ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى اسقاربەك ەرتايەۆتىڭ ايتۋىنشا، بۇگىندە شەتەلدە 126 مىڭ قازاقستاندىق ەڭبەك ەتىپ ءجۇر، دەپ حابارلايدى aqshamnews.kz
ولاردىڭ ىشىندە:
102 مىڭى – رەسەيدە،
15 مىڭى – وڭتۇستىك كورەيادا،
2 مىڭى – ۇلىبريتانيا مەن ەۋروپالىق وداق ەلدەرىندە جۇمىس ىستەيدى.
"باسقا ماسەلە – بارلىق ەلدەرمەن ەڭبەك قىزمەتىن رەتتەۋ تۋرالى كەلىسىمدەر جاسالماعان. مىسالى، ۇلىبريتانيامەن بيىل ءتيىستى مەموراندۋمعا قول قويدىق. ال وڭتۇستىك كورەيامەن كەلىسىم جوباسى ءقازىر قارالۋ ساتىسىندا. ەكى جىل كەلىسسوزدەر جۇرگىزدىك، ەلدەگى ساياسي جاعدايعا بايلانىستى ءۇزىلىس بولدى. بيىل كۇزدە قايتا جالعاستىرامىز. سەبەبى كورەيادا جۇرگەن 15 مىڭ ازاماتتىڭ 11 مىڭى زاڭسىز ەڭبەك ەتىپ ءجۇر. بۇل باعىتتا ناقتى شارالار قابىلداۋ قاجەت"، – دەدى ۆيسە-مينيستر.
ونىڭ ايتۋىنشا، وڭتۇستىككورەيالىق تاراپ قازاقستان ازاماتتارىنىڭ ەل اۋماعىندا زاڭسىز جۇرۋىنە قاتىستى شارالار قابىلداۋدى تالاپ ەتىپ وتىر.
"ءقازىر كەلىسسوزدەر ءجۇرىپ جاتىر. ءبىزدىڭ ءوتىنىمىمىز كورەيا تاراپىنىڭ قاراۋىندا. جىل سوڭىنا دەيىن وڭ شەشىمگە قول جەتكىزەمىز دەپ ۇمىتتەنەمىز"، – دەپ تۇيىندەدى اسقاربەك ەرتايەۆ.