"قازاقستان - زورلىق-زومبىلىقسىز وتباسى" رەسپۋبليكالىق ناۋقانى اياسىندا الماتى قالاسىنىڭ المالى اۋدانىندا ايەلدەر ىستەرى جانە وتباسىلىق-دەموگرافيالىق ساياسات جونىندەگى اۋداندىق كوميسسيانىڭ وتىرىسى ءوتتى.
جيىن تۇرمىستىق زورلىق-زومبىلىقتىڭ الدىن الۋ، ۆەدومستۆوارالىق ءوزارا ءىس-قيمىل جانە جابىرلەنۋشىلەرگە الەۋمەتتىك كومەك كورسەتۋ ماسەلەلەرىنە ارنالدى، دەپ حابارلايدى aqshamnews.kz. Polisia.kz-كە سىلتەمە جاساپ.
وتىرىسقا پوليسيا، الەۋمەتتىك قىزمەتتەر، ءبىلىم جانە دەنساۋلىق ساقتاۋ سالالارىنىڭ وكىلدەرى، تاجىريبەلى پسيحولوگتار مەن داعدارىس ورتالىقتارىنىڭ ماماندارى قاتىستى. كەزدەسۋ بارىسىندا تۇرمىستىق زورلىق-زومبىلىق قۇرباندارىنا كومەك كورسەتۋدىڭ ءتيىمدى تەتىكتەرىن ازىرلەۋ جانە ءتيىستى قۇرىلىمداردىڭ ۇيلەسىمدى ارەكەتتەرىن قامتاماسىز ەتۋ ماسەلەلەرىنە ەرەكشە نازار اۋدارىلدى. كۇن تارتىبىندە — زورلىق-زومبىلىقتىڭ الدىن الۋ باعدارلامالارىن جۇزەگە اسىرۋ، ۇكىمەتتىك ەمەس ۇيىمداردىڭ ناقتى كومەك كورسەتۋ تاجىريبەلەرى، سونداي-اق حالىق اراسىندا اقپاراتتىق-اعارتۋ جۇمىستارىن كۇشەيتۋ قاجەتتىلىگى قارالدى.
- ءاربىر تۇرمىستىق زورلىق-زومبىلىق جاعدايى جەدەل ارەكەت ەتۋدى تالاپ ەتەدى. پوليسيا الەۋمەتتىك قىزمەتتەرمەن، مەديسينا قىزمەتكەرلەرىمەن، پسيحولوگتارمەن تىعىز بايلانىستا جۇمىس ىستەيدى. ءبىزدىڭ مىندەتىمىز — قيىن جاعدايعا تاپ بولعان ادامدارعا ناقتى قورعاۋ مەن قولداۋ كورسەتۋ. مۇنداي كەزدەسۋلەر كومەك كورسەتۋ الگوريتمىن ناقتى ءارى جەدەل ەتۋگە مۇمكىندىك بەرەدى، — دەدى المالى اۋداندىق پوليسيا باسقارماسىنىڭ باستىعى ماحسات پشان.
جيىن قورىتىندىسى بويىنشا مۇنداي ۆەدومستۆوارالىق كەزدەسۋلەردى تۇراقتى وتكىزۋ، قۇقىقتىق ءتۇسىندىرۋ جۇمىستارىن كەڭەيتۋ، سونداي-اق حالىقتىڭ وسال توپتارىمەن جۇمىس ىستەيتىن ماماندار ءۇشىن وقىتۋ سەمينارلارىن ۇيىمداستىرۋ تۋرالى شەشىم قابىلداندى.