الماتىدا سوعىس ارداگەرىن عاسىرلىق مەرەيتويىمەن قۇتتىقتادى

ۇلى وتان سوعىسىنىڭ قاتىسۋشىسى نينا افاناسيەۆنا كرىلوۆا بۇگىن ءجۇز جاسقا تولدى

عاسىر جاساعان كەيۋانانى قۇتتىقتاۋعا قورعانىس ىستەرى جونىندەگى باسقارماسىنىڭ اسكەري قىزمەتشىلەرى، الماتى قالاسى تۇركسىب اۋدانى اكىمدىگىنىڭ، دەسانتتىق-شابۋىلداۋ اسكەرلەرىنىڭ اسكەري ءبولىمىنىڭ وكىلدەرى، اۋعان سوعىسىنىڭ ارداگەرلەرى مەن «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى دە كەلدى، دەپ حابارلايدى Almaty-akshamy.kz.

– نينا افاناسيەۆنا – بالاۋسا شاعى مەن جاستىعى ۇلى وتان سوعىسىمەن تۇسپا-تۇس كەلگەن ۇرپاقتىڭ وكىلى. تالاي اۋىرتپاشىلىق مەن سىناقتاردان ءوتىپ، امان قالىپ، جەڭىسكە جەتكەن ادامداردىڭ رۋحىنىڭ مىقتىلىعىنا تاڭ قالاسىڭ، – دەدى تۇركسىب اۋدانى قورعانىس ىستەرى جونىندەگى باسقارماسىنىڭ باستىعى پولكوۆنيك سامات توعانبايەۆ.

نينا كرىلوۆا ماسكەۋ وبلىسىنىڭ يازۆيسى اۋىلىندا دۇنيەگە كەلگەن. جەتى جىلدىق مەكتەپ پەن يندۋستريالدى تەحنيكۋمدى بىتىرگەننەن كەيىن ماماندىعى بويىنشا جۇمىس ىستەگىسى كەلدى. الايدا سۇراپىل سوعىس ونىڭ جوسپارلارىن تۇبەگەيلى وزگەرتتى. كوپتەگەن قۇرداستارى سەكىلدى جاس قىز ەل قورعاۋشىلارىنىڭ قاتارىنا قوسىلدى.

باتىس مايدانعا اتتانعان قىز 329 زەنيتتىك ارتيللەريا جانە 8 زەنيتتىك-پروجەكتورلىق پولك قۇرامىنداعى اۋە شابۋىلىنا قارسى قورعانىس اسكەرلەرىندە بولدى. 

قىزىلاسكەرلىك كرىلوۆانىڭ العان ماماندىعى دا سيرەك كەزدەسەتىن ەدى. جاۋدىڭ ۇشاقتارىنىڭ دىبىسىن الدىن الا انىقتاۋ جۇمىسىنا ەستۋ قابىلەتى وتە جوعارى ادامدار تارتىلدى. ءار ءتۇرلى كولەمدەگى قۇبىرلار جۇيەسىنىڭ كومەگىمەن ەستۋشى ماماندىعىن مەڭگەرگەندەر جاۋ ۇشاعىنىڭ دىبىستارىن بايقاۋعا تىرىسىپ، كەڭىستىكتى تىڭدادى. دىبىستى انىقتاعان سوڭ وبەكت جەردەن جارىقتىڭ كومەگىمەن بەلگى بەرىپ، وعان وق جاۋدىراتىن. ءبىر قىزىعى، ەستىگىش ماماندار، ءتىپتى ۇشاقتىڭ ءتۇرى مەن ۇشۋ بيىكتىگىن دە اجىراتا العان دەسەدى.

سوعىستان كەيىن نينا كرىلوۆا ماسكەۋ پەدۋچيليششەسىندە تاربيەشى ماماندىعىن وقىدى. 1946 جىلى كۇيەۋگە شىقتى. جۇبايى قازاقستاندىق بولعان سوڭ، ولار ءوز وتانىنا كەلدى. وتباسىندا ەكى بالا دۇنيەگە كەلدى.

جيىرما جىلدان استام ۋاقىتىن ول مەكتەپ جاسىنا دەيىنگى بالالاردى تاربيەلەۋگە ارنادى. 1977 جىلى ول بالاباقشا مەڭگەرۋشىسى قىزمەتىنەن قۇرمەتتى دەمالىسقا شىقتى.

قازىرگى ۋاقىتتا نينا افاناسيەۆنا نەمەرەسىنىڭ وتباسىمەن تۇرادى. بۇگىنگى ۇرپاق ءۇشىن ارداگەرمەن كەزدەسۋ وتە ماڭىزدى، ويتكەنى نينا كرىلوۆا سوعىستىڭ كۋاگەرى عانا ەمەس، جىل سايىن قاتار سيرەپ بارا جاتقان ۇلى وتان سوعىسىنىڭ كوزى ءتىرى ارداگەرى.

قوناقتار مەرەيتوي يەسىن قۇتتىقتاپ، ونىڭ جاۋىنگەرلىك جولىنا جانە جاۋمەن كۇرەسۋگە كومەكتەسكەن سيرەك كەزدەسەتىن ماماندىعىنا قىزىعۋشىلىق تانىتتى.  سونداي-اق جاڭا عاسىرعا قادام باسقان ادامنىڭ جان دۇنيەسىنىڭ مىقتىلىعىنا تاڭ قالدى.