«الماتى سۋ» شجق كمك سۋ قۇبىرى جانە كارىز جەلىلەرىنىڭ توزۋ دەڭگەيىنىڭ قانشالىقتى تومەندەگەنىن ايتتى
2024 جىلى الماتىدا 543 كم جاڭا سۋ قۇبىرى جانە كارىز جەلىلەرى پايدالانۋعا بەرىلدى. بۇل سۋ قۇبىرى جەلىلەرىنىڭ توزۋىن 52،7%-عا دەيىن، ال كارىز جۇيەسىنىڭ توزۋىن 51،8%-عا دەيىن تومەندەتۋگە مۇمكىندىك بەردى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا «الماتى سۋ» شجق كمك ديرەكتورى ءىلياس قازييەۆ مالىمدەدى، دەپ حابارلايدى aqshamnews.kz
«الماتىدا سۋ جۇيەسىن دامىتۋ جۇمىستارى جالعاسۋدا. جوسپارلانعان ءىرى جوبالاردىڭ ىشىندە مىڭبايەۆ كوشەسى بويىنداعى ماگيسترالدى سۋ قۇبىرىن اۋىستىرۋ، تاۋسامالى (كامەنكا) ىقشاماۋدانىندا ينجەنەرلىك جەلىلەردى تارتۋ، تيميريازيەۆ كوشەسىندە سۋ قۇبىرىن ترانشەياسىز ادىسپەن قايتا قۇرۋ جۇمىستارىن اتاپ وتۋگە بولادى. بۇل 240 مىڭ قالا تۇرعىنىن ساپالى سۋمەن قامتاماسىز ەتۋگە مۇمكىندىك بەرەدى»، – دەدى ءى.قازييەۆ.
سونىمەن قاتار، 2025 جىلى توزىعى جەتكەن 70 كم جەلىنى اۋىستىرۋ، ەكى تازا سۋ رەزەرۆۋارىن سالۋ جانە جوندەۋ، ءتورت سورعى ستانسياسىن جاڭارتۋ جانە 200 دانا سورعى جابدىعىن اۋىستىرۋ جوسپارلانعان.
بيىل اكساي وزەنىندە سۋ تازارتۋ سۇزگى ستانسياسىنىڭ قۇرىلىسى اياقتالادى. بۇل جوبا ناۋرىزباي اۋدانى تۇرعىندارىن ساپالى جانە ۇزدىكسىز اۋىز سۋمەن تولىق قامتاماسىز ەتۋگە مۇمكىندىك بەرەدى.
سونىمەن بىرگە، قالانىڭ باتىس بولىگىندەگى ءوسىپ كەلە جاتقان قاجەتتىلىكتەردى قاناعاتتاندىرۋ ءۇشىن بارلىق توپتىق سۋ قابىلداعىشىنىڭ جوباسى ازىرلەنۋدە. ەرمەنساي ىقشاماۋدانىن سۋمەن قامتاماسىز ەتۋ ءۇشىن الماتى اكىمدىگى «نۇرلىتاۋ» سۋ تازارتۋ ستانسياسىن سالۋ بويىنشا مەردىگەردى انىقتاۋ ءۇشىن كونكۋرس جاريالادى. ستانسيانىڭ قۋاتتىلىعى تاۋلىگىنە 9 مىڭ تەكشە مەتردى قۇرايدى. سونىمەن قاتار، جاڭا تاراتۋ جەلىلەرىنىڭ قۇرىلىسى جۇزەگە اسىرىلىپ، 2026 جىلدىڭ سوڭىنا دەيىن ەرمەنساي جانە نۇرلىتاۋ اۋداندارىنىڭ 22 مىڭنان استام تۇرعىنى ساپالى اۋىز سۋمەن قامتىلادى.
ەرمەنساي تۇرعىندارىنىڭ جاز ايلارىندا سۋدىڭ جەتىسپەۋىمەن بايلانىستى ەڭ وتكىر ماسەلەلەرىن شەشۋ ءۇشىن تج جەلىسى بويىنشا ءال-فارابي داڭعىلىنان ارايلى كوشەسى بويىمەن سۋ قۇبىرىن تارتۋ جۇمىستارى باستالدى. بۇل جوبا بيىلعى جىلى كوشەنىڭ بويىنداعى تۇرعىن ۇيلەر مەن جەكە سەكتوردى جەدەل تۇردە جاڭا سۋ قۇبىرىنا قوسۋعا مۇمكىندىك بەرەدى. كەيىننەن بۇل قۇبىر «نۇرلىتاۋ» سۋ تازارتۋ ستانسياسىمەن بىرىكتىرىلىپ، وسى اۋداندارداعى سۋ جۇيەسىنىڭ سەنىمدىلىگىن ەداۋىر ارتتىرادى.
ەسكە سالايىق، الماتى قالاسىنىڭ اكىمى ەربولات دوسايەۆتىڭ تاپسىرماسىنا سايكەس، 2024 جىلى وڭتۇستىك مەدەۋ اۋدانىنداعى سۋ تاپشىلىعىن جويعان جاڭا رەزەرۆتىك سۋمەن جابدىقتاۋ جۇيەسى ىسكە قوسىلدى. ناتيجەسىندە سامال، كوك-توبە جانە گورنىي گيگانت ىقشاماۋداندارىنىڭ 50 مىڭنان استام تۇرعىنى ءۇشىن سۋ ساپاسى جاقساردى.
كامەنكا پلاتوسىندا تۇراقتى سۋ بەرۋ «بالقاش» ءىرى ينفراقۇرىلىمدىق جوباسى اياسىندا قامتاماسىز ەتىلدى. وسى جوبا شەڭبەرىندە كولساي ىقشاماۋدانىنىڭ تۇرعىندارى ورتالىقتاندىرىلعان سۋ جۇيەسىنە قوسىلدى. 2025 جىلدىڭ سوڭىنا دەيىن سۇلۋساي جانە مۋزتاۋ ىقشاماۋداندارىن سۋمەن جابدىقتاۋ جوبالارى اياقتالادى.
جەلىلەردىڭ توزۋىن ازايتۋ ءۇشىن ۇلكەن جۇمىستار اتقارىلۋدا: 2024 جىلى سامال-1، سامال-2، الماگۇل، وربيتا ىقشاماۋداندارى جانە اۋەزوۆ، مەدەۋ، جەتىسۋ اۋداندارىنىڭ تۇرعىن ءۇي ماسسيۆتەرىن قامتيتىن 32 كم جەلى قايتا قۇرىلىپ، جاڭارتىلدى. بۇل شارالار 40 مىڭ قالا تۇرعىنىن سۋمەن قامتاماسىز ەتۋ ساپاسىن جاقسارتۋعا مۇمكىندىك بەردى.