جىلدان-جىلعا گەندىك اۋرۋلاردى انىقتاۋ جاقسارىپ كەلەدى
الماتىدا پەدياتريا جانە بالالار حيرۋرگياسى عىلىمي ورتالىعىنىڭ پۋلمونولوگيا ءبولىمىنىڭ 60 جىلدىعى اياسىندا «مۋكوۆيسيدوزبەن اۋىراتىن ناۋقاستاردى دياگنوستيكالاۋدىڭ، ەمدەۋدىڭ جانە وڭالتۋدىڭ زاماناۋي اسپەكتىلەرى» تاقىرىبىندا شەبەرلىك ساعاتى ءوتتى، دەپ حابارلايدى Almaty-akshamy.kz.
پەدياتريا جانە بالالار حيرۋرگياسى عىلىمي ورتالىعى مەن ق ر پەدياترلار وداعىنىڭ ۇيىمداستىرۋىمەن وتكەن شاراعا ەلىمىزدىڭ ءار وڭىرىنەن 80-نەن اسا ماماندار: پۋلمونولوگتار، پەدياترلار، ديەتولوگتار، گاستروەنتەرولوگتار، فيزيوتەراپيەۆت-دارىگەرلەر، رەزيدەنتتەر، مەديسينالىق جوو ستۋدەنتتەرى، سونىمەن قاتار، قازاقستان رەسپۋبليكاسىنىڭ بارلىق ايماقتارىنان سيرەك (ورفاندىق) اۋرۋلار بويىنشا وڭىرلىك ۇيلەستىرۋشىلەرى مەن ءار وبلىستىڭ دەنساۋلىق ساقتاۋ باسقارمالارىنىڭ وكىلدەرى قاتىستى.
شارانى وتكىزۋدەگى باستى ماقسات – ق ر دارىگەرلەرىنىڭ بىلىكتىلىگىن ارتتىرۋ، تاجىريبە الماسۋ جانە مەديسينالىق قوعامداستىقتى مۋكوۆيسيدوز ماسەلەلەرىنە نازار اۋدارتۋ.
مۋكوۆيسيدوز - بۇل سىرتقى سەكرەسيا بەزدەرىنىڭ، سونداي-اق ومىرلىك ماڭىزدى مۇشەلەر مەن جۇيەلەردىڭ: تىنىس الۋ جولدارىنىڭ، اسقازان-ىشەك جولدارىنىڭ، ۇيقى بەزىنىڭ، باۋىردىڭ، سىلەكەي جانە تەر بەزدەرىنىڭ جانە رەپرودۋكتيۆتى جۇيەسىنىڭ زاقىمدالۋىمەن سيپاتتالاتىن مۋلتيجۇيەلى، تۇقىم قۋالايتىن، ومىرگە ءقاۋىپ توندىرەتىن اۋرۋ.
شەبەرلىك ساعاتتى رەسەيدىڭ جەتەكشى دارىگەرلەرى: م.ع.د.، پروفەسسور، «ن.پ.بوچكوۆ اتىنداعى مگعو» ءفمبعم-نىڭ گەنەتيكالىق ەپيدەميولوگيا زەرتحاناسىنىڭ باس عىلىمي قىزمەتكەرى ناتاليا كاشيرسكايا، رەسەي دەنساۋلىق ساقتاۋ مينيسترلىگىنىڭ «ۇلتتىق مەديسينالىق بالالار دەنساۋلىعىن زەرتتەۋ ورتالىعى» فمام-نىڭ بىلىكتى ماماندارى: م.ع.د.، مولەكۋلالىق ميكروبيولوگيا زەرتحاناسىنىڭ مەڭگەرۋشىسى، ميكروبيولوگ اننا لازاريەۆا، م.ع.د.، پروفەسسور، جوعارى ساناتتى پۋلمونولوگ دارىگەر، پۋلمونولوگيا ءبولىمىنىڭ مەڭگەرۋشىسى ولگا سيمونوۆا، م.ع.ك.، پەدياتر، نۋتريسيولوگ يننا سوكولوۆ، م.ع.د.، ەندوسكوپيالىق زەرتتەۋلەر ءبولىمىنىڭ مەڭگەرۋشىسى ماكسيم لوحماتوۆ وتكىزدى.
ءىس-شارانىڭ اشىلۋىندا پەدياتريا جانە بالالار حيرۋرگياسى عىلىمي ورتالىعىنىڭ ديرەكتورلار كەڭەسىنىڭ ءتورايىمى ماريام وماروۆا مۋكوۆيسيدوزعا ارنالعان شەبەرلىك ساعاتى ءبىزدىڭ ەلىمىزدەگى كۇردەلى اۋرۋلاردىڭ ءبىرى سانالاتىن دەرتتى دياگنوستيكالاۋ، ەمدەۋ جانە وڭالتۋدى جاقسارتۋدا تاعى ءبىر قادام جاساۋعا مۇمكىندىك بەرەتىنىن اتاپ ءوتتى.
«بۇگىنگى شارا ورتالىقتىڭ پۋلمونولوگيا ءبولىمىنىڭ 60 جىلدىق مەرەيتويىنا ارنالۋىمەن ماڭىزدى. ءبولىمنىڭ قۇرىلۋى مەن دامۋىنا اكادەميك كامال ءسارۋار ۇلى ورمانتايەۆ، پروف. وماروۆا كۇلان ومار قىزى، پروف. بايجانوۆا مۋنيرا ماييەۆنا جانە باسقا دا ماماندار ۇلكەن ۇلەس قوستى. پۋلمونولوگيا ءبولىمىنىڭ ءبىرىنشى مەڭگەرۋشىسى تەن ولگا دەنيسوۆنا بولدى. بولىمدە قۇرىلعاننان بەرى مۋكوۆيسيدوزبەن اۋىراتىن بالالارعا ەرەكشە كوڭىل بولىنەدى. جىلدان-جىلعا گەندىك اۋرۋلاردى انىقتاۋ جاقسارىپ كەلەدى. جاڭا ەمدەۋ تەحنولوگيالارىن ەنگىزۋدىڭ ارقاسىندا ناۋقاستاردىڭ ءومىر ءسۇرۋ ساپاسى جاقسارىپ، ءومىر ءسۇرۋ ۇزاقتىعى ارتتى. ەگەر بۇرىن مۋكوۆيسيدوزدى بالالىق شاق كەزدەگى اۋرۋ دەپ سانالسا، قازىرگى تاڭدا بۇل دەرتكە شالدىققان بالالار ەرەسەك جاسقا جەتىپ، ءومىر جاستارى ۇزارۋدا»، - دەپ اتاپ ءوتتى ماريام وماروۆا.
جىل سايىن اۋرۋحانادا ءارتۇرلى برونح-وكپە پاتولوگياسى بار 600-دەن استام بالاعا كومەك كورسەتىلەدى، 200-دەن استام تەلەمەديسينالىق كەڭەستەر جۇرگىزىلەدى. ماماندار ەلىمىزدىڭ بارلىق ايماعىندا شەبەرلىك ساباقتار، مەديسينالىق، كونسۋلتاتيۆتىك، ادىستەمەلىك كومەك كورسەتىپ كەلەدى.