الماتى قالاسىنىڭ پوليسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا قالا اۋماعىندا سينتەتيكالىق ەسىرتكى زاتتارىن تاراتۋمەن اينالىسقان ءبىر توپ ادامنىڭ زاڭسىز ارەكەتىن اشكەرەلەدى، - دەپ حابارلايدى aqshamnews.kz.
كۇدىكتىلەردى قولعا ءتۇسىرۋ كەشكى ۋاقىتتا جۇزەگە اسىرىلدى. ءتىنتۋ كەزىندە ولاردان ءارى قاراي بايلانىسسىز تاسىلمەن، ياعني جاسىرىن قويىپ كەتۋ ارقىلى وتكىزۋگە دايىندالعان ۇنتاق ءتارىزدى زات سالىنعان 19 وراما تاركىلەندى.
سوت-ساراپتاماسىنىڭ قورىتىندىسىنا سايكەس، تاركىلەنگەن زات ازاماتتاردىڭ ءومىرى مەن دەنساۋلىعىنا اسا ءقاۋىپتى سانالاتىن سينتەتيكالىق ەسىرتكى — الفا-PVP ەكەنى انىقتالدى. تەرگەۋ بارىسىندا ۇستالعان تۇلعالاردىڭ ينتەرنەت ارقىلى جۇمىس ىستەيتىن ەسىرتكى دۇكەنىنىڭ نۇسقاۋى بويىنشا ارەكەت ەتىپ، تاراتۋشى ءرولىن اتقارعانى بەلگىلى بولدى. ءاربىر جاسىرىپ قالدىرىلعان وراما ءۇشىن تولەم سيفرلىق پلاتفورمالار مەن ەلەكتروندى ءامياندار ارقىلى جۇرگىزىلگەن. بۇل — ەسىرتكى بيزنەسىن ۇيىمداستىرۋشىلار ءوز ءىزىن جاسىرۋ ءۇشىن ءجيى قولداناتىن سحەما. بۇگىندە ەسىرتكى بيزنەسى "جەڭىل تابىس" رەتىندە بۇركەمەلەنىپ ۇسىنىلۋدا.
— جاستاردى ينتەرنەت ارقىلى تەز اقشا مەن تولىق جاسىرىندىق ۋادە ەتىپ، زاڭسىز ارەكەتكە تارتادى. الايدا مۇنىڭ سوڭى ءاردايىم ءبىر — قاماۋعا الۋ، قىلمىستىق جاۋاپكەرشىلىك جانە تاعدىردىڭ تالقاندالۋى. پوليسيا مۇنداي ارنالاردى ادام قىلمىستىق سحەماعا قانشا ۋاقىت قاتىسقانىنا قاراماستان — بىرنەشە اي بولسىن، بىرنەشە كۇن بولسىن — جۇيەلى تۇردە انىقتاپ، جولىن كەسەدى، — دەدى الماتى قالاسى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ.
پوليسيا وكىلدەرى ەسىرتكىنىڭ زاڭسىز اينالىمىنا، ءتىپتى كۋرەر نەمەسە جاسىرىن قويىپ كەتۋشى رولىندە بولسا دا، قاتىسۋ اۋىر قىلمىس سانالاتىنىن جانە قاتاڭ جاۋاپكەرشىلىككە اكەلەتىنىن ەسكەرتەدى. ەسىرتكى زاتتارىن ينتەرنەت ارقىلى تاراتۋ ارنالارىنىڭ جولىن كەسۋ جۇمىستارى "زاڭ مەن ءتارتىپ" قاعيداتى اياسىندا جانە ەسىرتكى قىلمىسىنىڭ الدىن الۋ باسىمدىقتارى بويىنشا جالعاسۋدا.