سايران اۋماعىندا قوعامدىق كەڭىستىكتى لاستاۋشىلاردى جاۋاپكەرشىلىككە تارتۋ ماقساتىندا پوليسيا قىزمەتكەرلەرى مەن ەرىكتىلەردەن قۇرالعان مونيتورينگتىك توپتىڭ قاتىسۋىمەن رەيد ۇيىمداستىرىلدى.
بۇل شارا وتكەن دەمالىس كۇندەرى ۇيىمداستىرىلعان سەنبىلىكتەن كەيىن قولعا الىندى. ەرىكتىلەر مەن ەكو-بەلسەندىلەر اۋماقتى تازالاپ بولعاننان كەيىن دە اۋماققا كەلگەن كەيبىر ازاماتتار قوقىستى بەيبەرەكەت تاستاعانى انىقتاعان.
سايران سۋ قويماسىنىڭ اينالاسى كەزەڭ-كەزەڭىمەن اباتتاندىرىلىپ جاتىر. كول جاعالاۋى بۇگىندە قالا تۇرعىندارى مەن قالا قوناقتارىنىڭ سۇيىكتى دەمالىس ورنىنا اينالدى. ايتا كەتۋ كەرەك، سايران جاعاسىنا دەمالۋعا كۇنىنە شامامەن 4 000 ادام كەلەدى.
جايلى ءارى مادەني ورتا قالىپتاستىرۋ ماقساتىندا سايران جاعالاۋىندا قوعامدىق ءتارتىپتى ساقتاۋ بويىنشا كۇندەلىكتى تەكسەرىستەر جۇرگىزىلەتىن بولادى. قازىرگى تاڭدا اباتتاندىرىلعان اۋماقتا 124 قوقىس جاشىگى مەن بەينەباقىلاۋ كامەرالارى ورناتىلعان. سونداي-اق سايران اۋماعىندا كۇن سايىن 40 كوممۋنالدىق قىزمەتكەر جۇمىس ىستەيدى. ولار تاۋلىگىنە ورتا ەسەپپەن 5 توننا قاتتى تۇرمىستىق قالدىقتاردى شىعارادى.
المالىنىڭ پد وكىلى ساادۋللا سيازحانوۆ تۇرعىندارعا كەلەسىدەي ۇندەۋ جاسادى:
"قۇرمەتتى الماتىلىقتار جانە قالامىزدىڭ قوناقتارى! سايران كولىنىڭ جاعاجايىنا دەمالۋعا كەلگەن بارلىق ازاماتتاردى قوعامدىق ورىنداردىڭ تازالىعىن ساقتاۋعا جانە قوعامدىق ءتارتىپتى بۇزباۋعا شاقىرامىز. اكىمشىلىك قۇقىقبۇزۋشىلىق تۋرالى كودەكستىڭ 505-بابىنا سايكەس ەسكەرتۋ العان نەمەسە قۇقىق بۇزعان تۇلعالارعا 5 اەك مولشەرىندە ايىپپۇل سالىنادى. سونداي-اق، جاعاجاي اۋماعىندا ساعات 22:00-دەن كەيىن قاتتى داۋىستا مۋزىكا قوسۋعا جانە شۋلاۋعا قاتاڭ تىيىم سالىنادى"، - دەدى پوليسيا وكىلى.
بۇعان قوسا، قۇقىق قورعاۋ ورگاندارىنىڭ قىزمەتكەرلەرى تۇرعىندارعا قوعامدىق ورىنداردا ساموكاتپەن، ۆەلوسيپەدپەن جۇرۋگە جانە ءۇي جانۋارلارىمەن سەرۋەندەۋگە بولمايتىنىن ءتۇسىندىردى.
جاستار ساياساتى شتابىنىڭ وكىلى ءشامشى قۇدايبەرگەن مەن ەرىكتىلەر جاعاجايدا دەمالۋشىلارعا تۇرمىستىق قالدىقتاردى دۇرىس تاستاۋ ەرەجەلەرىن ءتۇسىندىرۋ ماقساتىنداعى رەيدكە قاتارىنان ءۇشىنشى رەت قاتىسىپ كەلەدى.
"جاعاجاي اشىلعان كۇننەن باستاپ ادام سانىنىڭ كۇرت ارتقانى بايقالادى. ىستىقتا ادامدار ءجيى كەلىپ، سۋسىن مەن تاعام قالدىقتارىن كوپتەپ قالدىرىپ كەتەدى. العاشقى كۇنى وتە كوپ قوقىس جينالدى. ءبىز جاستارمەن، دەمالۋعا كەلگەن توپتارمەن جانە وتباسىلارمەن اڭگىمەلەسىپ، وزىنەن كەيىنگى ورىندى تازا قالدىرۋ كەرەكتىگىن تۇسىندىردىك. كوپشىلىك بۇل تالاپقا تۇسىنىستىكپەن قاراپ، قولداۋ كورسەتتى. كەيىنگى كۇندەرى دە ءتۇسىندىرۋ جۇمىستارى جالعاستى. ءقازىردىڭ وزىندە قوقىس كولەمى ايتارلىقتاي ازايدى. ءبىز جاز بويى تازالىق جۇمىستارىنا قاتىسىپ، ءوزىمىز دە قاجەت بولعان جاعدايدا قالدىقتاردى جيناي بەرەمىز"، - دەدى ول.