بۇل - اسكەري سالاداعى تەحنولوگيالىق ازىرلەمەلەردىڭ ءبىر بولىگى عانا.
الماتىدا ۇشقىشسىز باسقارىلاتىن قۇرىلعى مەن درونعا قارسى كەشەن تانىستىرىلدى، دەپ حابارلايدى Almaty-akshamy.kz
ۇشقىشسىز باسقارىلاتىن قۇرىلعىلار، درونعا قارسى كەشەندەر جانە ۆيرتۋالدى پوليگوندار – بۇل جۇيەلەر مەن تەحنولوگيالار Digital Almaty-2023 "جاڭا شىنايى سيفرلىق ارىپتەستىك" حالىقارالىق فورۋمى اياسىندا وتكەن كورمەدە تانىستىرىلدى.
كورمەدە ازاماتتىڭ تۇرعىلىقتى جەرىن، اسكەري قىزمەتكە جارامدىلىعىن، دەنساۋلىعىن، وتباسىلىق جاعدايىن جانە تاعى باسقالارىن انىقتاي الاتىن سيفرلى تەحنيكا كەلۋشىلەر نازارىنا ۇسىنىلدى. باعدارلامالىق قامتاماسىز ەتۋ جەرگىلىكتى اسكەري باسقارۋ ورگاندارىن سيفرلىق ترانسفورماسيالاۋ شەڭبەرىندە ازىرلەندى. ءقازىردىڭ وزىندە بۇكىل وڭىردە دەپارتامەنتتەرگە، باسقارمالارعا جانە قورعانىس ىستەرى جونىندەگى بولىمدەرگە ەنگىزىلدى. ودان وزگە بۇل اسكەري كوميسسارياتتارعا ءارتۇرلى مەملەكەتتىك ورگانداردىڭ اسكەري مىندەتتىلەرى تۋرالى مالىمەتتەردى جيناقتاۋعا مۇمكىندىك بەرەدى.
"ۇسىنىلىپ وتىرعان بۇل اقپاراتتىق جۇيە جۇمىلدىرۋ رەسۋرستارىن ەسەپكە الۋدى اۆتوماتتاندىرۋعا مۇمكىندىك بەرەدى. قازىرگى ۋاقىتتا اسكەردەگى كوپتەگەن پروسەستەر اۆتوماتتاندىرىلعان، قاعازباستىلىق قىسقارعان جانە قورعانىس مينيسترلىگىنىڭ ازاماتتارعا قىزمەت كورسەتۋ تۇرلەرى ەداۋىر جەڭىلدەتىلگەن"، – دەدى قورعانىس ءمينيسترىنىڭ سيفرلاندىرۋ جونىندەگى ورىنباسارى دارحان احمەدييەۆ.
كورمەدە اسكەري سالاداعى جوعارى تەحنولوگيالىق وتاندىق ازىرلەمەلەر دە ۇسىنىلدى. Qazdron كومپانياسى راديومەن باسقارىلاتىن ۇشقىشسىز باسقارىلاتىن قۇرىلعىنى، تactical Tech – ۆيرتۋالدى شىنايى تاكتيكالىق جاۋىنگەرلىك ءىس-قيمىلدىڭ ۇدەتكىشى، Kaztechinnovations – درونعا قارسى قولدانىلاتىن كەشەندەردى كورسەتتى.
فورۋم اياسىندا قارۋلى كۇشتەردى سيفرلاندىرۋعا ارنالعان تالقىلاۋ ۇيىمداستىرىلدى. وندا "قازاقستان ينجينيرينگ" ۇك" اق-نىڭ باسقارما ءتوراعاسى تەمىرجان ءابدىراحمانوۆ، تۇركيانىڭ قورعانىس-ونەركاسىپ كەشەنىنىڭ وكىلى زيا يۋسۋف چاموعلى، Elbit Systems C4i & Cyber يزرايلدىك كومپانياسىنىڭ وكىلى ءامىر زەلدنەر جانە Thales Group فرانسۋز كومپانياسىنىڭ ورتالىق ازيا بويىنشا وڭىرلىك ديرەكتورى مارتين ريۆەت دە ساباتيە بايانداما جاسادى.
فورۋمعا قاتىسۋشىلار وسىنداي شارالار IT-تەحنولوگيالار سالاسىنداعى قارىم-قاتىناستى جانداندىرۋعا، عىلىمي تۇرعىدا الماسۋعا ىقپال ەتىپ قانا قويماي، ەلدىڭ اسكەري قاۋىپسىزدىگىن قامتاماسىز ەتۋ مۇمكىندىكتەرىن دە ارتتىرادى دەگەن پىكىرگە كەلدى.