ولجاس بەكتەنوۆ الماتىداعى سوربۇلاق سۋ قويماسىنداعى سۋعا قاتىستى دەپۋتاتتىق ساۋالعا بەرگەن جاۋابىندا جۇرگىزىلگەن زەرتتەۋلەر تۋرالى ايتتى، دەپ حابارلايدى aqshamnews.kz
ونىڭ ايتۋىنشا، سوربۇلاق جيناقتاعىشىنان الىنعان سۋ سىنامالارىنىڭ ميكروبيولوگيالىق، پارازيتولوگيالىق جانە پەستيسيدتىك كورسەتكىشتەرى بويىنشا زەرتتەۋلەردى دەنساۋلىق ساقتاۋ مينيسترلىگى 2024 جىلى جۇرگىزگەن. زەرتتەۋ ناتيجەسىندە كەيبىر سىنامالاردىڭ، ونىڭ ىشىندە ميكروبيولوگيالىق جانە پارازيتولوگيالىق كورسەتكىشتەرى بويىنشا، سانيتارلىق تالاپتارعا ساي كەلمەيتىنى انىقتالعان.
"2025 جىلدىڭ ءبىرىنشى جارتىجىلدىعىندا ۆيرۋستىق كورسەتكىشتەر بويىنشا توپىراقتان ەكى سىناما الىنىپ، زەرتتەلدى – ەشقانداي سايكەسسىزدىك انىقتالعان جوق. سونىمەن قاتار، ەكولوگيا جانە تابيعي رەسۋرستار مينيسترلىگى الماتى قالاسىنىڭ اكىمدىگىنە جيناقتاعىشتاعى سۋدى تەك تازارتۋ جۇمىستارى جۇرگىزىلىپ، سانيتارلىق جانە پارازيتولوگيالىق نورماتيۆتەرگە سايكەستىك قامتاماسىز ەتىلگەن جاعدايدا عانا پايدالانۋعا بولاتىنى تۋرالى اقپارات بەردى. ايتپەسە، سۋدى پايدالانۋ قورشاعان ورتا مەن حالىق دەنساۋلىعى ءۇشىن ۇزاقمەرزىمدى جاعىمسىز سالدارعا اكەلۋى مۇمكىن"، – دەلىنگەن پرەمەر-مينيستردىڭ جاۋابىندا.
وسىنى ەسكەرە وتىرىپ، گيدروگەولوگيالىق جانە گەولوگيالىق زەرتتەۋلەر، سونداي-اق ينجەنەرلىك ينفراقۇرىلىمعا قايتا تەكسەرۋ جۇرگىزىلەتىن بولادى. بۇل جۇمىستاردى جۇزەگە اسىرۋ ءۇشىن قالالىق ءماسليحاتتىڭ شەشىمىمەن جەرگىلىكتى بيۋدجەتتەن 120 ملن تەڭگە ءبولىندى.
"2025 جىلعى 3 شىلدەدە اكىمدىك "سوربۇلاق سۋ قويماسىنداعى سۋدىڭ جانە تۇبىندەگى شوگىندىلەردىڭ ساپاسىن باعالاۋ ماقساتىندا گيدروگەولوگيالىق جانە گەولوگيالىق زەرتتەۋلەر جۇرگىزۋ" نىسانى بويىنشا مەردىگەر ۇيىم – "قازگيپروۆودحوز ينستيتۋتى" جشس-مەن كەلىسىمشارت جاساستى. زەرتتەۋلەردى جۇرگىزۋ مەرزىمى – 9 اي. جۇمىستاردى اياقتاۋ 2026 جىلعى ساۋىرگە جوسپارلانعان"، – دەپ اتاپ ءوتتى پرەمەر-مينيستر.