قازاقستاندا لۋدومانيامەن كۇرەسكە باعىتتالعان زاڭ قابىلداندى. زاڭدا حالىقتىڭ ويىنعا تاۋەلدىلىگىن تومەندەتۋگە باعىتتالعان شەكتەۋ جانە ىنتالاندىرۋ نورمالارى ەنگىزىلۋدە. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ تەرگەۋ باسقارما باسشىسى ساكەن كوندۋبايەۆ مالىمدەدى، دەپ حابارلايدى ashamnews.kz
الماتى قالاسى بويىنشا ەكونوميكالىق تەرگەۋ دەپارتامەنتىنىڭ باسىم مىندەتتەرىنىڭ ءبىرى زاڭسىز ويىن بيزنەسىمەن كۇرەس بولىپ تابىلادى. ويىن بيزنەسى 2007 جىلعى 12 قاڭتارداعى №219 «ويىن بيزنەسى تۋرالى» زاڭىمەن رەتتەلەدى، وندا وسى قىزمەتتى مەملەكەتتىك رەتتەۋ نەگىزدەرى ايقىندالعان.
«زاڭنىڭ 11-بابىنا سايكەس كازينو مەن ويىن اۆتوماتتارىنىڭ زالدارىن الماتى وبلىسىندا (قاپشاعاي) جانە اقمولا وبلىسىندا (ششۋچە اۋدانى) ورنالاستىرىلۋعا بولادى. باسقا جەرلەردە اشۋ زاڭسىز دەپ تانىلادى»، - دەدى ساكەن كوندۋبايەۆ.
قازاقستان پرەزيدەنتى ويىن بيزنەسى ماسەلەلەرى جونىندەگى زاڭعا قول قويدى جانە اكىمشىلىك بۇزۋشىلىقتار تۋرالى كودەكسكە ءتيىستى تولىقتىرۋلار ەنگىزدى.
وزگەرىستەرگە سايكەس، 21 جاسقا تولماعان قازاقستاندىقتاردى ونلاين-كازينولارعا جانە قۇمار ويىندارعا جىبەرۋگە تىيىم سالىنادى.
سونىمەن قاتار، قۇجات ونلاين-كازينو مەن بۋكمەكەرلىك كەڭسەلەردى جارنامالاۋعا تىيىم سالۋدى قاراستىرادى:
-قازاقستان رەسپۋبليكاسىنىڭ اۋماعىندا شەتەلدىك بۋكمەكەرلىك كەڭسەلەردىڭ، توتاليزاتورلاردىڭ ينتەرنەت-رەسۋرستارىن ليسەنزياسىز جۇزەگە اسىرۋعا تىيىم سالۋ بەلگىلەنەدى؛
- زاڭ سونىمەن قاتار مەملەكەتتىك قىزمەتشىلەردىڭ، سونداي-اق مۇنداي باس تارتۋدى ءوز ەركىمەن رەسىمدەگەندەردىڭ، مۇلىكتىك ءوندىرىپ الۋ تۋرالى اتقارۋشىلىق قۇجاتتار بويىنشا مىندەتتەمەلەرى ورىندالماعان بورىشكەرلەردىڭ قۇمار ويىندارىنا قاتىسۋىنا تىيىم سالادى؛
- بايلانىس وپەراتورلارى ءۇشىن كازينو مەن قۇمار ويىندارىنىڭ جارناماسى بار حابارلامالاردى جىبەرۋگە تىيىم سالىنادى. جالپى، زاڭ عيماراتتاردا، قۇرىلىس نىساندارىندا جانە كولىكتەردە، بۇقارالىق اقپارات قۇرالدارىندا جانە ت. ب. بۋكمەكەرلىك كەڭسەلەر مەن توتاليزاتورلاردى جارنامالاۋعا تىيىم سالادى؛
- سونداي-اق، مادەني ۇيىمدار ورنالاسقان تۇرعىن ۇيلەردە، جاتاقحانالاردا، عيماراتتاردا، ءبىلىم بەرۋ جانە دەنساۋلىق ساقتاۋ ۇيىمدارىندا، ءدىني عيماراتتاردا اپپاراتتار ورناتۋعا جانە لوتەرەيا ساتۋعا تىيىم سالا وتىرىپ، لوتەرەيا بيلەتتەرىن وتكىزۋ ورىندارىنا قويىلاتىن تالاپتار بەلگىلەنەدى.
وكق سپيكەرى الماتى قالاسى بويىنشا ەكونوميكالىق تەرگەۋ دەپارتامەنتى جىل بويى «قۇمار ويىندارسىز قالا» جانە «ستوپ-ويىن» اۋقىمدى جەدەل-الدىن الۋ ءىس-شارالارىن وتكىزگەنىن اتاپ ءوتتى.
ماسەلەن، دەپارتامەنت 2023 جىلى زاڭسىز ويىن بيزنەسىنە قارسى ءىس-قيمىل جەلىسى بويىنشا 14 قىلمىستىق ءىستى تىركەدى. 4 ويىن زالى، 1 بۋكمەكەرلىك كەڭسە (4 بۋكمەكەرلىك كاسسا) 5 جاسىرىن كازينو، زاڭسىز ويىن تەرمينالى بار 1 نۇكتە، 1 ونلاين-كازينو، الەۋمەتتىك جەلىلەر ارقىلى قۇمار ويىنداردى تاراتۋدىڭ 2 فاكتىسى توقتاتىلدى.
زاڭسىز اينالىمنان: 111 مونيتور، 102 پروسەسسور، ويىن تەرمينالى، 37 ۇيالى تەلەفون، 6 بەينە-رەسيۆەر، 923 500 تەڭگە جانە 500 اقش دوللارى كولەمىندە اقشا الىندى. 2023 جىلى 1500-دەن استام ويىن تەرمينالدارى جويىلدى.
«اعىمداعى جىلدىڭ ءبىرىنشى جارتىجىلدىعىندا زاڭسىز ويىن بيزنەسىنە قارسى كۇرەس سالاسىندا دەپارتامەنتپەن 5 سوتقا دەيىنگى تەرگەۋ تىركەلدى. 4 ونلاين-كازينو مەن ءبىر زاڭسىز ويىن زالىنىڭ قىزمەتى توقتاتىلدى. تيكتوك، Instagram الەۋمەتتىك جەلىلەرىندە زاڭسىز قۇمار ويىنداردى ۇيىمداستىرۋشىلاردىڭ قىزمەتى توقتاتىلدى»، - دەدى س.كوندۋبايەۆ.
جەدەل-تەرگەۋ ءىس – شارالارى بارىسىندا زاڭسىز ويىن بيزنەسىن-ستاۆكالاردى قابىلداۋ، بانكتىك اۋدارىمدار ارقىلى ۇتىستاردى ەسەپتەۋ جانە بەرۋ فۋنكسيالارىن قولدايتىن ونلاين قۇمار ويىندارىن ۇيىمداستىرۋ فاكتىسى انىقتالدى.
ۇيىمداستىرۋشىلار ق ر قك 3-تارماعىنىڭ 307-بابىنىڭ 2-بولىگىندە كوزدەلگەن قىلمىس جاساعانى ءۇشىن كىنالى دەپ تانىلدى (زاڭسىز ويىن بيزنەسىن ۇيىمداستىرۋ، ءىرى مولشەردە تابىس تابۋمەن الدىن الا ءسوز بايلاسۋ بويىنشا ادامدار توبى) جانە ناقتى جازا مەرزىمدەرىنە سوتتالدى.
سونداي-اق، زاڭسىز ويىن بيزنەسىنە قارسى ءىس-قيمىل جۇرتشىلىقپەن بىرلەسكەن كۇش-جىگەرمەن، ونىڭ ىشىندە الدىن الۋ ءىس-شارالارىن جۇرگىزۋ ارقىلى كورسەتىلۋى قاجەت ەكەنىن اتاپ ءوتتى.
«وسىعان بايلانىستى كاسىپكەرلەردى، قوعامدىق جانە جاستار ۇيىمدارىنىڭ وكىلدەرىن، بلوگەرلەر مەن ب ا ق وكىلدەرىن ءبىزدىڭ دەپارتامەنتپەن بىرلەسىپ زاڭسىز ويىن بيزنەسىمەن كۇرەسكە قوسىلۋعا شاقىرامىز. بۇگىنگى تاڭدا ءبىز ىنتىماقتاستىق ءۇشىن اشىقپىز جانە ءوز قۇزىرەتىمىز شەگىندە كەز كەلگەن دابىلعا جاۋاپ بەرۋگە دايىنبىز»، – دەپ تولىقتىردى ساكەن كوندۋبايەۆ.
بارلىق ەكونوميكالىق قۇقىق بۇزۋشىلىقتار بويىنشا تۇرعىندار الماتى قالاسى بويىنشا ەكونوميكالىق تەرگەۋ دەپارتامەنتىنە جۇگىنە الادى. سەنىم تەلەفونى: 279-29-56 (قوڭىراۋلار تاۋلىك بويى قابىلدانادى).