ۇلكەندەردىڭ وتاۋ قۇرعان، تانىسقان تاريحىن سۇراساڭ، كوبىنە توي-تومالاقتا، جۇمىس بارىسىندا، تۋىس-تۋعاندار ارقىلى تابىسقان بولىپ شىعادى. راسىمەن، بۇرىنعى كىتاپتىڭ كەيىپكەرلەرى دە پويىزدا، كىتاپحانادا نەمەسە كوشەدە كەزدەيسوق تانىساتىن.
بۇگىنگى تاڭدا ماحابباتتىڭ جولى دا، مەكەنى دە وزگەردى. بۇرىن حات ارقىلى سىرلاسىپ، كەزدەسۋ ساعاتىن تاعاتسىزدانا كۇتكەن جۇپتار ەندى سمارتفوننىڭ ەكرانىنان باستالاتىن سەزىمگە سەنەدى. ءقازىر جۇرەكتەر الەۋمەتتىك جەلىلەردە سوعادى، كوزقاراستار لايك ارقىلى توعىسادى، ال العاشقى «سالەم» دەگەن حابارلاما تاعدىردىڭ جاڭا پاراعىن اشۋى ابدەن مۇمكىن، ءسويتىپ ۆيرتۋالدى بايلانىستىڭ شىنايى ومىردە جالعاسىپ، ماڭگىلىك ماحابباتتىڭ اۋەنىنە اينالعان كەزى كوبەيىپ كەلەدى.
جەلىدە تابىسقان جۇرەكتەردىڭ تاريحى — قازىرگى زاماننىڭ زاماناۋي ەرتەگىسى. ولار قاشىقتىق پەن ۋاقىتقا قاراماي، ءبىرىن-بىرى تىڭداي ءبىلۋ مەن سەنىمنىڭ ارقاسىندا تابىسادى. ءبىراق ەكران ارتىندا دا سەزىمنىڭ شىنايىلىق اتتى ەڭ باستى ولشەمى وزگەرمەءۋى ءتيىس.
تانىسۋ قوسىمشالارى مەن الەۋمەتتىك جەلىلەر تەك قارىم-قاتىناس قۇرالى عانا ەمەس، ماحابباتتىڭ دا مەكەنىنە اينالدى. تالاي جۇپ ءدال وسى ۆيرتۋالدى كەڭىستىكتە تابىسىپ، شىنايى ومىردە وتباسىن قۇرىپ جاتىر. دەگەنمەن، كوپشىلىكتى الدىمەن ويلاندىراتىنى — مۇنداي تانىستىقتىڭ ومىرشەڭدىگى.
«ينتەرنەت – ادامعا ءوز ويىن ەركىن جەتكىزۋگە مۇمكىندىك بەرەدى، ءبىراق سول ەركىندىك كەيدە بەينەنى يدەاليزاسيالاۋعا دا اكەلەدى. ياعني ادام شىن مانىندەگى تۇلعانى ەمەس، ەكراننىڭ ارتىنداعى يدەال بەينەنى ءسۇيىپ قالۋى مۇمكىن. الايدا ونلاين تانىستىقتىڭ ءبارى بىردەي وتكىنشى ەمەس. ەگەر جۇپ ءبىر-بىرىن تەك جازبا ارقىلى ەمەس، ناقتى ومىردە دە تانىپ-بىلۋگە ۇمتىلسا، سەزىم دە، سەنىم دە بەكي تۇسەدى»، – دەيدى پسيحولوگ نۇرلىگۇل ايعان.
ءبىزدىڭ بۇگىنگى كەيىپكەرلەرىمىز — باعلان مەن جانار دا الەۋمەتتىك جەلىدەن باستالعان تانىستىعى ماحابباتقا ۇلاسىپ، شاڭىراق كوتەرگەن جاراسىمدى جۇپ.
«بۇگىنگى زاماندا ماحاببات پەن تاعدىردىڭ توعىسۋ جولدارى سان الۋان. بىرەۋلەر ومىرلىك جارىن ۋنيۆەرسيتەت قابىرعاسىنان تاپسا، ەندى ءبىرى قىزمەت بارىسىندا تانىسادى. ال كەيبىرەۋلەر ءۇشىن باقىتقا باستار جول الەۋمەتتىك جەلىدەن باستاۋ الادى. سولاردىڭ ءبىرى – ءبىزدىڭ حيكايامىز»، دەيدى ولار.
العاشقى تانىستىقتىڭ اسەرى جۇرەكتەن وشپەيدى عوي، اسىرەسە بويجەتكەن ءۇشىن تاعدىرشەشتى تانىستىقتىڭ ماڭىزى زور. جانار دا سەگىز جىلعا شەگىنىس جاساپ، تانىسقان كۇندى ەسىنە ءتۇسىردى:
«2017 جىلى ۆكونتاكتە جەلىسى ارقىلى باستالعان قاراپايىم حات الماسۋ، ۋاقىت وتە جۇرەك جىلۋىن وياتقان ەرەكشە بايلانىسقا اينالادى. بىرنەشە كۇن اڭگىمەلەسكەن سوڭ، جىگىت مەنى كينوعا شاقىرادى. سول كەزدە مەن جۇمىستان كەش، تۇنگى 22:00-دە شىعاتىنمىن. ءبىراق العاشقى كەزدەسۋ نيەتى جەڭىپ، ارىپتەستەرىمنەن ەرتەرەك سۇرانىپ، كەزدەسۋگە باردىم. كەزدەسۋدىڭ مەكەنى – ادك ساۋدا ءۇيى، ال كورسەتىلگەن فيلم – «چەلوۆەك-پاۋك». كينودا وتىرىپ سويلەسكىسى كەلگەن جىگىتكە مەن كۇلىپ: «كينودا سويلەسكەن ءبىرتۇرلى عوي، شىققان سوڭ اڭگىمەلەسەمىز»، – دەدىم. وسى ساتتەگى ىڭعايسىزدىقتى ءالى كۇنگە دەيىن ەسكە الىپ، كۇلىپ وتىرامىز. سول كەشتەن باستاپ ەكەۋمىزدىڭ ارامىز اجىراماستاي بولىپ، اڭگىمە مەن كەزدەسۋلەرگە، سەنىم مەن ساعىنىشقا تولى ماحاببات داستانى باستالدى.
باعلان مەنءى جۇمىستان كەش شىققاندا اركەز كۇتىپ الىپ، ۇيىمە دەيىن شىعارىپ سالاتىن. كەيدە قالتاسىندا كولىككە جەتەر قاراجاتى بولماي قالسا دا، جاياۋ كەلىپ، جاياۋ قايتاتىن. سول ءبىر قاراپايىم، ءبىراق ىستىق كوڭىل مەن قامقورلىقتىڭ ارقاسىندا ماحابباتىمىز نىعايا ءتۇستى. سول جازدا مەن ماگيستراتۋرانىڭ شەتەلدىك تاجىريبەسىنە بايلانىستى ەۆروپاعا كەتتىم. ال جىگىت بولسا، قىزعانىشىن جاسىرا الماي، كۇن سايىن ۋايىمداپ، «كەلگەن سوڭ ۇيلەنەمىز» دەگەندى قايتا-قايتا ايتاتىن. ۋادە ەتكەنىندەي، ەلگە ورالعان سوڭ كوپ ۇزاماي مەنى الىپ قاشتى».
ارينە، ۇناتىپ قالۋ، جاقسى كورۋ دەگەن سەزىمنىڭ ۇلىسى، دەگەنمەن بار نارسەنىڭ تورەشىسى – ۋاقىت. ماحابباتتىڭ دا ۋاقىتتىڭ سىنىنان وتپەي قالاتىن كەزى بولادى. ال باعلان مەن جانار ۋاقىتتىڭ سىنىن دا، تىرشىلىكتىڭ تۇيتكىلىن دە ماحابباتقا جەڭدىرۋگە بولادى دەگەن پىكىردە.
«سودان بەرى سەگىز جىل ءوتتى. بۇگىندە ءبىز – باقىتتى جۇپ، ەكى سۇيكىمدى قىزدىڭ اتا-اناسىمىز. وتكەنگە كوز جۇگىرتسەك، كۇلكى مەن ساعىنىشقا تولى ساتتەردىڭ ءبارى جۇرەگىمىزدە ەرەكشە ەستەلىك بولىپ قالعان. سول ءبىر العاشقى كەزدەسۋ، ىڭعايسىزدانعانىمىزدى جاسىرعان كۇلكىمىز بەن كەشكى سەرۋەندەر – ءبارى بۇگىنگى باقىتقا اپارار جولدىڭ باستاۋى ەكەن. كەيدە جۇرەكتەردى تاعدىر عانا ەمەس، الەۋمەتتىك جەلى دە تابىستىرادى. ءبىراق شىنايى سەزىمدى ساقتاپ قالۋ – تەك ەكى ادامنىڭ نيەتى مەن ماحابباتىنا بايلانىستى. ال ءبىزدىڭ تاريحىمىز سونىڭ ايقىن دالەلى»، دەيدى ماحاببات حيكاياسىن بايانداعان جۇپ.
جوعارىدا جازعانىمىزداي، شىنايىلىق پەن ءوزارا قۇرمەتكە نەگىزدەلسە ينتەرنەت ارقىلى تابىسقان جۇپتاردىڭ وداعى دا بەرىك بولۋى ابدەن مۇمكىن، بۇگىنگى كەيىپكەرلەر وسى سوزىمىزگە دالەل بولا الادى. ويتكەنى ماحابباتتىڭ كۇشى كەزدەسكەن جەردەن ەمەس، جۇرەكتەن باستاۋ الادى.