مەشىتتە ادام كوپ بولعان
پاكىستاننىڭ پەشاۆار قالاسىندا (اۋعانستانمەن شەكاراعا جاقىن حايبەر-پاحتۋنحۆا سولتۇستىك-باتىس پروۆينسياسى) مەشىتتە بولعان جارىلىس سالدارىنان مەرت بولعانداردىڭ دەنى – كۇش قۇرىلىمدارىنىڭ قىزمەتكەرلەرى. بۇل تۋرالى پاكىستان ىشكى ىستەر مينيسترلىگىنىڭ باسشىسى رانا ساناۋللا ۇلتتىق جيىن الدىندا مالىمدەدى. ول ARIA News تەلەارناسىنان كورسەتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تەراكت سالدارىنان 97 پوليسەي مەن 3 قاراپايىم ازامات قازا تاپتى»، - دەدى ساناۋللا.
پەشاۆارا قالاسىندا دۇيسەنبى كۇنى بولعان جارىلىستان مەرت بولعاندار سانى 100-گە جەتىپ، جاراقات العاندار 200-دەن استى.
ۇلتتىق قاۋىپسىزدىك ورگانى قىزمەتكەرلەرىنىڭ اقپاراتىنا سايكەس، جانكەشتى لاڭكەس جارىلعىش زاتتى مەشىتكە بەسىن نامازى كەزىندە ىسكە قوسقان. سول ساتتە مەشىتتە ادام كوپ بولعان، ونىڭ ىشىندە پوليسيا قىزمەتكەرلەرى مەن اسكەريلەر بار.
بۇعان دەيىن حابارلانعانداي، لەدي رەدينگ اتىنداعى پەشاۆار اۋرۋحاناسىندا توتەنشە جاعداي جاريالاندى – وندا جاراقات العاندار كوپتەپ ءتۇسىپ جاتىر، كوبىنىڭ جاعدايى اۋىر، مەديسينا قىزمەتكەرلەرى دونورلاردان قان تاپسىرۋدى سۇرايدى.
قازاقستان پرەزيدەنتى قاسىم-جومارت توقايەۆ پاكىستان پرەزيدەنتى اريف الۆي مەن پرەمەر-مينيسترى شاحباز شاريفكە كوڭىل ايتۋ جەدەلحاتىن جولدادى.
مەملەكەت باسشىسى پەشاۆار قالاسىنداعى مەشىتتە بولعان لاڭكەستىك ارەكەت سالدارىنان كوپتەگەن ادامنىڭ قازا تاپقانى جانە زارداپ شەككەنى تۋرالى سۋىت حاباردى تەرەڭ كۇيزەلىسپەن قابىل العانىن جەتكىزدى.