الماتى ءماسليحاتىنىڭ كەزەكتەن تىس سەسسياسىندا ورفاندىق پاتولوگياسى بار تۇرعىنداردى دارىمەن قامتاماسىز ەتۋ ماقساتىندا اۋرۋلار مەن دارىلىك پرەپاراتتار ءتىزىمىن كەڭەيتۋ تۋرالى شەشىم قولداۋ تاپتى. بۇل جايت سوڭعى جىلدارى مۇنداي جاعدايدىڭ كۇرت ارتۋىنا بايلانىستى قارالىپ وتىر.
الماتى قالاسىنىڭ قوعامدىق دەنساۋلىق ساقتاۋ باسقارماسىن ۋاقىتشا باسقاراتىن ءلايلا يمانعالييەۆا بۇل ۇدەرىستىڭ بۇرىن-سوڭدى بولماعان قارقىنمەن ءوسىپ وتىرعانىن اتاپ ءوتتى:
«2017 جىلى سيرەك دياگنوزى بار نەبارى 140 پاسيەنت بولسا، بۇگىندە ولاردىڭ سانى 4 287-گە جەتتى».
سوندىقتان تىرشىلىك ءۇشىن ماڭىزدى پرەپاراتتار ءتىزىمىن كەڭەيتۋ – جاي عانا قولداۋ شاراسى ەمەس، زاماناۋي دارىلەرگە مۇقتاج تۇرعىنداردىڭ ءومىر ساپاسىن ساقتاۋ ءۇشىن ماڭىزدى قادام بولىپ وتىر.
«كوپ جاعدايدا بۇل – اۋرۋدى باقىلاپ، ەڭبەككە قابىلەتتىلىكتى ساقتاۋدىڭ ءارى مۇگەدەكتىككە اكەلەتىن اسقىنۋلاردىڭ الدىن الۋدىڭ جالعىز جولى»، – دەدى ءلايلا يمانعالييەۆا.
قابىلدانعان شەشىمنىڭ ماڭىزدى تۇسى – تىزىمگە ەنگىزىلگەن ءاربىر پرەپارات ناقتى پاسيەنتتەردىڭ مەديسينالىق قاجەتتىلىگىنە نەگىزدەلگەن.
«ءاربىر ساننىڭ ارتىندا قيىن جاعدايدا قالعان ناقتى ادامدار مەن ولاردىڭ وتباسىلارى تۇر. ءبىز ولاردى ەمدەۋگە قولجەتىمدىلىكپەن قامتاماسىز ەتۋىمىز كەرەك»، – دەدى باسقارما وكىلى.
قولداۋ شارالارى اۋىر اۋتويممۋندىق، نيەۆرولوگيالىق جانە گاستروەنتەرولوگيالىق دياگنوزى بار قالا تۇرعىندارىن دا قامتيدى. بۇل ساناتتاعى پاسيەنتتەرگە جاڭا بۋىنداعى يننوۆاسيالىق دارىلەر قاجەت.
دەپۋتاتتار ماقۇلداعان قارجىلاندىرۋدىڭ نەگىزگى ماقساتى – دەنساۋلىعى قىمبات ءارى قولجەتىمدىلىگى كۇردەلى پرەپاراتتارعا تىكەلەي تاۋەلدى ناۋقاستاردى تۇراقتى دارىلىك تەراپيامەن قامتاماسىز ەتۋ.
ءلايلا يمانعالييەۆانىڭ ايتۋىنشا، بۇل شەشىم كورۋ قابىلەتىنىڭ جوعالۋىن، اۋىر نيەۆرولوگيالىق اسقىنۋلاردى، جۇيەلى اۋرۋلاردىڭ ءورشۋىن، سونداي-اق سيرەك پاتولوگياسى بار بالالاردا تۇراقتى پارەنتەرالدى قورەكتەنۋ قاجەتتىلىگىن بولدىرماۋعا مۇمكىندىك بەرەدى. قابىلدانعان شارالار مەگاپوليستە ەمدى ۇزدىكسىز جۇرگىزۋگە جانە الەۋمەتتىك قولداۋ جۇيەسىن ودان ءارى نىعايتۋعا جاعداي جاسايدى.