ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، قازاقستاندا 800 مىڭ باس كيىكتى اتۋ ۇسىنىلعان، دەپ حابارلايدى aqshamnews.kz
بۇل شەشىمگە عىلىمي نەگىزدەمە رەسمي تۇردە الىنعان.
- بۇگىندە ءبىز ۇيىمداستىرۋ ماسەلەلەرىن قاراستىرىپ جاتىرمىز. بىر-ەكى كۇندە ناقتى شەشىمدى جاريالايمىز دەپ ويلايمىن. عالىمدار جالپى پوپۋلياسيانىڭ 20%-ىن الىپ تاستاۋدى ۇسىنىپ وتىر. كوكتەمگى ساناق ناتيجەسىندە رەسمي كورسەتكىش – 3 978 000 باس. دەمەك، شامامەن 800 مىڭ باس كيىكتى اتۋ ۇسىنىلىپ وتىر. جاس ەرەكشەلىكتەرىنە بايلانىستى دا ىرىكتەۋ قاراستىرىلعان. ءقازىر دايىندىق جۇمىستارى ءجۇرىپ جاتىر، – دەدى مينيستر.
ءمينيستردىڭ ايتۋىنشا، مۇنداي اۋقىمدى جويۋ كەزىندە ەت وڭدەۋ ماسەلەسى وتە ماڭىزدى. وسىعان بايلانىستى ەلدە ارنايى ينۆەستيسيالىق جوبالار قاراستىرىلىپ، كيىك ەتىن وڭدەيتىن ەت كومبيناتتارىن سالۋ جوسپارى پىسىقتالىپ جاتىر.
- قازىرگى تاڭدا التى شاقتى كومپانيا قىزىعۋشىلىق ءبىلدىرىپ وتىر، – دەدى نىسانبايەۆ.
بۇعان دەيىن قازاقستان كيىك پوپۋلياسياسىن قالپىنا كەلتىرۋ ءۇشىن اۋقىمدى جۇمىستار اتقارعان. الايدا بۇگىندە بيلىك وكىلدەرى مەن كەيبىر ساراپشىلار بۇل جانۋارلاردىڭ سانى تىم كوبەيىپ، اۋىل شارۋاشىلىعىنا، ازىق-تۇلىك قاۋىپسىزدىگىنە، ءتىپتى ادامنىڭ وزىنە ءقاۋىپ ءتوندىرۋى مۇمكىن ەكەنىن ايتىپ وتىر.