قازاقستان رەسپۋبليكاسى مەملەكەتتىك ورتالىق مۋزەيىندە «جاس شەبەر» قولونەر ۇيىرمەسى جۇمىس ىستەپ كەلەدى. وندا بالالارعا ارنالعان ءتۇرلى «شەبەرلىك ساباقتارى» وتەدى.
بۇل جولى «جاس شەبەر» قاتىسۋشىلارى «ناۋرىز مەيرامى» تاقىرىبىندا سۋرەتتەر سالدى.
ونەرگە قۇشتار جەتكىنشەكتەر اكۆارەل جانە گۋاش قولدانا وتىرىپ، مەرەكەنىڭ اسەمدىگىن اق قاعاز بەتىنە ءتۇرلى-تۇستى بوياۋلارمەن ورنەكتەپ جەتكىزۋگە تىرىستى. جاس سۋرەتشىلەردىڭ تۋىندىلارىنان ولاردىڭ جۇرەك ءلۇپىلى، بالعىن قولتاڭباسى، ىزدەنىستەرى سەزىلىپ تۇردى.
ساباق بارىسىندا بالالار «قازاقستان گرافيكاسى» كورمەسىمەن تانىسىپ، وزدەرىنە ۇناعان تۋىندىلارىن كورسەتىپ، اسەرلەرىمەن ءبولىستى. سونداي-اق ولار وتاندىق سۋرەتشىلەردىڭ جۇمىس بارىسىندا قولداناتىن گرافيكا تەحنيكاسى بويىنشا مالىمەتتەر الدى.
«ساباق كەزىندە شىعارماشالىققا جانى قۇمار ورەندەر ناۋرىزدى گرافيكادا بەينەلەدى. ەندى ولار كەلەسى دارىستە كيىز باسۋ ونەرىمەن تانىسىپ، قازاقي ويۋلارمەن اپپليكاسيا – پاننو جاساۋدى ۇيرەنەدى»، – دەيدى ۇيىرمە جەتەكشىسى ايجان قۇربانوۆا.