الماتىدا "ءقاۋىپسىز جول" جانە "ءجاسوسپىرىم" رەسپۋبليكالىق جەدەل-پروفيلاكتيكالىق ءىس-شارالارى اياسىندا بىرىكتىرىلگەن پوليسيا جاساقتارىنىڭ ءبىرىڭعاي ساپتۇزەۋى ءوتتى.
شاراعا الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆتىڭ ءوزى باسشىلىق ەتتى، دەپ حابارلايدى aqshamnews.kz.
جيىن بارىسىندا مەملەكەت باسشىسىنىڭ "زاڭ جانە ءتارتىپ" قاعيداتى جانە ىشكى ىستەر ءمينيسترى جاريالاعان پروفيلاكتيكا جىلى اياسىنداعى نەگىزگى مىندەتتەر جەكە قۇرامعا ەسكە سالىندى. اسىرەسە جول-كولىك وقيعالارىنىڭ الدىن الۋ، جاسوسپىرىمدەر اراسىنداعى قۇقىق بۇزۋشىلىقتى بولدىرماۋ جانە قوعامدىق قاۋىپسىزدىكتى كۇشەيتۋ ماسەلەلەرىنە ەرەكشە كوڭىل ءبولىندى.
— الماتى پوليسياسى مەملەكەت باسشىسى بەلگىلەگەن باسىم باعىتتاردى باسشىلىققا الا وتىرىپ، جۇمىس ىستەيدى. زاڭ مەن ءتارتىپ – ءبىزدىڭ قىزمەتىمىزدىڭ ىرگەتاسى. ءاربىر ءتارتىپ ساقشىسى ازاماتتاردىڭ قاۋىپسىزدىگىنە تىكەلەي جاۋاپتى. ءوز بورىشىن ادال اتقارىپ جۇرگەن قىزمەتكەرلەرگە العىسىمدى بىلدىرەمىن، — دەدى پد باستىعى ارىستانعاني زاپپاروۆ.
ساپتۇزەۋ كەزىندە قوعامدىق ءتارتىپتى كۇن سايىن قامتاماسىز ەتىپ جۇرگەن پاترۋلدىك پوليسيا مەن وزگە دە قۇرىلىمداردىڭ ۇزدىك قىزمەتكەرلەرى ارنايى ماراپاتتالدى. تاۋلىك بويى تۇرعىنداردىڭ تىنىشتىعىن كۇزەتەتىن ءتارتىپ ساقشىلارىنىڭ بۇل جيىنى — ىشكى ىستەر ورگاندارى جۇرگىزىپ وتىرعان كەشەندى پروفيلاكتيكالىق جۇمىستىڭ ماڭىزدى بولىگىنە اينالدى. سونىمەن قاتار بۇل — پوليسيانىڭ بىرلىگى مەن ەل الدىنداعى جاۋاپكەرشىلىگىنە دەگەن دايىندىقتىڭ كورىنىسى.