5 ماۋسىم — دۇنيەجۇزىلىك قورشاعان ورتانى قورعاۋ كۇنىنە وراي الماتى مەملەكەتتىك بيزنەس كوللەدجى مەن ىلە الاتاۋ ۇلتتىق تابيعي پاركىنىڭ مەدەۋ فيليالى بىرلەسە وتىرىپ، ەرەكشە فورماتتا ەكولوگيالىق شارا وتكىزدى. «تازا تابيعات» دەپ اتالعان بۇل ءىس-شارا ەكو-كۆەست تۇرىندە ۇيىمداستىرىلىپ، جاستاردىڭ ەكولوگيالىق سانا-سەزىمىن ارتتىرۋدى كوزدەدى.
كۆەستكە 100-گە جۋىق ستۋدەنت، كوللەدج اكىمشىلىگى، وقىتۋشىلار، ورمانشىلار مەن ەكولوگ ماماندار قاتىستى. قاتىسۋشىلار ءتورت كومانداعا ءبولىنىپ، ءتورت ءتۇرلى بەكەتتەن تۇراتىن بايقاۋدا ب ا ق سىناستى. ءار كەزەڭ قورشاعان ورتانى قورعاۋعا باعىتتالعان ناقتى ىس-ارەكەتتەرگە نەگىزدەلدى:
- «جينا — جەڭىسكە جەت» بولىمىندە قاتىسۋشىلار ورمان اۋماعىنان قوقىس جيناپ، تازالىققا ۇلەس قوستى؛
- «ەكو-ۆيكتورينادا» تابيعات پەن ەكولوگياعا قاتىستى سۇراقتارعا جاۋاپ بەردى؛
- «ەكو-سەلفي» بەكەتىندە تابيعات اياسىندا كرەاتيۆتى سۋرەتكە ءتۇسىپ، الەۋمەتتىك جەلىدە ەكوسانا تۋرالى ۇندەۋ جاسادى؛
- «قايتا وڭدە دە جەڭ» تاپسىرماسىندا جينالعان قالدىقتاردى قايتا وڭدەۋ جولدارىن ۇسىندى.
كوماندالار اراسىندا تارتىستى باسەكە ءوتىپ، ۇپايلار ەسەپتەلىپ، جەڭىمپازدارعا گراموتالار مەن باعالى سىيلىقتار تابىستالدى.
ەكولوگيا – ۇلت بولاشاعىنا قىزمەت ەتەتىن قۇندىلىق
ءىس-شارانى اشقان الماتى مەملەكەتتىك بيزنەس كوللەدجىنىڭ ديرەكتورى اينۇر قۋانىش قىزى قورشاعان ورتاعا دەگەن سۇيىسپەنشىلىكتىڭ تاربيەدەن باستالاتىنىن اتاپ ءوتتى.
«تابيعاتتى ايالاۋ — بۇل ءبىر كۇندىك اكسيا ەمەس، كۇندەلىكتى ءومىر سالتىمىزعا اينالۋى ءتيىس. جاستارىمىزدى تەك ءبىلىمدى عانا ەمەس، ەكولوگيالىق ساۋاتتى، سانالى تۇلعا رەتىندە تاربيەلەۋ – ءبىزدىڭ باستى ماقساتىمىز. بۇگىنگى شارا – سونىڭ ناقتى كورىنىسى»، – دەدى ول.
كوللەدجدىڭ تاربيە ءىسى جونىندەگى ورىنباسارى جۇلدىز ءقۇرمانالى دە ستۋدەنتتەردىڭ بەلسەندىلىگىنە ريزاشىلىعىن ءبىلدىرىپ:
«ەكولوگيالىق تاربيەنى قىزىقتى ءارى ەستە قالارلىق فورماتتا وتكىزۋ – ماڭىزدى قادام. كۆەست فورماتى جاستارعا ۇنايدى، ءارى ولار ناقتى ارەكەت ارقىلى تابيعاتپەن بايلانىسىن سەزىنەدى»، – دەدى.
ورمانشىلار ءۇن قوستى: تابيعات – امانات
ىلە الاتاۋ ۇلتتىق تابيعي پاركىنىڭ مەدەۋ فيليالىنىڭ باسشىسى باقتيار نۇرلان ۇلى جاستاردىڭ تابيعاتقا دەگەن جاناشىرلىعىنا وڭ باعا بەردى:
«ءبىز تەك تابيعاتتى قورعاپ قانا قويماي، ونى بولاشاققا امان-ەسەن جەتكىزۋىمىز كەرەك. بۇل ءۇشىن جاستاردىڭ بەلسەندىلىگى اسا ماڭىزدى. وسىنداي باستامالار ارقىلى تابيعاتتى ءسۇيۋ — جاڭا ۇرپاقتىڭ داعدىسىنا اينالادى دەپ سەنەمىز»، – دەدى ول.
فيليال ەكولوگى، شاراعا قاتىسقان اراي قاليبەك قىزى دا ەكولوگيالىق ءبىلىم بەرۋدىڭ ماڭىزىن اتاپ ءوتتى:
«جاستارىمىز تەك تازالاپ قانا قويعان جوق، قالدىقتى قالاي قايتا وڭدەۋگە بولاتىنىن دا ۇسىندى. بۇل — سانالى قوعامنىڭ بەلگىسى. ءبىز تابيعاتقا تۇتىنۋشى ەمەس، سەرىكتەس رەتىندە قاراۋىمىز كەرەك»، – دەپ پىكىر ءبىلدىردى.
پرەزيدەنت توقايەۆتىڭ ۇندەۋىمەن ۇندەس شارا
قازاقستان پرەزيدەنتى قاسىم-جومارت توقايەۆ ءوز جولداۋلارىندا بىرنەشە مارتە قورشاعان ورتانى قورعاۋ ماسەلەسىن باسا ايتقان بولاتىن. ول:
«ەكولوگيانى قورعاۋ — بارشا ازاماتتىڭ باستى مىندەتى. تابيعاتتى ساقتاۋ — كەلەر ۇرپاق الدىنداعى بورىشىمىز» — دەپ اتاپ وتكەن.
«تازا تابيعات» ەكوكۆەستى — وسى ۇندەۋگە بەرىلگەن ناقتى جاۋاپ. ءىس-شارا جاستاردى تابيعاتپەن ۇندەستىككە، ورتاق جاۋاپكەرشىلىككە، ۇجىمدىق جۇمىسقا باۋلىپ، ەكولوگيالىق مادەنيەتتى دامىتۋدىڭ ءساتتى ۇلگىسىنە اينالدى.
