قالا اكىمىنىڭ ورىنباسارى ەرجان باباقۇماروۆتىڭ توراعالىعىمەن وتىرىس ءوتىپ، مونيتورينگ جۇرگىزۋ الگوريتمى بەكىتىلدى.
الماتىدا مونيتورينگتىك توپتار ۆاكسينا الماعان قىزمەتكەرلەردى تەكسەرۋدى باستادى. اۋداندىق اكىمدىك وكىلدەرى جانە ءتارتىپ ساقشىلارىنان قۇرالعان بريگادالار الدىمەن ۇجىم سانى 50-دەن جوعارى مەكەمەلەردى باقىلاۋعا الدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ەكپە الۋعا مىندەتتى قىزمەتكەرلەر ءۇشىن ۆاكسينانىڭ قوس كومپونەنتىن سالعىزۋ مەرزىمى 1 قىركۇيەكتە اياقتالدى. وسىعان وراي الماتىدا ءقازىر 40 ءموبيلدى توپ جۇمىلدىرىلعان. قالا اكىمىنىڭ ورىنباسارى ەرجان باباقۇماروۆتىڭ توراعالىعىمەن وتىرىس ءوتىپ، مونيتورينگ جۇرگىزۋ الگوريتمى بەكىتىلدى. شاھارداعى كوروناۆيرۋسقا قارسى ۇجىمدىق يممۋنيتەتى تومەن كاسىپورىنداردىڭ ءتىزىمى دايىندالىپ جاتىر.
الدىمەن ەكپە العان قىزمەتكەرلەردىڭ ءتىزىمى جانە ولاردىڭ ۆاكسينالاۋ قۇجاتتارى تەكسەرىلەدى. ال، جۇمىسشىنىڭ دەنساۋلىعىنا بايلانىستى ۆاكسيناعا قارسى كورسەتىلىمى بولسا، وزىمەن بىرگە مەديسينالىق انىقتاماسى بولۋى قاجەت. سونداي-اق، جۇمىس ورنىنداعى كارانتين تالاپتارىنىڭ ساقتالۋى دا ەسكەرىلەدى.
ونىمەن قوسا، جۇكتى ايەلدەردەن دە ۆاكسينالاۋ قۇجاتى تالاپ ەتىلمەيدى. ال، ەكپە الۋدان باس تارقان قىزمەتكەرلەر ونلاين فورماتتا جۇمىس ىستەۋى كەرەك. ەگەر ءداستۇرلى رەجيمدە قىزمەت ەتكىسى كەلسە، اپتا سايىن ناتيجەسى تەرىس پتر تەستىن تاپسىرىپ وتىرۋى ءتيىس.
مونيتورينگتىك توپ قىزمەتكەردىڭ ۆاكسينا الماعانىن انىقتالسا، جۇمىس بەرۋشى تەك ەسكەرتۋمەن قۇتىلۋى مۇمكىن. ال زاڭبۇزۋشىلىق ەكىنشى رەت قايتالانسا، مەكەمە باسشىسى اكىمشىلىك جازاعا تارتىلادى.
«كاسىپكەرلەرلىك نىسانداردى تەكسەرۋدى باستادىق. تەكسەرۋ بارىسىندا بۇكىل قىزىمەتكەرلەردىڭ ءتىزىمى، ونىڭ ىشىندە ۆاكسينا العاندارى، دارىگەردىڭ انىقتاماسىنا سايكەس بوساتىلعاندار، بۇكىل ءتىزىم بويىنشا تەكسەردىك. بۇل تەكسەرۋ بارىسىندا ەشقانداي زاڭبۇزۋشىلىقتار انىقتالعان جوق»، – دەدى اۋەزوۆ اۋدانى كاسىپكەرلىكتى جانە ونەركاسىپتى دامىتۋ ءبولىمىنىڭ باس مامانى زاكىرجان التىنقوجايەۆ.
بۇگىندە مەگاپوليس ەكپە العان تۇرعىندار سانى بويىنشا رەسپۋبليكادا كوش باستاپ تۇر. مۇندا وسى ۋاقىتقا دەيىن 903 مىڭنان اسا ادام كوۆيدتىك پرەپاراتتىڭ ءبىرىنشى كومپونەنتىن سالدىرعان. ال 725 مىڭداي الماتىلىق تولىق يممۋنيتەت قالىپتاستىردى.