الماتىدا 17 قاراشا – جىل سايىنعى وتەتىن حالىقارالىق ستۋدەنتتەر كۇنىنە ورايلاستىرىلعان Almaty Student's Week-2025 اپتالىعى باستالدى.
بيىلعى ءىس-شارالار 11–17 قاراشا ارالىعىندا وتۋدە جانە 40 مىڭنان استام ستۋدەنتتى بىرىكتىرىپ، جالپى قامتۋى 100 مىڭ ادامنان اسادى دەپ كۇتىلۋدە. ستۋدەنتتىك اپتالىقتىڭ قالاي ءوتىپ جاتقانى تۋرالى الماتى وڭىرلىك كوممۋنيكاسيالار قىزمەتىنىڭ الاڭىندا قالا جاستار ساياساتى باسقارماسىنىڭ باسشىسى ازيز كاجدەنبەك ايتىپ بەردى، - دەپ حابارلايدى Aqshamnews.kz.
سپيكەردىڭ ايتۋىنشا، الماتى – ءار ءۇشىنشى تۇرعىنى جاس بولىپ سانالاتىن قالا، سوندىقتان ستۋدەنتتىك باستامالاردى دامىتۋ مەگاپوليستىڭ جۇمىسىنىڭ نەگىزگى باعىتتارىنىڭ ءبىرى بولىپ تابىلادى.
«الماتىدا 712 مىڭنان استام جاس تۇرادى، بۇل مەگاپوليس حالقىنىڭ ەداۋىر بولىگىن قۇرايدى. وسىعان بايلانىستى جاستار ساياساتىن دامىتۋ جانە ستۋدەنتتىك باستامالاردى قولداۋ اكىمدىك جۇمىسىنىڭ ماڭىزدى باعىتى رەتىندە قاراستىرىلادى. اتاپ ايتقاندا، الماتى اكىمى دارحان ساتىبالدى قالالىق جاستار باستامالارىنا ۇنەمى نازار اۋدارىپ، ستۋدەنتتەردىڭ شىعارماشىلىق، ازاماتتىق جانە كوشباسشىلىق الەۋەتىن دامىتاتىن فورماتتاردى قولدايدى»، - دەدى ازيز كاجدەنبەك.
سپيكەردىڭ ايتۋىنشا، Student’s Week باعدارلاماسى جاستاردى دامۋ باعىتتارىنىڭ ءارتۇرلى سالالارىنا – قۇقىقتىق مادەنيەت پەن قاۋىپسىزدىكتەن باستاپ يننوۆاسيالار، ۆولونتەرلىك، ەكولوگيا، سپورت، شىعارماشىلىق جانە ينتەللەكتۋالدىق قابىلەتتەرگە دەيىن – كەڭىنەن تارتۋعا باعىتتالعان. اپتا اياسىندا جالپى 150-دەن استام ءىس-شارا وتەدى، ولارعا 40 مىڭنان استام ستۋدەنت قاتىسادى، ال جالپى قامتۋ 100 مىڭ ادامنان اسۋى مۇمكىن.
«Student’s Week اپتالىعى پرەزيدەنت بەلگىلەگەن نەگىزگى يدەولوگەمالارعا نەگىزدەلگەن ىس-شارالارمەن قامتىلعان. بۇل باعىتتار جاستاردىڭ قۇقىقتىق مادەنيەتىن، سيفرلىق داعدىلارىن، ەكولوگيالىق جاۋاپكەرشىلىگىن جانە كرەاتيۆتىك الەۋەتىن دامىتۋعا باعىتتالعان. مۇنداي ءتاسىل ستۋدەنتتەردى فورمالدى تۇردە ەمەس، شىنايى ديالوگ، پراكتيكالىق قىزمەت جانە قالانىڭ قوعامدىق ومىرىنە ناقتى قاتىسۋ ارقىلى تارتۋعا مۇمكىندىك بەرەدى»، - دەدى ازيز كاجدەنبەك.
قالادا زاڭ جانە قۇقىقتىق سانا تاقىرىبىنداعى TEDx-سەمينارى، جاساندى ينتەللەكت پەن كرەاتيۆتى يندۋستريالارعا ارنالعان ماستەر-كلاستار، «تازا Student Campus» ەكولوگيالىق اكسياسى، StudSport ستۋدەنتتىك سپورتتىق جارىستارى، «كەشكى ساز» شىعارماشىلىق اكۋستيكالىق كەشى جانە Jas IQ ينتەللەكتۋالدىق ويىنى ءوتتى. اپتانىڭ سوڭعى كۇنى ەڭ بەلسەندى ستۋدەنتتەر ماراپاتتالاتىن Jana Béles فەستيۆالىنىڭ فينالىنا، سونداي-اق جىل سايىن جوعارى وقۋ ورىندارىنىڭ مىقتى كوماندالارىن جينايتىن «Student Life» جايدارمان ستۋدەنتتىك ويىنىنا ارنالادى.
«Student’s Week ورتاق جاستار كەڭىستىگىن قالىپتاستىرادى، وندا ءاربىر ستۋدەنت ءوز ماڭىزدىلىعىن سەزىنىپ، ءوزىن-وزى دامىتۋعا ناقتى مۇمكىندىكتەردى كورە الادى. بۇل جوبا ستۋدەنتتىك قاۋىمداستىقتى نىعايتىپ، جاستاردىڭ ءوز الەۋەتىن اشۋىنا، كوزقاراسى بىردەي دوستار تابۋىنا جانە الماتىنىڭ بەلسەندى جاستار ەكوجۇيەسىنىڭ ءبىر بولىگى بولۋىنا جاعداي جاسايدى»، - دەپ اتاپ ءوتتى سپيكەر.
ايتا كەتەيىك، جىل سايىن ۇيىمداستىرىلاتىن Almaty Student’s Week جوباسى جوعارى وقۋ ورىندارى اراسىنداعى ءوزارا بايلانىستاردى كۇشەيتىپ، ستۋدەنتتەردىڭ كوشباسشىلىق جانە شىعارماشىلىق قۇزىرەتتەرىن دامىتادى، ازاماتتىق جاۋاپكەرشىلىك مادەنيەتىن قالىپتاستىرادى جانە قالا جاستارىنىڭ باستاماشىلدىعىن قولدايدى.