ال ەلىمىز بويىنشا اتالمىش وقۋ ورنى كوش باستاپ تۇر.
الەمنىڭ ەڭ ۇزدىك وقۋ ورىندارى ۆەب-سايتتارىنىڭ حالىقارالىق رەيتينگى – Webometrics Ranking of World Universities-2023 رەيتينگى جاريالاندى، دەپ حابارلايدى Almaty-akshamy.kz.
Webometrics رەيتينگى ۋنيۆەرسيتەت ۆەب-سايتىنىڭ وزەكتىلىگىن جانە زەرتتەۋشى عالىمدارىنىڭ Scopus جانە Google Scholar عىلىمي-مەتريكالىق جۇيەلەرىندەگى جاريالانىمدارىن ەسكەرەتىن بىرىكتىرىلگەن كورسەتكىشكە نەگىزدەلگەن جاھاندىق رەيتينگ.
الەمدىك رەيتينگكە قازاقستان رەسپۋبليكاسىنىڭ 129 ۋنيۆەرسيتەتى قاتىستى. اباي ۋنيۆەرسيتەتى الەمدىك ۋنيۆەرسيتەتتەر اراسىندا رەيتينگتە 1240 ورىنعا كوتەرىلىپ، 3628 ورىندى الادى. Webometrics جاڭا دەرەكتەرىنە سايكەس اباي ۋنيۆەرسيتەتى 5ء-شى ورىندى يەلەنىپ (2022 جىلى شىلدە – 7-ورىن)، ەلىمىزدىڭ توپ-5 ۇزدىك ۋنيۆەرسيتەتتەرىنىڭ قاتارىنا ەندى. پەداگوگيكالىق ءبىلىمنىڭ فلاگمانى – اباي اتىنداعى قازۇپۋ جاقسى ناتيجە كورسەتىپ، قازاقستان رەسپۋبليكاسىنىڭ سالالىق جوعارى وقۋ ورىندارى اراسىندا 1ء-شى ورىندى يەلەندى.
Webometrics عىلىمي جاريالانىمداردى قوسا العاندا، ينتەرنەت كەڭىستىگىندە ۋنيۆەرسيتەتتەردىڭ بولۋىن تالدايدى، ۋنيۆەرسيتەت ۆەب-سايتتارىنىڭ مازمۇنى مەن تانىمالدىلىعىن باعالايدى. Cybermetrics Lab ادىستەمەسىنە سايكەس ۋنيۆەرسيتەتتەردى سارالاۋ الگوريتمى ءۇش كورسەتكىشكە نەگىزدەلگەن: Impact، Openness، Excellence. Impact كورسەتكىشىنىڭ دەرەكتەرى بويىنشا اباي ۋنيۆەرسيتەتى قازاقستاندىق جوعارى وقۋ ورىندارى اراسىندا 2ء-شى ورىندا. اباي اتىنداعى قازۇپۋ سايتى ۇلتتىق جانە حالىقارالىق رەيتينگتەردە دە جوعارى ورىندارعا يە.
اباي اتىنداعى قازۇپۋ-دىڭ جىل سايىنعى جەتىستىكتەرى ونىڭ الەمدىك جوعارى ءبىلىم بەرۋ جۇيەسىندەگى تۇراقتى ورنىن تاعى ءبىر رەت راستايدى. حالىقارالىق رەيتينگتەرگە قاتىسۋ ۋنيۆەرسيتەتتى الەمدىك عىلىمي كەڭىستىكتە ورنالاستىرۋعا، حالىقارالىق ءبىلىم بەرۋ ورتاسىنا كىرۋگە، ءبىلىم بەرۋ جانە عىلىمي-زەرتتەۋ پروسەستەرىن حالىقارالىق ەرەجەلەر مەن ستاندارتتارمەن ۇيلەستىرۋگە، ءبىلىم بەرۋ قىزمەتتەرىنىڭ ساپاسىن ارتتىرۋعا، ءوسۋدىڭ جاڭا جولدارىن تابۋعا مۇمكىندىك بەرەدى.