ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى ارمان راحيموۆ وكق بريفينگىندە مەگاپوليستە سىبايلاس جەمقورلىق تاۋەكەلدەرىنىڭ كارتاسىن جۇزەگە اسىرۋ بارىسى تۋرالى حابارلادى.
سىبايلاس جەمقورلىق تاۋەكەلدەرىنىڭ الدىن الۋ ءۇشىن كارتادا قۇرىلىس جانە تۇرعىن ءۇي، ەكولوگيا، جەر، كاسىپكەرلىك، ەكونوميكا جانە قارجى، فيسكالدىق، الەۋمەتتىك، ينفراقۇرىلىم جانە جولدار، سەيسميكالىق قاۋىپسىزدىك، جىلۋ ەلەكتر ستانسيالارى، پروبلەمالىق قۇرىلىس وبەكتىلەرى سياقتى 11 نەگىزگى سالالارى انىقتالدى، دەپ حابارلايدى Almaty-akshamy.kz.
«سىبايلاس جەمقورلىق تاۋەكەلدەرىنىڭ كارتاسىن ىسكە اسىرۋ بارىسىندا وسى جىلدىڭ 1 توقسانىندا سەيسمولوگيالىق قاۋىپسىزدىك سالاسىندا سىبايلاس جەمقورلىققا قارسى مونيتورينگ، سونداي-اق دەنساۋلىق ساقتاۋ، سپورت جانە الەۋمەتتىك قامسىزداندىرۋ جۇيەلەرىندەگى سىبايلاس جەمقورلىق تاۋەكەلدەرىنە سىرتقى تالداۋ جۇمىستارى جۇرگىزىلدى»، - دەدى ا. راحيموۆ.
كاسىپكەرلىك سالاسى مەملەكەتتىك ورگاننىڭ ەرەكشە باقىلاۋىندا. «بيزنەسكە جول» جوباسى اياسىندا جىل باسىنان بەرى 4 كاسىپكەردىڭ تۇيتكىلدى ماسەلەسى شەشىمىن تاپتى.
وسىلايشا، سىبايلاس جەمقورلىققا قارسى قىزمەتكە ج ش س وكىلدەرى مەديسينالىق بۇيىمداردى ساتىپ الۋ بويىنشا وتكىزىلگەن تەندەردىڭ قورىتىندىسىنا بايلانىستى شاعىممەن حابارلاستى. مەملەكەتتىك ورگاننىڭ ارالاسۋىنان كەيىن جىبەرىلگەن بۇزۋشىلىقتار ءۇشىن ۇيىمداستىرۋشىنىڭ لاۋازىمدى تۇلعاسى تارتىپتىك جاۋاپكەرشىلىككە تارتىلىپ، شارت بۇزىلىپ، بۇل لوتتار جاڭا تەندەر وتكىزۋ جولىمەن قايتا جاريالاندى.
تاعى ءبىر جاعدايدا سالىق ورگانى تاراپىنان كاسىپكەردىڭ قۇقىعىن بۇزۋ فاكتىلەرى جويىلدى. مەملەكەتتىك كىرىستەر دەپارتامەنتى جەكە كاسىپكەرگە سالىق بەرەشەگىن وتەۋ تۋرالى سەبەپسىز حابارلاما بەردى. سونداي-اق، جەكە كاسىپكەردىڭ بەلسەندى كاسىپكەرلىك قىزمەتىنىڭ توقتاۋىنا اكەلگەن شىعىس وپەراسيالارىن توقتاتۋ تۋرالى حاتتاما شىعاردى. وسى فاكتى بويىنشا ءتيىستى شارالاردى قولدانۋ ناتيجەسىندە جەكە كاسىپكەردىڭ بارلىق بانكتىك شوتتارى بۇعاتتان شىعارىلىپ، نەگىزسىز ەسەپتەلگەن سالىق بەرەشەگى ەسەپتەن شىعارىلدى.
سونىمەن قاتار، پروبلەمالىق قۇرىلىس وبەكتىلەرى سالاسىندا بۇگىندە قالادا تاپسىرۋ مەرزىمى بۇزىلعان جانە ۇرلاۋدىڭ ىقتيمال ءقاۋپى بار 5 الەۋمەتتىك، سپورتتىق جانە كوممۋنالدىق نىساننىڭ قۇرىلىسى قاداعالانۋدا. وتكەن جىلدىڭ قازان ايىنان باستاپ بۇل ۇزاق مەرزىمدى قۇرىلىس نىساندارى باسقارما باقىلاۋىنا الىنعان.
فيسكالدىق سالادا الماتى قالاسى بويىنشا مەملەكەتتىك كىرىستەر دەپارتامەنتىنىڭ كەدەندىك باقىلاۋ باسقارماسىنىڭ ەكى لاۋازىمدى تۇلعاسى اشكەرەلەنىپ، ولار ق ر اقبتك-نىڭ 677-بابى بويىنشا (زاڭسىز ماتەريالدىق سىياقى الۋ) اكىمشىلىك جاۋاپكەرشىلىككە تارتىلىپ، 3 ملن تەڭگە ايىپپۇل سالىندى.
ەكونوميكا جانە قارجى سالاسىندا «ساتىپ الۋدىڭ ءبىرىڭعاي تەرەزەسى» پورتالىنىڭ مونيتورينگى تۇراقتى نەگىزدە جۇزەگە اسىرىلادى. مونيتورينگ ناتيجەلەرى بويىنشا ءى توقساندا 470 ميلليون تەڭگەدەن استام بيۋدجەت قاراجاتىن ۇتىمسىز پايدالانۋدىڭ جولى كەسىلدى.
«قازىرگى ۋاقىتتا اگەنتتىك «دارىلىك زاتتار مەن مەديسينالىق ماقساتتاعى بۇيىمداردى ساراپتاۋ ۇلتتىق ورتالىعى» شجق رمك قىزمەتىندەگى سىبايلاس جەمقورلىق تاۋەكەلدەرىنە سىرتقى تالداۋ جۇرگىزۋدە. ونىڭ بارىسىندا باعانى مەملەكەتتىك رەتتەۋ، دارىلىك زاتتار مەن مەديسينالىق ماقساتتاعى بۇيىمداردى تىركەۋ ماسەلەلەرى، ولاردىڭ ساپاسىنا، تيىمدىلىگىنە جانە قاۋىپسىزدىگىنە قويىلاتىن تالاپتاردى ساراپتاۋ جانە ت.ب. ساراپتامالار جۇرگىزىلەدى»، - دەدى ا. راحيموۆ.
سونداي-اق ول بۇكىل رەسپۋبليكا بويىنشا الەۋمەتتىك قامسىزداندىرۋ سالاسىندا كەشەندى تالداۋ جۇرگىزىلىپ جاتقانىن اتاپ ءوتتى. تالداۋ بارىسىندا بيۋدجەتتى جوسپارلاۋ، جەكە كومەكشىلەر قىزمەتىن قارجىلاندىرۋ، اتاۋلى الەۋمەتتىك كومەكتى تولەۋ، كاسىپتىك وقىتۋعا اقشانى جۇمساۋ، كاسىپكەرلىكتى دامىتۋعا گرانتتاردى ءبولۋ، سونداي-اق ەڭبەكاقى قورىن يگەرۋ ماسەلەلەرى قاراستىرىلادى.
ءسوز سوڭىندا، وكق سپيكەرى مەملەكەتتىك ورگاندار مەن قوعامنىڭ ۋاقتىلى جانە كەلىسىلگەن ارەكەتتەرى ارقىلى عانا سىبايلاس جەمقورلىققا ءتيىمدى قارسى تۇرۋعا بولاتىنىن اتاپ ءوتتى.