2023 جىلدىڭ كۇزىنەن باستاپ شام باعاناسىنداعى 2000-نان استام ليۋك اۋىستىرىلدى
الماتىدا كوشە جارىعىن ۇرلاۋ جانە ءبۇلدىرۋ كوبەيدى. بۇل تۋرالى «الماتى قالا جارىق» مكك حابارلادى.
كومپانيا باسشىسىنىڭ ورىنباسارى ۆاديم ماكاروۆتىڭ ايتۋىنشا، قالادا سىرتقى جارىقتاندىرۋ تىرەكتەرىندەگى تەكسەرۋ قاراۋ ليۋكتەرىن رۇقساتسىز بولشەكتەۋ جاعدايى كۇرت ءوستى.
«ولار شام باعاناسىنىڭ تۇبىندەگى مەتالل قاقپاقتار. بۇل جەردە شامنىڭ سىمدارى ماگيسترالدىق كابەلگە قوسىلادى. ليۋكتەر سىرتقى جارىقتاندىرۋ جەلىلەرىنە تەحنيكالىق قىزمەت كورسەتۋ جانە جوندەۋ، كابەلدى اۋىستىرۋ جانە باسقا جۇمىستار ءۇشىن قاجەت. جاقىندا ءبىز بىرەۋدىڭ بۇل ليۋكتەردى شەشىپ، ۇرلاپ جاتقانىن بايقادىق. كۇزدەن باستاپ ءبىز 2000 ليۋكتى اۋىستىردىق»، - دەيدى ۆاديم ماكاروۆ.
سونىمەن قاتار، «الماتى قالا جارىق» دەرەگىنشە، قاسكۇنەمدەر سىرتقى جارىقتاندىرۋدى باسقارۋ شكافتارىن ءجيى بۇزادى. بۇل نىساندار جوعارى كەرنەۋدە جانە ولارعا بوگدە ادامدارعا كىرۋگە قاتاڭ تىيىم سالىنادى.
«قاسكۇنەمدەر سىرتقى جارىقتاندىرۋدى باسقارۋ شكافتارىنداعى قۇلىپتار مەن ەسىكتەردى سىندىرىپ، اۆتوماتتى اجىراتقىشتار وشىرەدى، سونىڭ كەسىرىنە سىرتقى جارىقتاندىرۋ توبىندا توق بولماي قالادى. ءبىزدىڭ بريگادالار شاقىرتۋلارعا شىعىپ، سىرتقى جارىقتاندىرۋدى باسقارۋ شكافىنداعى سىمداردىڭ كەسىلگەنىن، اجىراتقىشتاردىڭ سىنعانىن نەمەسە الىنىپ تاستالعانىنا، باسقا جابدىقتاردىڭ ۇرلانعانىن نەمەسە بۇلىنگەنىن كورەدى. مۇنداي فاكتىلەر، ارينە، سىرتقى جارىقتاندىرۋدى قالپىنا كەلتىرۋ ۇدەرىسىن تەجەيدى»، - دەيدى كومپانيا وكىلى.
سونىمەنن قاتار، «الماتى قالا جارىق» مكك دەرەكتەرى بويىنشا ۆاندالدار تورشەرلى تروتۋار شامدارىن دا قيراتادى. بۇزاقىلار ولاردى ءجيى سىندىرادى، جارىق ءسونىپ، قاراڭعى بولۋمەن قاتار، مۇنداي جەرلەردە جالاڭاش سىمدار دا ءقاۋىپتى بولادى. كاسىپورىن قىزمەتكەرلەرى بىرنەشە اۋداندا زاقىم كەلتىرۋ قيىن تورشەرلى شامداردى ورناتۋعا ءماجبۇر بولدى.
«الماتى قالا جارىق» كومپانياسى بەي-جاي قارامايتىن ازاماتتاردان زاقىمدالعان سىرتقى جارىقتاندىرۋدى باسقارۋ شكافتارى، تورشەرلى شامدارى مەن تىرەكتەردەگى اشىق ليۋكتەر انىقتالعان كەزدە كومپانيانىڭ ديسپەچەرلىك قىزمەتىنە حابارلاۋدى، ال بۇزاقىلىق ارەكەتتەرگە كۋا بولعانداردى پوليسياعا قوڭىراۋ شالۋدى سۇرايدى.
كاسىپورىننىڭ ديسپەچەرلىك پۋنكتىنىڭ نومىرلەرى: 8(727)3902040؛ 8(727)3902060، 8(771)718-24-39، 8(771)718-24-56.