الماتى قالاسىندا كوشى-قون زاڭناماسىن بۇزۋ دەرەكتەرىن انىقتاۋعا جانە جولىن كەسۋگە، سونداي-اق شەتەل ازاماتتارىنىڭ زاڭسىز ەڭبەك قىزمەتىنە توسقاۋىل قويۋعا باعىتتالعان رەسپۋبليكالىق "زاڭسىز كەلۋشى" جەدەل-پروفيلاكتيكالىق ءىس-شاراسى باستالدى، - دەپ حابارلايدى Aqshamnews.kz Polisia.kz-كە سىلتەمە جاساپ.
بۇل ءىس-شارا ىشكى ىستەر مينيسترلىگى جاريالاعان پروفيلاكتيكا جىلى اياسىندا جانە مەملەكەت باسشىسى ايقىنداعان "زاڭ مەن ءتارتىپ" قاعيداتىنىڭ اياسىندا جۇزەگە اسىرىلۋدا. تەكسەرۋ بارىسىندا شەتەل ازاماتتارىنىڭ ەلدە بولۋ زاڭدىلىعى، ەڭبەك رۇقساتتارىنىڭ بار-جوعى، سونداي-اق جۇمىس بەرۋشىلەردىڭ كوشى-قون زاڭناماسىنىڭ تالاپتارىن ساقتاۋ ماسەلەلەرىنە ەرەكشە نازار اۋدارىلۋدا.
- بۇل باعىتتاعى پروفيلاكتيكالىق جۇمىس تەك قۇقىق بۇزۋشىلىقتاردى انىقتاۋعا عانا ەمەس، كوشى-قون پروسەسىنە قاتىسۋشىلار اراسىندا قۇقىقتىق سانانى قالىپتاستىرۋعا دا باعىتتالعان. ءبىز شەتەل ازاماتتارىنا قازاقستان رەسپۋبليكاسىنىڭ زاڭدارىن ساقتاۋ قاجەتتىلىگىن تۇسىندىرەمىز، ال جۇمىس بەرۋشىلەرگە – زاڭسىز ەڭبەكتى پايدالانعانى ءۇشىن ولاردىڭ جاۋاپكەرشىلىگىن ەسكەرتەمىز. ەلگە كەلگەن ءاربىر ادام مىنانى ءتۇسىنۋى ءتيىس: ەلدە بولۋ مەن ەڭبەك قىزمەتىنىڭ زاڭدىلىعى – قاۋىپسىزدىك پەن قۇقىقتىق ءتارتىپتىڭ نەگىزى. الماتى – زاڭ ۇستەمدىگى ساقتالاتىن قالا بولىپ قالۋى ءتيىس، – دەدى الماتى قالاسى پد كوشى-قون قىزمەتى باسقارماسىنىڭ باستىعى ەركىن امانتايەۆ.
پوليسيانىڭ مالىمەتىنشە، ءىس-شارانىڭ العاشقى كۇندەرىندە الماتىدا ونداعان زاڭسىز ەڭبەك ەتۋ دەرەگى انىقتالدى. قۇقىق بۇزۋشىلارعا قاتىستى اكىمشىلىك حاتتامالار تولتىرىلىپ، ماتەريالدار سوتقا جولداندى.