الماتى اكىمى دارحان ساتىبالدى كاسىپكەرلىك جانە ينۆەستيسيالار باسقارماسىنىڭ باسشىسى الىشەر ساتىبالدييەۆتىڭ اتقارىلعان جۇمىستار مەن الداعى جوسپار جونىندەگى ەسەبىن تىڭدادى.
بيىلدىڭ ءتورت ايىنىڭ قورىتىندىسى بويىنشا الماتىدا نەگىزگى كاپيتالعا تارتىلعان ينۆەستيسيا كولەمى 543،3 ملرد تەڭگە بولىپ، 35،6%-عا ارتتى. ينۆەستيسيا قۇرىلىمىندا جەتەكشى ورىندى وڭدەۋ ونەركاسىبى، كولىك جانە قويما، جىلجىمايتىن مۇلىكپەن جاسالاتىن وپەراسيالار، قارجى جانە ساقتاندىرۋ سالالارى يەلەنىپ وتىر.
وسى كەزەڭدە وڭدەۋ ونەركاسىبى 17،6%-عا ءوسىپ، 628،4 ملرد تەڭگەگە جەتتى. جىل سوڭىنا قاراي بۇل كورسەتكىش 22،4%-عا جەتۋى مۇمكىن. اسىرەسە، ماشينا جاساۋ (137،5%)، پوليگرافيا (143%)، تاماق ونەركاسىبى (100،8%) جانە حيميا ونەركاسىبى (117،1%) ەرەكشە سەرپىنمەن دامىپ كەلەدى.
قالادا جالپى قۇنى 2 402،4 ملرد تەڭگە بولاتىن 195 جوبا قولعا الىنعان. بۇل – شامامەن 30 مىڭ جاڭا جۇمىس ورنى.
2025 جىلى قۇنى 555،1 ملرد تەڭگە بولاتىن 45 جوبانى ىسكە قوسۋ جوسپارلانىپ وتىر. ولاردىڭ قاتارىندا «Changan»، «Chery» جانە «Haval» ماركالى جەڭىل اۆتوكولىكتەر شىعاراتىن مۋلتيبرەندتى زاۋىت، «Wildberries» لوگيستيكالىق ورتالىعى، سونداي-اق، شىنى ىدىس پەن ارماتۋرالىق تور وندىرەتىن كاسىپورىن بار.
دارحان ساتىبالدى تۇراقتى ەكونوميكالىق ءوسىمدى قامتاماسىز ەتۋ، ينۆەستيسيا تارتۋ جانە ەكونوميكانىڭ باسىم سالالارىن دامىتۋ بويىنشا جۇمىستى جانداندىرۋدى تاپسىردى.