الماتىدا 2025 جىلدىڭ ءبىرىنشى جارتىجىلدىعىنىڭ قورىتىندىسى بويىنشا كەلگەن تۋريستەردى ورنالاستىرۋ سالاسىندا كورسەتىلگەن قىزمەتتەر كولەمى 50،1 ملرد تەڭگە بولدى، - دەپ حابارلايدى Aqshamnews.kz.
بۇل وتكەن جىلدىڭ وسى كەزەڭىمەن سالىستىرعاندا 16،6% ارتىق. بۇل تۋرالى قالالىق تۋريزم باسقارماسى حابارلادى.
ولاردىڭ دەرەگىنشە، مۇنداي ءوسىم تۋريزم سالاسىنىڭ تۇراقتى دامىپ كەلە جاتقانىن جانە الماتىعا ىشكى ءارى حالىقارالىق تۋريستەر تاراپىنان قىزىعۋشىلىقتىڭ ارتا تۇسكەنىن كورسەتەدى.
الماتىنىڭ تۋريزم باسقارماسى حابارلاعانداي، قالاداعى نومىرلىك قورى وتكەن جىلمەن سالىستىرعاندا 8% ارتىپ، 12 552-گە جەتكەن. مەگاپوليستە 377 ورنالاستىرۋ نىسانى جۇمىس ىستەيدى. بۇل تۋريستەر مەن ىسكەرلىك ساپارداعى قوناقتار ءۇشىن دە جايلى ورنالاسۋعا مۇمكىندىك بەرەدى.
«بۇگىندە الماتى تۋريستىك ورتالىق رەتىندەگى پوزيسياسىن نىعايتىپ كەلەدى. قالاداعى ورنالاستىرۋ ورىندارىنىڭ ءبىر مەزەتتەگى سىيىمدىلىعى 22 768 توسەك-ورىن، بۇل قوناقتاردى كوبىرەك قابىلداۋعا جول اشادى. ىشكى جانە شەتەلدىك تۋريستەر تاراپىنان قىزىعۋشىلىق ارتقانىن بايقاپ وتىرمىز. جاڭا جوبالار جۇمىس ورىندارىن اشىپ، ينفراقۇرىلىمدى جاقسارتىپ، الماتىدا دەمالىستى قولجەتىمدى ءارى جايلى ەتەدى»، – دەپ اتاپ ءوتتى قالالىق تۋريزم باسقارماسى.
بيىل جىل باسىنان بەرى جەكە ينۆەستيسيالار ەسەبىنەن 34 جاڭا تۋريستىك نىسان پايدالانۋعا بەرىلدى. ولاردىڭ ىشىندە 11 قوناق ءۇي، 1 گلەمپينگ، 1 كاپسۋلالىق قوناق ءۇي، 18 حوستەل جانە 3 دەمالىس بازاسى بار. بۇل نىساندار تۋريستەردى جايلى ورنالاستىرۋ مۇمكىندىكتەرىن ەداۋىر كەڭەيتىپ، الماتىنىڭ حالىقارالىق ارەناداعى تارتىمدىلىعىن ارتتىرادى.
بۇعان قوسا، قالا اكىمدىگى جانىنداعى جوبالىق كەڭسە اياسىندا 6 794 نومىرگە ارنالعان 58 قوناق ءۇي قۇرىلىسى جوباسى مەن 35 تۋريستىك نىساننىڭ جوبالاۋ جانە قۇرىلىس جۇمىستارى مونيتورينگ جۇرگىزىلۋدە. بۇل كورسەتكىشتەر سالانىڭ قارقىندى دامۋىن ءارى ۇزاق مەرزىمدى الەۋەتىن كورسەتەدى.
