الماتىلىق توتەنشە جاعدايلار دەپارتامەنتىنىڭ قىزمەتكەرلەرى شىمبۇلاققا اپاراتىن اسپالى جولدان تۋريستەردى قۇتقارۋ امالدارىن پىسىقتادى، دەپ حابارلايدى aqshamnews.kz 24.kz-كە سىلتەمە جاساپ.
«قىس-2024» وقۋ-جاتتىعۋىنىڭ سەنارييى بويىنشا تاۋ-شاڭعى كۋرورتىنا بارا جاتقان كابينا كەنەتتەن توقتاپ قالادى. مۇنداي جاعدايدا قۇتقارۋشىلارعا وتە جىلدام قيمىلداۋعا تۋرا كەلەدى. سەبەبى قاتتى سۋىقتان ىشىندە قالعان ادام ءۇسىپ قالۋى مۇمكىن.
الماتى تاۋلى ايماق بولعاندىقتان، ەكسترەمالدى سپورت تۇرىنە قىزىعۋشىلار كوپ. تاۋعا شاڭعى مەن سنوۋبورد تەبەتىندەر ءجيى كەلەدى. سوندىقتان قۇتقارۋشىلار ءارتۇرلى جاعدايعا دايىن بولۋى ءتيىس.
وقۋ-جاتتىعۋدىڭ ءبىر ءبولىمى رۇقسات ەتىلمەگەن جەرگە كەتىپ قالعان ەكى ءتۋريستى قۇتقارۋعا ارنالدى. شاراعا قالالىق توتەنشە جاعدايلار دەپارتامەنتى، رەسپۋبليكالىق جەدەل-قۇتقارۋ جاساعى، اپاتتىق مەديسينا ورتالىعى، سونداي-اق قالالىق قۇتقارۋ قىزمەتى تارتىلدى. بارلىعى 260 ادام مەن 77 تەحنيكا جۇمىلدىرىلدى.
نۇرلان اتىعايەۆ، قالالىق تجد باستىعى: - ءۇشىنشى نىسان رەتىندە «الماتىجىلۋكوممۋنەنەرگو» سەرىكتەستىگىن تاڭدادىق. ونداعى اۆتونومدى قازاندىقتاردىڭ بىرىندە بولعان اپاتتى قالپىنا كەلتىردىك. كوپقاباتتى تۇرعىن ۇيلەردىڭ جىلۋدان اجىراپ قالماۋىنا جول بەرگەنىمىز جوق. قۇتقارۋشىلاردىڭ بارلىعى ءوز ءىسىن جەتىك مەڭگەرگەن. تەحنيكا دا جەتكىلىكتى. سوندىقتان بارلىعىن بەلگىنگەن ۋاقىتتا اتقارىپ شىقتى.