان جولداۋىندا مينيسترلىكتىڭ الدىنا ءبىرقاتار ماڭىزدى مىندەت قويعان. قازىرگى ۋاقىتتا اتالعان مىندەتتەردى ىسكە اسىرۋدىڭ نەگىزگى تەتىكتەرىن پىسىقتادى.
«بىرىنشىدەن، «قالا قۇرىلىسى» كودەكسىن قابىلداۋ ءۇشىن جول كارتاسى ازىرلەنىپ، بەكىتىلدى. سونىمەن بىرگە قۇقىقتىق جانە تالدامالىق مونيتورينگ جۇرگىزۋ ءۇشىن جۇمىس توبى قۇرىلىپ، ونىڭ قۇرامىنا قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى، تۇرعىن ۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى، «قازجولعزي»، «اتامەكەن» ۇلتتىق كاسىپكەرلەر پالاتاسى جانە بيزنەس-قوعامداستىق وكىلدەرى كىردى»، - دەپ اتاپ ءوتتى مينيستر.
سونىمەن قاتار مەملەكەتتىك قالا قۇرىلىسى كاداسترىنىڭ اقپاراتتىق جۇيەسى بازاسىندا ءاربىر ءىرى قالا بويىنشا جەر ۋچاسكەلەرىنىڭ فۋنكسيونالدىق ينتەراكتيۆتى كارتالارىن جانە كوممۋنالدىق جەلىلەردىڭ سحەمالارىن قۇرۋ جوسپارلانۋدا.
«ونەركاسىپتىك ماقساتتاعى ۋچاسكەلەردىڭ كارتالارى كولىك جانە كوممۋنالدىق ينفراقۇرىلىمنىڭ وزەكتى سحەمالارىمەن تولىقتىرىلاتىن بولادى. جۇيە جەرگىلىكتى اتقارۋشى ورگاندار بەرگەن مالىمەتتەردى ەسكەرسەك، 514 مىڭ گەكتار اۋماقتان ينفراقۇرىلىمدىق دەرەكتەردىڭ 65 پايىزىن قامتيدى. بازاعا 191 باس جوسپار جانە 661 ەگجەي-تەگجەيلى جوسپارلاۋ جوباسى سيفرلاندىرىلىپ، ەنگىزىلگەن. جەلىلەردىڭ قالعان 35 پايىزىن 2024 جىلعا دەيىن سيفرلاندىرۋدى جوسپارلاپ وتىرمىز»، - دەدى قايىربەك وسكەنبايەۆ.