ساۋلەت جانە قالا قۇرىلىسى باسقارماسىنىڭ جانە «قتك» اق تۇرعىن ءۇي پورتالىنىڭ دەرەكتەرى بويىنشا، قالا اۋماعىنداعى 28 تۇرعىن ءۇي قۇرىلىسى نىسانىنا ۇلەسكەرلەردىڭ قاراجاتىن تارتۋعا رۇقسات بەرىلگەن.
ەسكە سالا كەتەيىك، 2025 جىلى ماۋسىمدا «تۇرعىن ءۇي قۇرىلىسىنا ۇلەستىك قاتىسۋ تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزىلدى.
زاڭ بويىنشا مىنا جاعدايدا كوپپاتەرلى جانە جەكە تۇرعىن ۇيلەردى جارنامالاۋعا تىكەلەي تىيىم سالىنادى:
• ەگەر قۇرىلىس سالۋشىدا ۇلەسكەرلەردىڭ قاراجاتىن تارتۋعا رۇقساتى جوق بولسا؛
• بىرەگەي وپەراتوردىڭ كەپىلدىك شارتى جاسالماسا؛
• بانك ارقىلى جوبالىق قارجىلاندىرۋ جۇزەگە اسپاسا.
سونداي-اق، بۇعان دەيىن جوبالىق-سمەتالىق قۇجاتتامانىڭ نەگىزىندە جارناما ورنالاستىرۋعا مۇمكىندىك بەرگەن نورما الىنىپ تاستالدى. بۇل بۇرىن بولعان قۇقىقتىق ولقىلىقتىڭ جولىن كەستى.
بۇدان بولەك، زاڭناماعا «جەكە تۇرعىن ۇيلەر كەشەنى» دەگەن جاڭا ۇعىم ەنگىزىلدى. ەندى مۇنداي نىساندار دا «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭ تالاپتارىنا باعىنادى.
ۇلەسكەرلەردىڭ قاراجاتىن تارتۋعا رۇقسات پەن وزگە دە رۇقسات قۇجاتتارىنىڭ بار-جوعىن تەكسەرۋ ءۇشىن ازاماتتار مىنا بايلانىستارعا جۇگىنە الادى:
* قۇرىلىسقا قاتىستى رۇقسات قۇجاتتارى بويىنشا – قالا قۇرىلىسىن باقىلاۋ باسقارماسىنىڭ انىقتامالىق Call-ورتالىعى:
+7 (705) 896-6000
* ۇلەسكەرلەردىڭ قاراجاتىن تارتۋعا رۇقسات بويىنشا – ساۋلەت جانە قالا قۇرىلىسى باسقارماسى:
+7 (727) 2408000
* «قتك» اق تۇرعىن ءۇي پورتالى – homeportal.kz
قالا قۇرىلىسىن باقىلاۋ باسقارماسى ازاماتتارعا العاشقى نارىقتاعى كۇماندى مامىلەدەن ساقتانۋ ءۇشىن باسپانا ساتىپ الماس بۇرىن قۇرىلىس سالۋشىنىڭ رۇقسات قۇجاتتارىن مۇقيات تەكسەرۋگە كەڭەس بەرەدى.