الماتى قالاسىندا الەۋمەتتىك ماڭىزى بار ازىق-تۇلىك تاۋارلارىنىڭ (ءامات) باعاسىن تۇراقتاندىرۋ تەتىكتەرىن ىسكە اسىرۋ اياسىندا «الماتى» اكك» اق «الاتاۋ-قۇس» كومپانياسىمەن تاۋىق ەتىن (سان ەتى) جەتكىزۋ جانە ساتۋ بويىنشا فورۆاردتىق قارىز شارتىنا قول قويدى. «الاتاۋ-قۇس» 30 فيرمالىق دۇكەنگە 358،8 توننا تاۋىقتىڭ سان ەتىن جەتكىزىپ، قالا تۇرعىندارىنا كەلىسىن 1650 تەڭگەدەن ساتادى. تۇراقتاندىرۋ مەرزىمى - 24 اي. بۇل تۋرالى «الماتى» اكك» وكىلدەرى حابارلادى.
بۇعان دەيىنگى كەلىسىم نەگىزىندە «الاتاۋ-قۇس» كومپانياسى تاۋىقتىڭ سان ەتى مەن جامباسىن تۇرعىندارعا كەلىسىن 1100 تەڭگەدەن ساتىپ وتىر.
سونداي-اق، «الماتى» اكك» جەرگىلىكتى وندىرۋشىلەردەن 4500 توننا قۇمشەكەر ساتىپ الدى. وتاندىق قانت «Magnum»، «Small»، «Toimart»، «ستوليچنىي»، «يۋبيلەينىي» جانە وزگە ساۋدا جەلىلەرىندە 10%-دان اسپايتىن ۇستەماقىمەن ساتىلادى. ءوندىرۋشى بەكىتكەن باعا – كەلىسىنە 405 تەڭگە. تۇراقتاندىرۋ كەلەسى جىلدىڭ قاراشاسىنا دەيىن جالعاسادى.
ايتا كەتەيىك، بيىل ناۋرىز ايىندا «الماتى» اكك» مەن «Magnum Cash&Carry» اراسىندا الەۋمەتتىك ماڭىزى بار 11 ءتۇرلى ازىق-تۇلىك تاۋارىنىڭ باعاسىن تۇراقتاندىرۋعا باعىتتالعان كەلىسىم جاسالعان بولاتىن. جالپى كولەمى – 606 توننا. تىزىمگە قاراقۇمىق جارماسى، ماكارون ونىمدەرى (ولشەنىپ ساتىلاتىن)، كۇرىش، كۇنباعىس مايى، مايلىلىعى 2،5% جۇمساق قاپتاماداعى ايران، مايلىلىعى 72،5% سارى ماي، مايلىلىعى 2،5% پاستەرلەنگەن جۇمساق قاپتاماداعى ءسۇت، تاۋىق ەتى (سان، جامباس)، ءبىرىنشى سۇرىپتى ۇن، سيىر ەتى (جاۋىرىن-كەۋدە بولىگى) جانە اس تۇزى ەندى. باعانى تۇراقتاندىرۋ شارالارى 2026 جىلى ناۋرىزعا دەيىن جالعاسادى.
تاۋىق جۇمىرتقاسىنىڭ قۇنىن تۇراقتاندىرۋ باعىتىندا «سارى-بۇلاق» كومپانياسىمەن 2024 جىلى قازاننان 2027 جىلى قازانعا دەيىن ءبىرىنشى ساناتتاعى 86،4 ملن دانا جۇمىرتقا ءوندىرۋ جانە وتكىزۋ جونىندەگى كەلىسىم جۇزەگە اسىپ وتىر. ءونىم قالاداعى ءىرى ساۋدا جەلىلەرىنە، «الاتاۋ-قۇس» فيرمالىق دۇكەندەرىنە جانە شاعىن دۇكەندەرگە جەتكىزىلەدى. ءوندىرۋشى بەلگىلەگەن باعا – داناسى 51 تەڭگە، ال ساۋدا ورىندارىندا ۇستەماقى 15%-دان اسپاۋعا ءتيىس.
بۇعان قوسا، الماتىدا ءار سەنبى جانە جەكسەنبى كۇندەرى اۋىل شارۋاشىلىعى جارمەڭكەسى وتەدى. بۇل جەرلەردە الەۋمەتتىك ماڭىزى بار ونىمدەر نارىقتاعى باعادان 15-20% تومەن ساۋدالانادى. جارمەڭكە قالانىڭ بەس اۋدانىندا ۇيىمداستىرىلادى:
* المالى اۋدانى — ماسانچي كوشەسى (ايتەكە بي جانە گوگول كوشەلەرىنىڭ اراسى)؛
* المالى اۋدانى — جامبىل مەن اۋەزوۆ كوشەلەرىنىڭ قيىلىسى؛
* اۋەزوۆ اۋدانى — وتەگەن باتىر كوشەسى (اباي داڭعىلىنان تومەن)؛
* بوستاندىق اۋدانى — قازاقفيلم شاعىناۋدانى (ءال-فارابي داڭعىلىنان جوعارى)؛
* مەدەۋ اۋدانى — مەڭدىقۇلوۆ بۋلۆارى – بەكتۇروۆ كوشەسى؛
* جەتىسۋ اۋدانى — قۇلاگەر شاعىناۋدانى، سەرىكوۆ كوشەسى، 2.