كىتاپحاناشىلار كونۆەنتى، جاس جازۋشىلاردى ماراپاتتاۋ جانە كاسىبي حاكاتون
23 ءساۋىر – قازاقستاندا ۇلتتىق كىتاپ كۇنى. بۇل كۇن كىتاپ وقۋ مەن ادەبي مادەنيەتتى دامىتۋدىڭ ماڭىزدىلىعى ايقىندايتىن مەرەكە بولىپ تابىلادى. الماتىدا وسى كۇنگە وراي كىتاپحانا ءىسىن قولداۋعا، جاستاردىڭ شىعارماشىلىق الەۋەتىن دامىتۋعا جانە كىتاپتى ءبىلىم مەن ءوزىن-وزى دامىتۋدىڭ باستى قۇرالى رەتىندە ناسيحاتتاۋعا باعىتتالعان بىرنەشە ءىرى ءىس-شارا وتەدى، دەپ حابارلايدى aqshamnews.kz
رەسپۋبليكالىق جاستار كىتاپحاناشىلار كونۆەنتى
23 ءساۋىر كۇنى ساعات 14:00-دە الماتى كىتاپحانالارى، قالالىق مادەنيەت باسقارماسى، «عىلىم ورداسى» جانە ق ر ۇلتتىق كىتاپحاناسىنىڭ قولداۋىمەن «ۋاقىت كەڭىستىگىندە ورىن العان كىتاپحانا» اتتى رەسپۋبليكالىق جاستار كىتاپحاناشىلار كونۆەنتى باستالادى. ءىس-شارا ا.پ. چەحوۆ اتىنداعى ورتالىق قالالىق كىتاپحانا، س. بەگالين اتىنداعى ورتالىق قالالىق بالالار كىتاپحاناسى جانە «عىلىم ورداسى» الاڭدارىندا وتەدى.
كونۆەنت ەلىمىزدىڭ تۇكپىر-تۇكپىرىنەن كەلگەن جاس كىتاپحاناشىلاردى بىرىكتىرىپ، تاجىريبە الماسۋ مەن كاسىبي بىلىكتىلىكتى ارتتىرۋ الاڭىنا اينالادى. باعدارلامادا – حالىقارالىق تاجىريبەگە نەگىزدەلگەن تاجىريبەلىك شەبەرلىك دارىستەرى، ترەنينگتەر، كىتاپ قورلارىن سيفرلاندىرۋ جانە قالپىنا كەلتىرۋ بويىنشا تانىستىرۋ پراكتيكۋمدارى بار. سونداي-اق، قاتىسۋشىلار جاستاردى كىتاپحانا مادەنيەتىنە تارتۋ جولدارىن جانە كىتاپحانالاردى جاڭا تەحنولوگيالارعا بەيىمدەۋ ماسەلەلەرىن تالقىلايدى.
كۇن سوڭىندا المالى اۋدانىنىڭ جاستار كوميۋنيتي ورتالىعىنا ەكسكۋرسيا ۇيىمداستىرىلادى، وندا قاتىسۋشىلار وزىنە-وزى قىزمەت كورسەتەتىن اۆتونومدى كىتاپحانانىڭ جۇمىسىمەن تانىسادى. ءىس-شارالارعا قاتىسۋ الدىن الا تىركەلۋ ارقىلى تەگىن.
«الماتىنىڭ جاس جازۋشىسى – 2025» بايقاۋى جەڭىمپازدارىن ماراپاتتاۋ
سول كۇنى، 23 ساۋىردە ساعات 16:00-دە قازاقستان جازۋشىلار وداعىندا «الماتىنىڭ جاس جازۋشىسى – 2025» قالالىق بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى وتەدى. ءىس-شارا قازاق جازۋشىسى ساپارعالي بەگاليننىڭ 130 جىلدىعىنا ارنالعان. بايقاۋ الماتى كىتاپحانالارى، قازاقستان جازۋشىلار وداعى جانە «وركەن» بىرلەستىگىنىڭ ۇيىمداستىرۋىمەن ءوتتى.
بيىل 11-17 جاس ارالىعىنداعى 173 وقۋشى بەگالين شىعارمالارىنداعى كەيىپكەرلەر مەن وقيعالاردان شابىت الىپ، فەنتەزي جانرىندا اڭگىمەلەر ۇسىندى. جۇمىستاردىڭ باعالاۋ كەزىندە ءتۇپنۇسقالىق، ادەبي شەبەرلىك جانە تاقىرىپتى اشۋ دەڭگەيى ەسكەرىلدى. العاش رەت ەڭ جاس قاتىسۋشىلار ءۇشىن «جاس دارىن – 2025» ارنايى نوميناسياسى تاعايىندالدى.
جەڭىمپازدارعا «الماتىنىڭ جاس جازۋشىسى – 2025» اتاعى بەرىلەدى، ال ۇزدىك اڭگىمەلەر ەلەكتروندى جيناققا ەنەدى. سونىمەن قاتار، ۇيىمداستىرۋشىلار تاراپىنان سىيلىقتار مەن شىعارماشىلىق جوبالاردى ودان ءارى سۇيەمەلدەۋ مۇمكىندىگى قاراستىرىلعان.
تۇڭعىش رەسپۋبليكالىق كىتاپحانا حاكاتونى
24 ساۋىردە Alatau Creative Hub ورتالىعىندا جاس كىتاپحاناشىلارعا ارنالعان تۇڭعىش رەسپۋبليكالىق كىتاپحانا حاكاتونى وتەدى. وعان ەلىمىزدىڭ بارلىق وڭىرىنەن كىتاپحانا سالاسىنىڭ ماماندارى قاتىسادى. قاتىسۋشىلار توپپەن جۇمىس ىستەۋ فورماتىندا سيفرلىق سەرۆيستەردى ەنگىزۋدەن باستاپ، جاستاردى كىتاپحاناعا تارتۋعا دەيىنگى سالالىق وزەكتى ماسەلەلەردى شەشۋگە باعىتتالعان جوبالار ازىرلەيدى.
توپتار يدەياسىن مادەنيەت مينيسترلىگى، كىتاپحانا قاۋىمداستىقتارى مەن IT ماماندارىنان قۇرالعان ساراپشىلار القاسىنا تانىستىرادى. ۇزدىك جوبالار ەل كىتاپحانالارىندا جۇزەگە اسىرۋعا ۇسىنىلىپ، اۆتورلارىنا ولاردى ءارى قاراي دامىتۋ ءۇشىن قولداۋ كورسەتىلەدى.
حاكاتون – تەك بايقاۋ ەمەس، سونىمەن قاتار، كىتاپپەن جانە وقىرمانمەن جۇمىس ىستەۋدىڭ جاڭا تاسىلدەرىن دامىتۋ مەن كاسىبي جەلى قۇرۋ الاڭى. قاتىسۋشىلاردى تىركەۋ 15 ساۋىردە اياقتالدى، قاتىسۋ – تەگىن.
وسىلايشا، الماتى ۇلتتىق كىتاپ كۇنى اياسىندا ەلدىڭ كىتاپحانا جانە ادەبي جاستارىن بىرىكتىرىپ، كاسىبي دامۋ، شىعارماشىلىق جانە يننوۆاسيانى توعىستىرعان ورتالىققا اينالادى.
ءىس-شارالار مەن ناتيجەسىن @library.almaty الەۋمەتتىك جەلىدەگى رەسمي پاراقشالارىنان كورۋگە بولادى.