ءماجىلىس دەپۋتاتتارىنىڭ ساۋالىنا بەرگەن جاۋابىندا پرەمەر-مينيستردىڭ ورىنباسارى سەرىك جۇمانعارين ەلىمىزدە سالاۋاتتى ءومىر سالتىن ناسيحاتتاۋ باعىتىندا ءبىرقاتار ماڭىزدى شارالار قولعا الىنعانىن اڭعارتتى، - دەپ حابارلايدى Aqshamnews.kz.
"كەيىنگى جىلدارى دەنساۋلىق ساقتاۋ مينيسترلىگى دۇرىس تاماقتانۋ، جاستار دەنساۋلىق ورتالىقتارىن دامىتۋ، تەمەكى مەن الكوگول تۇتىنۋدى ازايتۋ، دەنە بەلسەندىلىگىن ارتتىرۋ جانە سالاۋاتتى ءومىر سالتىن اقپاراتتىق ناسيحاتتاۋ بويىنشا كەشەندى جول كارتالارىن ىسكە اسىرىپ جاتىر، - دەدى ۆيسە-پرەمەر.
سونىمەن قاتار، ول ءبىرقاتار زاڭنامالىق باستامالاردى اتاپ ءوتتى:
- 21 جاسقا دەيىنگى ازاماتتارعا ەنەرگەتيكالىق سۋسىنداردى ساتۋعا تىيىم سالۋ؛
- ۆەيپ ونىمدەرىن اكەلۋگە جانە ساتۋعا شەكتەۋ قويۋ؛
- تەمەكى مەن الكوگول تۇتىنۋدى ازايتۋ شارالارىن بەكىتۋ؛
- ەنەرگەتيكالىق سۋسىندارعا العاش رەت اكسيز ەنگىزۋ؛
- مەكتەپ تاعامى ستاندارتتارىن جاڭارتۋ.
سەرىك ءجۇمانعاريننىڭ مالىمەتىنشە، 21 جاسقا تولماعاندارعا ەنەرگەتيكالىق سۋسىنداردى ساتاتىندارعا اكىمشىلىك جاۋاپكەرشىلىك ەنگىزۋ جۇمىستارى ءجۇرىپ جاتىر.
ايتا كەتەيىك، 2025 جىلدىڭ قاڭتارىنان باستاپ "حالىق دەنساۋلىعى جانە دەنساۋلىق ساقتاۋ جۇيەسى تۋرالى»" كودەكسكە ەنگىزىلگەن تۇزەتۋلەر كۇشىنە ەندى، وعان سايكەس 21 جاسقا تولماعان ازاماتتارعا ەنەرگەتيكالىق سۋسىنداردى ساتۋ قاتاڭ تىيىم سالىنعان.