الماتىدا سايران سۋ قويماسىنا قالقىما كوپىر سالىندى. اباتتاندىرۋ جۇمىستارى ءالى دە جالعاسىپ جاتىر، - دەپ حابارلايدى aqshamnews.kz ءتىلشىسى 24kz-كە سىلتەمە جاساپ.
قالقىما كوپىردىڭ ۇزىندىعى 251 مەتر. سايراننىڭ ەكى جاعاسىن بايلانىستىرىپ تۇر. ونىڭ ەرەكشەلىگى سول، ءار قادام باسقان سايىن، سۋدىڭ سىلدىرىن سەزىنىپ، كول بەتىمەن كەتىپ بارا جاتقانداي سەزىم سىيلايدى. كوپىر رەزەڭكەدەن جاسالعان مودۋلدىك بلوكتاردان سالىنىپ، جينالمالى 33 زاكىرمەن بەكىتىلگەن. قۇرىلىمى وتە بەرىك. ءبىر شارشى مەترىنىڭ ءوزى 400 كەلىگە دەيىن سالماقتى ەركىن كوتەرەدى.
"قاۋىپسىزدىك تۋرالى ايتاتىن بولساق، ول جاعىنا الاڭداۋعا نەگىز جوق. ءبىز ونى ابدەن سىناقتان وتكىزىپ كوردىك. ادام تۇگىلى جۇك تيەلگەن اۋىر كولىك ءجۇرىپ وتسە دە، كوتەرە بەرەدى. ماسكەۋدە وسى كوپىردىڭ قۇرىلىمىن ساتىپ العان كەزدە سول جەردە دە تەكسەردىك. بارلىق قاۋىپسىزدىك تالابىنا ساي كەلەدى. ودان قيىس كەتكەن جەرىمىز جوق"، - دەيدى جوبا جەتەكشىسى رينات زىلمۇحامەدوۆ.
سايران سۋ قويماسى 1971 جىلى سالىنعان. سودان بەرى بىرنەشە رەت جوندەۋ جۇرگىزىلگەنىمەن ءدال وسىلاي ادام ارنايى ىزدەپ كەلەتىن كورىكتى ورىنعا اينالماعان. بۇل جولى ونىڭ جان-جاعى ادام تانىماستاي وزگەردى. قالا ورتاسىنان وازيس پايدا بولدى. ءقازىر جاقىن ماڭدا تۇراتىن ۇلكەن-كىشى وسى جەردەن تابىلادى.
سايراندى اباتتاندىرۋ جۇمىستارى ءالى تولىعىمەن اياقتالعان جوق. ءقازىر بۇل جەردە 200-گە جۋىق جۇمىسشى ەڭبەك ەتىپ جاتىر.
"قىركۇيەككە دەيىن جۇمىستى اياقتاۋدى جوسپارلاپ وتىرمىز. دەمالىس ايماعىنىڭ نەگىزگى بولىگىن اباتتاندىرۋعا بارىنشا دەن قويدىق. وعان قوسا، اۆتوماتتى ءورت ءسوندىرۋ جۇيەسىن قايتا قۇرىپ، باسپالداقپەن جۇرەتىن الاڭنىڭ كوپشىلىككە ىڭعايلى ، ءقاۋىپسىز بولۋىن نازارعا الدىق. مۇنىڭ بارلىعى، ارينە، ەڭ الدىمەن كەلۋشىلەردىڭ جايلى ءجۇۇرىپ، ەركىن سەرۋەندەۋى ءۇشىن جاسالىپ جاتىر"، - دەيدى قالالىق قوعامدىق كەڭىستىكتى دامىتۋ باسقارماسىنىڭ ءبولىم باسشىسىنىڭ مىندەتىن اتقارۋشى وڭالبەك قىدىربايەۆ.
سايراننىڭ جاعالاۋى ەكىنشى ارباتقا اينالۋى مۇمكىن. وتباسىلىق سەرۋەن قۇرىپ، ۇمىتىلماس كەش ۇيىمداستىرىپ، قالانىڭ اسەم كورىنىسىن تاماشالاۋعا بولادى. مۇندا قازىردەن سەرۋەندەۋگە كەلگەن كىسى قاراسى قالىڭ. مۋزىكالىق اسپابىن اسىنىپ، جاندى داۋىسپەن ءان شىرقاعان ونەرپازدار دا بارشىلىق. ال سۋعا تۇسۋگە تىيىم سالىنعان.