2024 جىلدىڭ 18 قاراشاسى مەن 25 جەلتوقسانى ارالىعىندا ەلىمىزدىڭ 1 مىڭ ءبىلىم بەرۋ ۇيىمىندا حالىقارالىق PISA زەرتتەۋى جۇرگىزىلۋدە.
وعان 15 جاسقا تولعان 30 مىڭنان استام قازاقستاندىق وقۋشى قاتىسادى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
زەرتتەۋ ءداستۇرلى PISA ءادىسناماسىنا نەگىزدەلگەن جانە وقۋ ساۋاتتىلىعى، ماتەماتيكا، جاراتىلىستانۋ عىلىمدارى سەكىلدى فۋنكسيونالدىق ساۋاتتىلىقتىڭ نەگىزگى داعدىلارىن باعالايدى. سونىمەن قاتار بۇل زەرتتەۋ ارقلى ءبىلىم بەرۋ ۇيىمدارىنا سىرتقى باعالاۋ جۇرگىزىلەدى. ونىڭ ناتيجەلەرى وقۋشىلاردىڭ وقۋ ۇلگەرىمىنە اسەر ەتەتىن نەگىزگى فاكتورلاردى انىقتاۋعا باعىتتالعان.
«مەكتەپتەرگە ارنالعان PISA زەرتتەۋى جىل سايىن جۇزەگە اسىرىلادى جانە ءار مەكتەپ بويىنشا جەكە ەسەپتەر ۇسىنا وتىرىپ، ناتيجەلەردى تالداۋعا مۇمكىندىك بەرەدى. بۇل مەكتەپتەرگە ءبىلىم بەرۋ ساپاسىن ارتتىرۋ باعىتىنداعى ستراتەگيالار مەن باعدارلامالاردى ازىرلەۋدە ماڭىزدى قۇرال بولادى. زەرتتەۋ وقۋ ورىندارىنىڭ كۇشتى جانە ءالسىز جاقتارىن انىقتاپ، قاجەتتى شارالاردى قابىلداۋعا كومەكتەسەدى، وسىلايشا ءبىلىم بەرۋ پروسەسىن جاقسارتۋعا ىقپال ەتەدى»، — دەپ اتاپ ءوتتى ءبىلىم بەرۋ سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى مايرا مەلدەبەكوۆا.
ايتا كەتۋ كەرەك، «مەكتەپتەرگە ارنالعان PISA» زەرتتەۋىن ەكونوميكالىق ىنتىماقتاستىق جانە دامۋ ۇيىمى جۇرگىزەدى. وعان 2021-2023 جىلدار ارالىعىندا ەلىمىزدىڭ 2200 ءبىلىم بەرۋ ۇيىمدارى قاتىستى.