الماتى اكىمىنىڭ ورىنباسارى ولجاس سماعۇلوۆ سايران كولىن قايتا جاڭعىرتۋ جۇمىستارىنىڭ ساپاسى مەن بەلگىلەنگەن مەرزىمدە ورىندالۋىن قاداعالاۋ ماقساتىندا نىسان باسىندا كوشپەلى كەڭەس وتكىزدى. جيىنعا مەردىگەر مەكەمەنىڭ، اۋدان اكىمدىكتەرىنىڭ، كوممۋنالدىق قىزمەتتەردىڭ، پوليسيانىڭ، تجد جانە وزگە دە ءتيىستى ۇيىمداردىڭ وكىلدەرى قاتىستى.
ولجاس سماعۇلوۆ كوگالداندىرۋ، كوركەيتۋ، ينجەنەرلىك جانە سانيتارلىق ينفراقۇرىلىم باعىتىنداعى اتقارىلىپ جاتقان جۇمىستاردىڭ جاي-كۇيىمەن تانىستى. تەكسەرۋ بارىسىندا وڭ وزگەرىستەرمەن قاتار، شەشۋىن كۇتكەن تۇيتكىلدى ماسەلەلەر دە انىقتالدى.
الداعى كۇندەرى سۋارۋ جۇيەسىن ورناتۋ جۇمىستارى اياقتالىپ، مەردىگەر مەكەمە اۋقىمدى كوگال ەگۋ، كوپجىلدىق بۇتالار مەن ساندىك گۇلدەر وتىرعىزۋ جۇمىستارىنا كىرىسەدى.
سونىمەن قاتار، كوركەيتۋ اياسىندا ءبىرقاتار ماڭىزدى ءىس-شارا جۇزەگە اسىرىلماق. اتاپ ايتقاندا، الداعى ۋاقىتتا كىرەبەرىس الاڭدارعا ءتورت پاندۋس پەن جەدەل ساتى ورناتىلادى، كەسپە تاس توسەۋ جۇمىستارى اياقتالىپ، كولبەۋ جەرلەردى بەكىتۋ، جاڭبىر سۋىن اعىزۋ جۇيەسىن قۇرۋ، اعاشتارعا جارىق شامدارىن ورناتۋ جانە كوشە شامدارىن ورناتۋ جۇمىستارى جالعاسادى. بۇعان قوسا، قوسىمشا 130 قوقىس جاشىگى قويىلىپ، تازالىققا جاۋاپتى قىزمەتكەرلەردىڭ سانى ارتادى. سانيتارلىق ءتارتىپتى بۇزعاندارعا ايىپپۇل سالىنادى.
كول اۋماعىنداعى قاۋىپسىزدىكتى قامتاماسىز ەتۋ ماقساتىندا 210 بەينەباقىلاۋ كامەراسىن ورناتىلادى (ءقازىر 47 كامەرا جۇمىس ىستەپ تۇر). بۇل كامەرالار تجد جۇيەلەرىمەن بىرىكتىرىلىپ، سۋ ايدىنىندا بولۋى مۇمكىن وقىس وقيعالاردى دەر كەزىندە تىركەۋگە مۇمكىندىك بەرەدى. سونىمەن قاتار سكەيت-پارك اۋماعىندا انىقتالعان اقاۋلاردى دەرەۋ جويۋ تۋرالى مەردىگەر مەكەمەگە تاپسىرما بەرىلدى.
ينجەنەرلىك ماسەلەلەرگە دە ەرەكشە ءمان بەرىلدى. اتاپ ايتقاندا، سۋمەن جابدىقتاۋ جانە كارىز جۇيەسىنە قوسىلماعان ۋچاسكەلەردى قالپىنا كەلتىرىپ، سانيتارلىق-گيگيەنالىق توراپتاردى (سگت) ىسكە قوسۋ مىندەتى جۇكتەلدى. قازىرگى تاڭدا بەس سگت بار، ولاردىڭ بارلىعى سانيتارلىق تالاپقا ساي جۇمىس ىستەۋگە ءتيىس. سونىمەن قاتار حالىق كوپ جينالاتىن ايماقتاردا قوسىمشا سانيتارلىق توراپتار ورناتۋ مۇمكىندىگى قاراستىرىلىپ جاتىر.
جيىن بارىسىندا يت سەرۋەندەتۋگە ارنالعان ارنايى الاڭدار سالۋ، سانيتارلىق قاۋىپسىزدىكتى قامتاماسىز ەتۋ، سونداي-اق تۇنگى ۋاقىتتا پوليسيا ءپاترۋلىن كۇشەيتۋ ماسەلەسى دە تالقىلاندى. بەيبەرەكەت ساۋداعا توسقاۋىل قويۋ، قالدىقتى دەر كەزىندە جيناۋ جانە شىعارۋ باعىتىندا باقىلاۋ شارالارى قابىلدانادى.
الماتى اكىمىنىڭ ورىنباسارى ولجاس سماعۇلوۆتىڭ ايتۋىنشا، سايران كولىن قايتا جاڭعىرتۋ جۇمىستارى زاماناۋي جايلىلىق، قاۋىپسىزدىك جانە تۇراقتىلىق ستاندارتتارىنا ساي جۇرگىزىلۋگە ءتيىس. شاھار تۇرعىندارى ءۇشىن قولايلى، كوركەم ءارى فۋنكسيونالدى دەمالىس ورنىنا اينالۋى كەرەك. جاۋاپتى مەكەمەلەر جۇكتەلگەن مىندەتتەردى ساپالى ءارى ۋاقىتىلى ورىنداپ، ءوزارا ءىس-قيمىلدى ۇيلەستىرۋى قاجەت.