قاتەلىككە بوي الدىرعاندارعا كەشىرىم: جاڭا راقىمشىلىق زاڭى قانداي بولماق؟

قازاقستان كونستيتۋسياسىنىڭ 30 جىلدىعىنا وراي راقىمشىلىق تۋرالى زاڭ جوباسى قارالۋدا

پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كونستيتۋسياسىنا 30 جىل تولۋىنا بايلانىستى راقىمشىلىق جاساۋ تۋرالى» زاڭ جوباسى قارالۋدا. قۇجاتتى پارلامەنتتىڭ ءبىر توپ دەپۋتاتى ازىرلەگەن.

زاڭ جوباسى – قاتەلىك جاساعان، ءبىراق ءوز ىسىنە وكىنىپ، تۇزەلۋ جولىنا تۇسكەن ازاماتتارعا مەملەكەت تاراپىنان جاسالاتىن ىزگىلىك اكتىسى رەتىندە ۇسىنىلىپ وتىر.

جوبا اياسىندا:

         •        قىلمىستىق تەرىس قىلىقتار مەن ونشا اۋىر ەمەس قىلمىستار جاساعان ادامداردى؛

         •        زالال كەلتىرمەگەن نەمەسە ونى تولىق وتەگەن ورتاشا اۋىرلىقتاعى قىلمىستار ءۇشىن سوتتالعانداردى؛

         •        الەۋمەتتىك وسال توپتارعا جاتاتىن، ورتاشا اۋىرلىقتاعى قىلمىس جاساعان ازاماتتاردى بوساتۋ كوزدەلگەن.

سونداي-اق، ونشا اۋىر ەمەس جانە ورتاشا اۋىرلىقتاعى قىلمىستار بويىنشا قوزعالعان، ءبىراق سوتتا قارالماعان ىستەردى توقتاتۋ قاراستىرىلىپ وتىر.

بۇدان بولەك، اۋىر جانە اسا اۋىر قىلمىستار جاساعاندارعا قاتىستى جازا مەرزىمىن قىسقارتۋ مۇمكىندىگى ۇسىنىلادى. سەنىپ تاپسىرىلعان مۇلىكتى يەمدەنگەنى نەمەسە تالان-تاراجعا سالعانى، الاياقتىق جاساعانى ءۇشىن سوتتالعان تۇلعالار زالالدى تولىق وتەگەن جاعدايدا جازا مەرزىمىنىڭ بەستەن ءبىر بولىگى قىسقارتىلۋى مۇمكىن.

سونىمەن قاتار، دەنساۋلىققا قاساقانا زيان كەلتىرۋ، مەملەكەتتىك قۇپيالاردى جاريالاۋ، سىبايلاس جەمقورلىق سياقتى كەيبىر قىلمىستارعا راقىمشىلىق قولدانۋعا شەكتەۋ ەنگىزۋ ۇسىنىلدى.