2025 جىلى 17-23 قاراشا ارالىعىندا الماتى قالاسىندا U-15 جانە U-17 جاسوسپىرىمدەر اراسىندا توعىزقۇمالاقتان الەم چەمپيوناتى وتەدى. «زەنيت» سپورت ورتالىعىندا (الماتى ق، ساناتورنايا كوشەسى، 14ا) وتەتىن الەمدىك دوداعا 21 ەلدەن جاس سپورتشىلار قاتىسادى.
چەمپيونات 18 قاراشا كۇنى ساعات 14:00-دە جارىس وتەتىن جەردە سالتاناتتى تۇردە اشىلادى.
توعىزقۇمالاق — كوشپەلى حالىقتاردىڭ ەجەلگى زياتكەرلىك ويىندارىنىڭ ءبىرى، مادەني مۇرا رەتىندە تانىلعان قۇندىلىق. الماتى قالاسى الەم قاۋىمداستىعىنىڭ نازارىن قايتا وزىنە اۋدارماق: توعىزقۇمالاقتىڭ جاس شەبەرلەرى جوعارى دايىندىق دەڭگەيىن جانە ستراتەگيالىق ويلاۋ قابىلەتىن پاش ەتپەك.
جارىس ءۇش فورماتتا وتەدى: كلاسسيكا (ونلاين جانە وفلاين)، راپيد جانە بليس.
قاتىسۋشىلار جەكە جانە كوماندالىق سىندا ب ا ق سىنايدى.
الەم چەمپيوناتى الماتى قالاسى اكىمدىگىنىڭ قولداۋىمەن ۇيىمداستىرىلادى.
ەستەرىڭىزگە سالا كەتسەك، العاشقى الەم چەمپيوناتى 2023 جىلى الماتىدا ءوتىپ، وعان 17 مەملەكەتتەن 136 سپورتشى قاتىسقان بولاتىن. ال بيىل تۋرنير اۋقىمى كەڭەيىپ، 21 ەلدەن 180 جاس ويىنشى قاتىسپاق. ولاردىڭ قاتارىندا ورتا ازيا ەلدەرىمەن قاتار موڭعوليا، پاكىستان، جۇڭگو، ءۇندىستان، گەرمانيا، يتاليا، كورەيا، تۇركيا جانە شىعىس ەۋروپا مەملەكەتتەرىنىڭ سپورتشىلارى بار.
چەمپيونات 22 قاراشا كۇنى ساعات 14:00-دە «زەنيت» سپورت ورتالىعىندا رەسمي تۇردە جابىلادى.