ۇلتتىق ءبىلىم اكادەمياسى 1921 جىلى ورىنبور قالاسىندا الاش كوشباسشىسى احمەت بايتۇرسىن ۇلىنىڭ باستاماسىمەن قۇرىلعان
الماتى قالاسىندا ى.التىنسارين اتىنداعى ۇلتتىق ءبىلىم اكادەمياسىنىڭ 100 جىلدىق مەرەيتويىنا ارنالعان ءبىرقاتار ءىس-شارا ءوتتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ءىس-شارالارعا ءبىلىم بەرۋ سالاسىنىڭ قۇرمەتتى قىزمەتكەرلەرى، قوعام قايراتكەرلەرى جانە اكادەميادا ۇزاق جىلدار بويى قاجىرلى ەڭبەك ەتىپ، قازاق ءبىلىمىنىڭ دامۋى مەن وركەندەۋىنە ۇلەس قوسقان عالىمدار قاتىستى. مەرەيتويعا ارنالعان ءىس-شارا احمەت بايتۇرسىن ۇلىنىڭ ەسكەرتكىشىنە گۇل شوقتارىن قويۋ جانە الاش زيالىسىنىڭ مۋزەي-ۇيىنە بارۋ راسىمدەرىنەن باستاۋ الدى.
ودان سوڭ اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ عيماراتىندا اكادەميانىڭ 100 جىلدىعىنا ارنالعان كونفەرەنسيا ءوتتى. كونفەرەنسيا اياسىندا اكادەميا دامۋىنىڭ تاريحي اسپەكتىلەرى، قازاقتىڭ كورنەكتى تۇلعالارىنىڭ وعان قوسقان ۇلەسى، سونداي-اق اكادەميانىڭ قازاقستاندىق ءبىلىم بەرۋ جۇيەسىن دامىتۋ مەن قالىپتاستىرۋداعى ءرولى قاراستىرىلدى.
سالتاناتتى ءىس-شارا سوڭىندا اكادەميا پرەزيدەنتى عاني بەيسەمبايەۆ كونفەرەنسياعا قاتىسۋشىلارعا ۇلتتىق ءبىلىم اكادەمياسىنىڭ دامۋى مەن قازاق ءبىلىمىنىڭ وركەندەۋىنە، ءبىلىم بەرۋدىڭ مازمۇنى مەن ادىستەمەسىن جەتىلدىرۋگە سىڭىرگەن ەڭبەكتەرى ءۇشىن العىس حاتتار تابىس ەتتى.
ى.التىنسارين اتىنداعى ۇلتتىق ءبىلىم اكادەمياسى 1921 جىلى ورىنبور قالاسىندا الاش كوشباسشىسى احمەت بايتۇرسىن ۇلىنىڭ باستاماسىمەن قۇرىلعان. اكادەميا ءوز قىزمەتىن 1933 جىلدان بەرى الماتى قالاسىندا جۇزەگە اسىردى، ال 2009 جىلدان باستاپ نۇر-سۇلتان قالاسىندا ورنالاسقان.
اكادەميانىڭ ماقساتى عىلىمي نەگىزدەلگەن وقۋ-ادىستەمەلىك، وزىق يننوۆاسيالىق تەحنولوگيالاردى ازىرلەۋ جانە ەنگىزۋ ارقىلى قازاقستاندىق ءبىلىم-عىلىمدى زامان تالابىنا ساي دامىتۋ بولىپ تابىلادى. وسى ماقساتقا جەتۋ جولىندا اكادەميا جەتەكشى عىلىمي-زەرتتەۋ، ءادىسنامالىق، وقۋ-ادىستەمەلىك، كونسالتينگتىك حاب رەتىندە قالىپتاسۋدا.