«قايرات» فۋتزال كلۋبى قازاقستان چەمپيوناتى مەن ۋەفا چەمپيوندار ليگاسىنداعى ماۋسىمدى سەنىمدى تۇردە جالعاستىرىپ كەلە جاتىر.
كوماندا ەۋروپانىڭ باستى ءتۋرنيرىنىڭ شيرەك فينالىنا جولداما الىپ، 23 اقپاندا الماتىداعى بالۋان شولاق اتىنداعى سپورت سارايىندا يسپانيالىق «كارتاحەنا» كلۋبىنا قارسى العاشقى ماچتى وتكىزەدى، - دەپ حابارلايدى Aqshamnews.kz.
قارىمتا كەزدەسۋ 6 ناۋرىزدا يسپانيادا وتەدى، ەكى ويىننىڭ قورىتىندىسى بويىنشا جەڭىسكە جەتكەن كوماندا ۋەفا چەمپيوندار ليگاسىنىڭ تورتتىك فينالىنا شىعادى. «قايرات» فك سپورت ديرەكتورى گۋستاۆو پارادەدا مەن كوماندا كاپيتانى ءبىرجان ورازوۆ ماۋسىمداعى جەتىستىكتەر، العا قويىلعان ماقسات پەن كلۋبتىڭ دامۋى تۋرالى وڭىرلىك كوممۋنيكاسيالار قىزمەتىندە بايانداپ بەردى.
ۋەفا چەمپيوندار ليگاسىنىڭ وسى ماۋسىمى فۋتزال ءۇشىن ەرەكشە بولدى: جارىس العاش رەت ۇيدە جانە سىرت الاڭدا وتەتىن ماچتار فورماتىندا ۇيىمداستىرىلىپ وتىر. بۇل جارىستى تارتىسقا تولى ەتىپ، كورەرمەننىڭ دەلەبەسىن قوزدىردى. ايتا كەتەيىك، وتكەن ماۋسىمدا الماتىلىق كلۋب چەمپيوندار ليگاسىنىڭ فينالىنا دەيىن جەتىپ، كۇمىس جۇلدەنى يەلەنگەن.
«اقپان ايىندا ءبىز ۋەفا كۋبوگى ءۇشىن وينايمىز. ءبىز بۇل كۋبوكتى ەكى رەت جەڭىپ العانبىز. بۇل ەڭ جوعارى دەڭگەيدەگى جارىس. سونىمەن قاتار، بيىل ءبىزدىڭ كلۋبتىڭ قۇرىلعانىنا 30 جىل تولىپ وتىر، سوندىقتان وسى جىلى ءۇشىنشى ۋەفا كۋبوگىن الۋدى قاتتى قالاپ وتىرعان جايىمىز بار. ارينە، قارسىلاسىمىز دا وتە مىقتى يسپانيانىڭ «كارتاحەنا» كومانداسى، ولار وزدەرىندە ءابسوليۋتتى چەمپيون. ءبىزدى وتە تارتىستى ويىن كۇتىپ تۇر. العاشقى ماچتى ءوز الاڭىمىزدا، الماتىدا وتكىزەمىز. 23 اقپاندا جانكۇيەرلەرىمىزدىڭ قولداۋىن اسىعا كۇتەمىز، بارشاڭىزدى بالۋان شولاق اتىنداعى سپورت سارايىنا شاقىرامىز. سىزدەر قولداساڭىزدار جەڭىسكە جەتۋ جەڭىلدەۋ بولادى»، – دەدى «قايرات» جانكۇيەرلەرىنە ۇندەۋ تاستاعان گۋستاۆو پارادەدا.
كلۋبتىڭ سپورت ديرەكتورى گۋستاۆو پارادەدا جانكۇيەرلەرگە باسشى رەتىندە عانا ەمەس، بۇرىنعى «قايرات» ويىنشىسى رەتىندە دە جاقسى تانىس. ول 2005–2010 جىلدارى كوماندا ساپىندا ونەر كورسەتىپ، قازاقستاننىڭ بەس دۇركىن چەمپيونى اتانىپ، كلۋب تاريحىنداعى العاشقى ەۋروكۋبوكتىق جۇلدەلەردى جەڭىپ الۋعا ۇلەس قوستى. وتكەن ماۋسىمدا ول ەل چەمپيوناتىنىڭ شەشۋشى كەزەڭىندە كوماندانى ۋاقىتشا باسقارىپ، «قايراتتى» تاعى چەمپيون قىلدى.
1995 جىلى الماتى قالاسىندا قۇرىلعان «قايرات» فۋتزال كلۋبى وسى ۋاقىت ىشىندە قازاقستانداعى ەڭ اتاقتى كلۋبقا اينالدى. كوماندا ۋەفا چەمپيوندار ليگاسىنىڭ ەكى دۇركىن جەڭىمپازى (2013 جانە 2015 جىلدار)، ەل چەمپيوناتىنىڭ 21 دۇركىن چەمپيونى، سونىڭ ىشىندە قاتارىنان 20 چەمپيوندىق اتاققا قول جەتكىزگەن بىرەگەي سەريانىڭ يەگەرى، سونداي-اق قازاقستان كۋبوگى مەن سۋپەركۋبوگىنىڭ بىرنەشە دۇركىن جەڭىمپازى بولدى. «قايرات فۋتزال» ۋەفا چەمپيوندار ليگاسىنىڭ جۇلدەگەرلەرى قاتارىنان ءجيى كورىنىپ، قازاقستاندى ۇنەمى حالىقارالىق ارەنادا تانىستىرىپ ءجۇر.
«قايرات» قازاقستاننىڭ ۇلتتىق، جاستار جانە جاسوسپىرىمدەر قۇراماسىنا ويىنشى دايارلايتىن نەگىزگى كلۋبتىڭ ءبىرى. ءقازىر كلۋبتىڭ بالالار اكادەمياسىندا 7 مەن 19 جاس ارالىعىنداعى 300 بالا جاتتىعادى. اكادەميا الماتى اكىمدىگىنىڭ قولداۋىمەن جۇمىس ىستەپ، بۇقارالىق سپورتتىڭ دامۋىنا ەلەۋلى ۇلەس قوسىپ ءجۇر. 2025 جىلى كلۋب قۇرىلىمىندا اكادەميا مەن كاسىبي فۋتزال اراسىنداعى ماڭىزدى بۋىنعا اينالعان U-21 كومانداسى قۇرىلدى.
كلۋبتا جاتتىعۋ مەن قالىپقا كەلتىرۋ زالدارى، ترەناجەر زالى، مەديسينالىق جانە فيزيوتەراپيالىق بولىمدەر، سونداي-اق جازعى جاتتىعۋ الاڭدارى، جاعاجاي مەن اشىق ويىن الاڭدارى بار. بۇل بارلىق جاستاعى كوماندالارعا جوعارى كاسىبي دەڭگەيدە دايىندالىپ، قالپىنا كەلۋگە مۇمكىندىك بەرەدى.
«مەن سپورت ديرەكتورى بولىپ وتىرعان اكادەميادا 300-دەن استام بالا جاتتىعادى. اكادەميامىزدى قولداپ وتىرعان الماتى قالاسىنىڭ اكىمدىگىنە ۇلكەن العىس بىلدىرەمىن. وسى جەردەن كاسىبي دەڭگەيدە وينايتىن تاماشا ويىنشىلار ءوسىپ شىعىپ جاتىر. ولار ءبىزدىڭ جۇلدىزدارىمىز، ءبىز ولاردىڭ جەتىستىگىن ماقتان تۇتامىز. دارىندى بالالاردى تاربيەلەۋ ءۇشىن كلۋبتا ءقازىر بارلىق جاعداي جاسالعان»، – دەپ اتاپ ءوتتى گۋستاۆو پارادەدا.
2024/2025 ماۋسىمىندا «قايرات فۋتزال» تاعى ءبىر ماڭىزدى قادام جاساپ، ايەلدەر كومانداسىن قۇردى. قازاقستان چەمپيوناتىنداعى دەبيۋتتىك ماۋسىمىندا ايەلدەر كومانداسى بىردەن ەل چەمپيونى اتاندى، ونىڭ سەگىز ويىنشىسى ءقازىر ەلدىڭ فۋتزالدان ۇلتتىق قۇراماسىنىڭ نامىسىن قورعايدى.
«قايرات فۋتزال» – جەڭىس پەن تروفەي عانا ەمەس، سونىمەن قاتار فۋتزالدىڭ جۇيەلى دامۋى، جاس ويىنشىلاردى دايارلاۋ مەن قازاقستاننىڭ حالىقارالىق سپورت ارەناسىنداعى بەدەلىن نىعايتۋ جولىنداعى كەشەندى جۇمىس.