"اۋىل" پارتياسى ورتالىق اپپاراتى مەن الماتى قالالىق فيليالىنىڭ ۇيىمداستىرۋىمەن قۇرمانعازى اتىنداعى قازاق ۇلتتىق كونسەرۆاتورياسىندا "ۇلتتىق مۋزىكا مۇراسى الەكساندر زاتايەۆيچ زەرتتەۋلەرىندە" اتتى تانىمدىق دارىس-كونسەرت ءوتتى. ءىس-شارانىڭ ماقساتى – قازاق حالقىنىڭ ۇلتتىق مۋزىكا مۇراسىن دارىپتەۋ، ۇلت رۋحانياتىنىڭ دامۋىنا ۇلەس قوسقان تۇلعالاردىڭ ەڭبەگىن جاستارعا كەڭىنەن تانىستىرۋ جانە مۋزىكالىق ونەر ارقىلى پاتريوتتىق سەزىمدى قالىپتاستىرۋ بولدى.
شاراعا مادەنيەت پەن ونەر سالاسىنىڭ وكىلدەرى، جوعارى وقۋ ورىندارىنىڭ ستۋدەنتتەرى، پروفەسسور-وقىتۋشىلار قۇرامى جانە پارتيا مۇشەلەرى قاتىستى. كەش بارىسىندا "اۋىل" پارتياسى ءتوراعاسىنىڭ ورىنباسارى قۋانىش قابىكەن ۇلى سەيتجانوۆ قۇتتىقتاۋ ءسوز سويلەپ، الەكساندر زاتايەۆيچتىڭ ەڭبەكتەرىنىڭ قازاق مادەنيەتى ءۇشىن ماڭىزدىلىعىنا توقتالدى. ول ءوز سوزىندە زاتايەۆيچتىڭ قازاق حالقىنىڭ باي مۋزىكالىق مۇراسىن جيناقتاپ، الەمگە تانىتۋدا ەرەكشە ەڭبەك سىڭىرگەنىن اتاپ ءوتتى. سونداي-اق، پارتيانىڭ مادەني باعىتتاعى باستامالارى مەن ۇلتتىق قۇندىلىقتاردى ساقتاۋ، جاستاردىڭ رۋحاني دامۋىنا جاعداي جاساۋ باعىتىنداعى جۇمىستارىمەن ءبولىستى.
ۆارشاۆا ۋنيۆەرسيتەتىنىڭ دوكتورانتى، قازاق-پولياك بايلانىستارىن زەرتتەۋشى، مۋزىكا زەرتتەۋشىسى كارينبايەۆ جاندوس اۋەلبەك ۇلى الەكساندر زاتايەۆيچتىڭ قازاق حالقىنىڭ فولكلورىن زەرتتەۋ بارىسىندا جيناعان ماتەريالدارى، ولاردىڭ تاريحي، ەتنوگرافيالىق جانە مۋزىكالىق قۇندىلىعى جايىندا ءدارىس جۇرگىزدى. سونىمەن قاتار، زاتايەۆيچ ەڭبەكتەرىنىڭ پولشا مەن قازاقستان اراسىنداعى مادەني بايلانىستاردى نىعايتۋداعى ءرولىن دە ەرەكشە اتاپ ءوتتى.
كەش بارىسىندا قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى حالىق كۇيلەرىن ورىنداپ، ءداستۇرلى اندەر شىرقادى. تىڭدارماندار قازاق مۋزىكاسىنىڭ بايلىعى مەن تەرەڭدىگىن تاعى ءبىر مارتە سەزىندى. كونسەرت بارىسىندا داۋلەتكەرەي، تاتتىمبەت، قۇرمانعازى سياقتى ۇلى كۇيشىلەردىڭ شىعارمالارى ورىندالىپ، ۇلتتىق ونەردىڭ ماڭگىلىك قۇندىلىق ەكەنى ايقىندالدى.
ءىس-شارا سوڭىندا قاتىسۋشىلار ۇلتتىق مادەنيەتتى دارىپتەۋ مەن تاريحي تۇلعالاردىڭ ەڭبەگىن ۇلىقتاۋ باعىتىنداعى وسىنداي تانىمدىق جوبالاردىڭ ماڭىزدىلىعىن اتاپ ءوتتى. "اۋىل" پارتياسى وكىلدەرى الداعى ۋاقىتتا دا مادەنيەت پەن رۋحانيات سالاسىنداعى باستامالاردى قولداپ، ەلدىڭ مادەني دامۋىنا سەرپىن بەرەتىن شارالاردى تۇراقتى تۇردە وتكىزۋدى جالعاستىراتىندارىن جەتكىزدى.
"ۇلتتىق مۋزىكا مۇراسى الەكساندر زاتايەۆيچ زەرتتەۋلەرىندە" اتتى دارىس-كونسەرت قازاق مادەنيەتىنىڭ باي مۇراسىن ناسيحاتتاۋعا، جاستاردىڭ ۇلتتىق سانا-سەزىمىن ارتتىرۋعا جانە حالىق مۋزىكاسىنا دەگەن قۇرمەتتى كۇشەيتۋگە باعىتتالعان تاعىلىمدى ءارى اسەرلى شارا بولدى.